Чааҷы службазын иртер тус алыспинча
08.04.2026
Хабарлар
Хакасияның чааҷы комиссары Сергей Спиридонов брифинг иртірче
Брифинг. Хакасияның чааҷы комиссары подполковник Сергей Спиридонов республикада пӱӱл срочнай чааҷы службазына хығыртығ пасталчатхан сурығҷа брифинг иртірген
Чыл сай Россияда 1 хосхардаң чааҷы cлужбазына хығыртар кампания пасталча. Армияа парарға чит парған чиит ооллар пу тусты чидікпин сағыпчалар. Пілдістіг, пістiң хазнада армиядағы службаны иртпеен оолларны сын иреннерге дее санабинчалар, аннаңар чиит улустың кӧбізi чааҷы службазына тузында пар килерге кӱстенче, улам армияда полғаны улуғ аарласха саналча.
Хайди брифингте Сергей Спиридонов искірген, «Чааҷы обязаннозынаңар паза чааҷы службазынаңар» федеральнай законға кирілген алызығлар хоостыра 2026 чылның 1 кӱрген айынаң сығара кізілерні чааҷы службазына хығыртары 1 кӱргеннең 31 улуғ хырласха теере чыл тооза апарылча. Пу наа оңдай хығыртығ комиссияларның тоғызын иптиріне кӧстелче паза кізілерні чааҷы службазына хығыртарын илееде чахсыландыр салча.
Таныхтирға кирек, амды хығыртылар тус пу чылда иртірілер, хайзын Россия президенті Россияның чоннары хада-пірге тудынчатхан чылы тіп чарлабысхан.
Призывниктер чааҷы службазын иртер орынзар, мының алнындағы чіли, чылда ікі хати ызыларлар – 1 хосхардаң 15 от айына теере паза 1 чарыстаң 31 улуғ хырлас айына теере. Республикадаң войсколарзар 400 азыра кізi ызылар.
Законға кирілген ӧӧн алызығларның пірсі мындағ полар – чааҷы cлужбазына хығыртығдаңар чарадығ ол алылған кӱннең сығара чыл тооза Россияның прай чирлерінде тоғынча. Аны толдыразынаң чарытса, амды чааҷы службазына хығыртылған, че ол кізі служба иртер орынзар ызылбаан полза, аның соонда ызылчатхан туста ағаа имнег сыныхтағларын, профессиональнай психология таллағларын хатап иртерге кирек чох полар, iдӧк ол кізі пасха орынзар кӧс парыбысхан полза, аны хығыртарына наа чарадығ аларға iдӧк кирек чох полар.
Ағаа хоза законнаң мындағ оңдай кӧріл парған: чааҷы cлужбазына хығыртардаңар чарадығ алылған кізінің ол чарадығны тохтадыбызарға сылтағлары пар полза, iдӧк кирек полза, «Чааҷы обязаннозынаңар паза чааҷы службазынаңар» федеральнай законнаң кӧрілген пасха чарадығ алардаңар позы чааҷы санында турчатхан чааҷы комиссариадынзар искірер правозы пар. Андағ сылтағларға санирға чарир, кӧзідімге, хазиинҷа хайдағ-да сурығлар, сидікciністер сығысчатханын алай сӧбіреде ікі паза аннаң даа кӧп пала тӧріп парғанын.
Кізінің «Чааҷы обязаннозынаңар паза чааҷы службазынаңар» федеральнай законда кӧзідiлген чарадығлар санынаң пасха чарадығ аларға сылтағ пар полза, ол чааҷы cанында турчатхан муниципальнай пӱдiстің чааҷы комиссариадынзар андағ сылтағлар сых килгеннеңер, чаҷында пазып, сурыныс пічиин пирібiзер правозы пар полча. Аннаң хада сылтағлар парын киречілепчеткен хоза пічіктер пирерге кирек.
Чааҷы командаларын тӧстирінҷе прай мероприятиелер маңнаныстығ апарылзалар, призывниктер Хакасияның чығҷаң пунктынаңар чааҷы службазын иртер орыннарзар 10 хосхардаң ызылып пастирлар.
Прай призывниктер Россия Федерациязының чирінде тӧреміл орныхчатхан Тирігліг кӱстерінің паза даа пасха чааҷы пірігістерінің чааҷы частьтарының пункттарынзар чааҷы службазын иртерге ызыларлар.
80 азыра кізі ӱгредіг пірігicтерінзер паза чааҷы частьтарынзар ызылар, анда олар пис айға теере амғы наа чаа техниказынаң тузаланарға ӱгренерлер, чааҷының санға турыбысчаң специальнозын аларлар. Ӱгредігні тоозып, олар ӱгредии хоостыра войсколарзар ызыларлар.
Хозылчатхан чиит призывниктер служба иртер орыннарзар ӧӧнiнде кии паза тимір чол транспортынаң апарыларлар.
Алынҷа таныхтирға кирек, чааҷы cлужбазының тузы алыспинча – пір чыл. Хығыртығҷа чааҷы cлужбазын иртчеткен чааҷылар ӧнетін чаа операциязының пӧгіннерін толдырарында аралазарға ызылбастар. Кемнің служба тузы пу часхыда тоозылар, олар тузында службадаң позыдыларлар паза иблерінзер ызыларлар.
Чааҷы cлужбазына хығыртығҷа парарға тимненчеткен кізілерні амды Россияның ДОСААФ-ының ӱгредіг организацияларында ӧӧнінде водитель профильінің специальностьтарынҷа тимнепчелер. Iдӧк пілерге кирек, андағ ӱгредіг федеральнай бюджеттің ахчазына апарылча, призывниктер анда тикке ӱгренчелер.
Хакасияның чааҷы комиссариадының кізілерні чааҷы службазына тимнирінҷе паза хығыртарынҷа пӧлиинің специалисттері кізілерні чааҷы cлужбазына хығыртарынаң палғалыстығ сурығларҷа чарыдығлығ тоғыс апарарлар «ізіг линияҷа» кӱннің сай тоғынҷаң кӱннерде 8.00 – 17.00 частарда пу телефонҷа 8(3902)34-13-08.
Сом Дмитрий Сунчугашевти
СӦС CОО: Хакасиядаң хығыртығҷа чааҷы службазына парған призывниктер Россияның Тирігліг кӱстерінің аймах войсколарында, чааҷы частьтарында служба иртчелер. Iди пістің ооллар Чаа-талай флодында, Кии-хан тигір кӱстерінде, Стратегия кӧстегліг ракета войсколарында, піреезіне Кремльдегі полкта даа служба апарарға ӱлӱс тӱсче. Ӱгредии пар призывниктер ӱгредіг роталарынзар хығыртылчалар, спортта пӧзік чидігліглер – спорт роталарынзар. Iдӧк национальнай гвардия войсколарынзар илееде кізі ызылча. Амғы туста войсколарда пилот чох аппараттарның операторлары киректелчелер, оларны ДОСААФ-та тимнезелер, чахсы поларҷых.
Автор :
Николай Султреков
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
