Матыр чааҷының адын хумартхылап...
08.04.2026
Хабарлар
Атыс марииның араласчылары
Марығ. Анатолий Бурнаковты – чааҷы-интернационалистті, Афганистандағы чаа араласчызын, Хызыл Чылтыс орденінің кавалерін – хумартхылап иртірілчеткен Асхыс аймааның азых турниріне пӱӱл 11 команда кил парды
Полғанында ла 4 кізі: 2 оол паза 2 хыс. Олар мылтых атарынҷа марығласханнар. Атығҷыларға 8 ух пирілген. Оларның ӱзі мылтыхты сыныхтап атарға кӧрілген, пис ух санға парча. Спортсменнер 10 метр ырахтағы таңмаа теерте атарға кирек полғаннар.
Марығлар Ӱс чулдағы М.Е.Кильчичаковтың адынаң школада 8-ҷі хати ирткеннер. Анатолий пу школада ӱгренген, аны 1979 чылда тоосхан. Анаң Ағбандағы ӱгретчілер институдынзар филология факультедінзер кірібіскен. Че 3-ҷі курста ӱгренчеткенде, армияа пар килерге чарадыбысхан. 1982 чылда, часхыда, чааҷы кип-азаан кизібіскен. Службаны Афганистанда Кандагар городта разведротада ирткен. Ағаа кӧп хати, командование чахиин толдырып, улуғ-кічіг чаалазығларда аралазарға киліскен. Ол уғаа чичең атыстығ чааҷы полған. Аның холында табыс чох атчаң паза харасхыда кӧрҷең тиріглер турғызылған Калашниковтың автомады полған. Ыырҷы тоғас парза, атысты хаҷан даа чир-суғҷыбыс пастаҷаң. Душманнар сағыс хабынғанҷа паза ухтар хайдаң учухчатханнарын оңарғанҷа, Анатолий 2-3 кізіні чатыр саларға маңнанҷаң. Арғыстары анаң на атысха кірісчеңнер.
Анатолий, Чоғархы Тӧӧ аалда тӧреен-ӧскен кізі, кічігдең сығара холда мылтых тут пілген. Аны Игнат ағазы – саблығ аңҷы – атарға ӱгреткен. Саарбах тузындох Толя пычах чітиине теерте паза бутылка ахсына кире ат пілҷең – іди аңҷылар мылтыхтың оңдайын сыныхтапчалар.
Прай пу кӧнігістер гвардияның улуғ сержанты, разведвзводтың командир орынҷызы Бурнаковха Афганистанда тың туза полғаннар. Матыр чааласхан ӱчӱн ол Хызыл Чылтыс орденіне турысхан.
1984 чылда чир-суунзар айланып, пастап «Вагонмаш» заводта iстенген, анаң Асхыс тимір чол станциязында вагоннар депозында тоғын сыххан. Сӧбіре тӧстеен. Чиит ирепчінің оолағас пала тӧреен. 1989 чылда Афганистандағы чааның ветераны, киненге кіріп, ӱреп парған. Ағаа 29 ла час полған.
Тӧӧ чирінің матыр оолғының хумартхызына чарыдылған мылтых атарынҷа марығлар 2018 чылдаң сығара иртіріл сыхханнар. Анатолий Бурнаков 24 кӧрікте тӧреен. Сах ол туста ӱгренҷілернің часхы тынағ кӱннері пасталча.
Кічіг атығҷыларны турнир азылчатханынаң алғыстирға С.З.Карамчаковтың адынаң Асхыс аймааның спорт школазының устағҷызы Оксана Кучугешева, Асхыс, Таштып аймахтарының паза Абаза городтың чаа комиссариадының тоғынҷызы Виктор Чепчигашев, Афганистандағы чааның паза СВО ветераннары пірігізінің Асхыс аймаандағы пӧлиинің устағҷызы Юрий Нербышев кил парғаннар. «Мындағ махачы чааҷы пістің школада ӱгренгеніне тың поғдархапчабыс, – таныхтаан Ӱс чул аалдағы школаның устағҷызы А.Ф.Боргоякова. – Оң ползын пӱӱн марығ араласчыларына!»
Марығ хазыр парған. Полған на спортсмен мирген атыс кӧзідерге кӱстенген. Хайди за, Ӱс чулзар полған на школа иң кӱстіг атығҷыларны ысхан. Iзеніске турызарға кирек!
Iди оолағастар аразында 3-ҷі орында Артём Владимиров (Асхыс-1) пол парған, 2-ҷі орында – Абрам Тиспиреков (Асхыс-1), 1-ғы орында – Ярослав Канзычаков (Асхыс-2).
Хызыҷахтар медальларны піди ӱлезіп алғаннар: хола медаль – Вероника Зуевани (Асхыс-1), кӱмӱс – Айима Бурнаковани (Асхыс-2), алтын – Карина Карповани (Палыхтығ суғ).
Палыхтығ суғ посёлоктың командазы 3-ҷі орынны холға кирген. 2-ҷі орында – Асхыстағы лицей-интернаттың 2 № командазы. Иң кӧп сан чыып алып, Асхыстағы лицей-интернаттың 1 № командазы турнирнiң чиңісчізі полыбысхан.
Ӧнетін сыныхтағларны турыстығ иртіп, иң артых атығҷы пол парған Карина Карпова (Палыхтығ суғ). Ағаа «Бурнаковский стрелок» аарластығ ат пирілген.
Олғаннарға турнир олаңай ла спорт марығлары нимес, олар чичең атыстарынаң чааҷы-интернационалисттің матыр киректеріне турыстығ полчатханнарын кӧзітчелер. Турнир чичең атыстығ кічіг спортсменнерні ілезіне сығарды. Ол саарбахтарны Чир-суубыстың тархынында полған киректерні пілерге паза матырларны улуғлирға ӱгретче.
Марығларны пӧзік синде иртірерге Ӱс чул аалдағы М.Е.Кильчичаковтың адынаң школаның устағ-пастаа кӧп кӱс салған. Чарғыҷылар В.Г.Бурнаков паза В.Г.Боргояков турнирні уғаа иптіг апарғаннар. Ахчанаң Асхыс аймааның устағ-пастаа, «Благодарение» чыынды (директор Т.А.Торокова) паза Анатолий Бурнаковтың туғаннары полысханнар.
Сом авторни
Автор :
Алексей Боргояков,Россияның Журналисттер пірігізінің араласчызы
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
