Ікі чыл пазынаң тоғазарбыс...
08.04.2026
Хабарлар
Фестивальда араласхан ӧмелер араласчылары
Ынағ чон – кӱстіг хазна. Н.Ф.Катановтың адынаң Хакас национальнай гимназияда «Ынархас чоллары» регионнар аразындағы XIII фестиваль пайрамни чабылған
Аймах чоннарны піріктірчеткен фестиваль Хакас гимназияда ӱс кӱн ирткен. Аның араласчылары аймах номинацияларда устарынаң сынасханнар. 5 регионнаң ааллап килген олғаннар хакас культуразынаң хынып танысханнар, постарының культуразын, кибірлерін прайзына кӧзіткеннер.
Фестиваль пайрамни чабылчатханда, олғаннарның чарых омалары, оларның «кӧйчеткен» харахтары «Ынархас чоллары» хынығ ирт парғанын киречілеен.
Хакас гимназияның улуғ залы, чарых ӧңніг кип-азахтығ олғаннар кӧп чыыл парғанда, часхыда чахайахтанчатхан чазаа тӧӧй полған. Миннең ырах нимес тува чонының палалары одырчатханнар, ниме-де матап ӱзӱр парчатханнар. Мин ол чалахай кӧңніліг олғаннарнаң чоохтазып аларға чаратхам.
Таныхтирға кирек, пӱӱл Тувадаң иң кӧп араласчы полған. Хонҷых республиканың олғаннары аймах ааллардаң килгеннер, ол санда Сосновка аалдағы 14 оол-хыс.
– Пістің аалдағы ортымах школаның ӱгренҷілері «Ынархас чолларында» сыбыра араласчалар. Олар хынчалар, пеер киліп, мында пасха олғаннарнаң танызарға. Пӱӱл олар, фестивальның наука-практикалығ конференциязында, кӧзідігде, мода кӧзідиинде аралазып, сыйыхтығ орыннар алғаннар, – теен делегацияның араласчызы Шеннеги Ондар.
Шеннеги Владимировна, ӱгретчі тоғызын пу наада ла пастап, фестивальға iдӧк пастағызын на килтір. Мында прай ниме аның кӧңніне кіртір. Олғаннар, танызып, ынағласчатханы аны хайхаттыр. Тувадаң килген ӱгретчі ӱс кӱн уғаа табырах ирт парған тіп таныхтаан.
Тува Республикадағы Бай-Хаак аалдаң даа илееде пала фестивальға кил партыр. Оларның хай піреезі пу пайрамда пастағызын на нимес араласча. Чаланга Андара аймах чоннарны піріктірчеткен фестивальға ікінҷі хати килтір. Аның алнында ағаа 2024 чылда пеер кил парарға ӱлӱс тӱстір.
– Мин пӱӱл пу фестивальда ікінҷі хати араластым. Чазырбин чоохтаза, 2024 чылда пеер пастағызын на килгенде, фестивальның полған на кӱні минің чӱреемде тирең іс артысхан. Аннаңар мин пеер хынып айланғам. Гимназияның волонтёрлары чахсы хабасханнар. Олар піснең чағын полғаннар. Мин оларға аның ӱчӱн алғызымны читірчем, – чоохтаан хыс.
Мин аалҷыларнаң чоохтасчатхан аразында сценада хайыныс пасталыбысхан. Пайрамны апарчатханнар, сценазар сығып, ӱс кӱннiң салтарларын чыылған чонға искіргеннер. Паза аймах номинацияларда сыйыхтығ орыннарға турысхан араласчыларға дипломнар читірілген.
Анаң Тувадаң килген делегацияның араласчылары чыылған улусха хайхастығ мода кӧзіткеннер. Пос чонының сіліг кип-азаан кис салған оол-хыстар, сценада сіліг пас чӧріп, прайзының хайиин тартханнар. Чыылған чон, олғаннарға матап айа саап, харахтарын сценадаң ал полбинчатхан.
Артыхтарның артыхтары санында пол парған олғаннарға сыйыхтарны Хакас национальнай гимназияның директоры Лилия Ахпашева паза «Россия чоннарының ассамблеязы» хазна халых пірігізінің Хакасиядағы пӧлиинің кнезі Любовь Аёшина читіргеннер.
– Мындағ морсымнығ, сіліг мода театры чоннар аразындағы синде аралазарға кирек, – теен Лилия Олеговна, мода театрын кӧзіткен олғаннарзар айланып. – Ӱс кӱн пір дее пілдіртпин ирт парды. Пӱӱн, фестивальны чаап, мин олғаннарға амды сірер наа чолҷа парарзар тіп чоохтирға сағынчам. Наа арғыстар таап алып, оларны тастабин, ынархас чолынҷа парыңар. Наа таныстар сірерге наа чоллар ассыннар.
Любовь Аёшина, фестивальның араласчыларына сыйыхтар читіріп, полған на номер нимезі ӱчӱн аның кӧңніне кіргенін чарытхан паза фестивальның араласчыларына хомзынмасха чӧп пирген:
– Олғаннар, арса, сірернің піреезі соонаң Хакасияда чуртирға сағыныбызар. Пістің республикада аймах чоннар чуртапча. Оларның полғанының на пос диаспоразы пар. Анда олар пос чонының культуразынаң чиит тӧлні таныстырчалар. Паза чоохтирға сағынчам, піс сірернең анымҷохтаспинчабыс, 2028 чылда хатабох тоғазарбыс.
Фестивальны чапхан Хызылчар крайындағы Кодинск городтаң килген делегацияның араласчызы Олеся Редько. Кодинск – Хызылчар крайының алтынзархы чирінде орныхчатхан город. Соох чирде чуртапчатхан олғаннар «Ынархас чолларында» пастағызын на араластылар. Оларның сағызында пу фестиваль ідӧк ӱрге халар тіп таныхтааннар палалар.
– Пістің город мындағ чахсы, чылығ фестивальда пастағызын на араласты. Мында уғаа чылығ удурлааннар. Кӧп ниме хайхатхан. Полған на араласчы тӧреен чир-сууна хынызын чахсы кӧзіт пирген. Че олох туста прайзы пір хазна полчатханыбысты таныхтаан. Мында пір сӧбіре полып чуртаабыс. Анзы уламох пісті чағыннатхан. Мин 18 чыл культурада тоғын салғам. Амды школада тоғын парчам. Пастағызын на мындағ килкім мероприятиеде араластым. Ол минің сағызымда тирең іс артызар. Сағынчам, ағылған алты паланың прайзының даа андағ сағыстар полар, – теен Кодинск городтың делегациязының араласчызы Олеся Редько.
Сом Хакас гимназияни
Автор :
Ольга Томочакова
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
