Хакасияда отрасль ізестіг ӧзіс кӧзітче
07.04.2026
Хабарлар
Хакасия пазы Валентин Коновалов Хызылчардағы чыылығда
Чыылығ. Сибирь регионнары істіндегі туризмні пірге тилітчелер
Сибирь регионнарында істіндегі туризмні тилідері, туристтернің хайиин тартары паза туризм объекттерінзер транспорттығ читчең оңдайлар тӧстирі. Хызылчарда ирткен улуғ чоохтазығда пу сурығлар ӧӧні полғаннар. Мында, Кимдегі «Россия» национальнай кінде, Анатолий Серышевтің устаанынаң Россия президентінің Сибирьдегі федеральнай округтағы полномочиеліг кізізіндегі Чӧптің піріктірілген чыылии ирткен.
Хакасия пазы Валентин Коновалов округ губернаторларынаң, Россияның экономика тилізі министерствозының, бизнес кізілерінең паза закон сығарҷаң чӧптернің устағҷыларынаң хада пу чыылығда кӧдірілген сурығларны ӱзӱрерінде араласхан.
Кӱн суриинзар транспорттығ читчең оңдайларны чахсыландырҷаң, кӧлекте полған туризм бизнезін закон хоостыра тоғынарға кӧӧктірҷең, инвестициялар кирҷең паза кадрларны тимнеҷең сурығлар кірген.
Анатолий Серышев, чыылығны азып, Сибирьдегі федеральнай округтың экономиказына туризм отрасльы ӧӧн тиліс кӧстеглерінің пірсі полчатханын таныхтаан. Туристтернің хайиин тартарына прай оңдайлар пар: хайхастығ тархын орыннары паза сіліг чир-чайаан, паза ӧӧні – аалҷыларны удурлап полчатхан кізілер.
Ол ідӧк туризмні тилідерінҷе тиксі тоғыс апарарға, туризм объекттерінзер читчең чолларны паза килістіре инфраструктураны азынада сағынарға киректелчеткенін таныхтаан.
Хакасияда туризм иң чахсы тиліпчеткен отрасльларның пірсі полча, ол ізестіг ӧзіс кӧзітче. Валентин Коновалов аны 2019 чылдох республиканы тилітчең паза экономиканы алыстырҷаң ӧӧн кӧстеглер санына кир салған.
Пу чыллар аразына Хакасия правительствозы туризм отрасльына хабазарына паза аны ӧскіреріне кӧп кӱс салған. Инфраструктура тиліпче, транспорттығ читчең оңдайлар ӧскірілче, туризм объекттері иптелче паза наалар азылча, инвестициялар ӧткін кирілче.
Республика бюджедінең ахча позыдары 6 чыл аразына 15 хати ӧс парған, 2017 чылнаң тиңнестірзе – ӧзіс 25 хати (9,4 миллион салковайдаң 232,3 миллион салковайға теере).
Туризм индустриязында тоғынчатхан пірігістернің паза идінҷектернің саны ӧсче. Пӱӱнгі кӱнде олар пір муң чарым артиинаң. Пір чылға 64-ке кӧп пол парған.
Гранттығ хабазығ оңдайлары чыл сай ӧскірілче. 2025 чылда туризм сферазындағы бизнес-проекттерге иң кӧп ахча позыдылған – 103 миллион салковай артиинаң.
Регионға хайығ чылдаң чылға ӧсче, республиказар ааллап килчеткен туристтер саны ӧскені кӧрінче. 2025 чылда Хакасия пу кӧзідімҷе Сибирьде пастағы орынға сых парған.
Республика бюджедінзер туризм отрасльы предприятиелерінең налог ахчазы чахсы кірче: 2025 чылда, алындағы чылнаң тиңнестірзе, пір ӱзінҷі чардыхха кӧп кірген.
Ӧзісті киречілепчеткен паза пір кӧзідім – туризм сферазында пирілчеткен тӧлегліг полызығлар сині ӧсчеткені. Пір чылға – 12 %-ке кӧп.
Пу чылға планнарда – наа объекттер азары. Ол Пии аймаандағы Сойан-Сус ГЭС-таң ырах нимес «Хара хус уйазы» кӧрҷең площадка паза Шира аймаандағы Хакасиядағы пастағы «Алтын музейі».
Ідӧк «Ӧбекелер чолы» турист-экскурсия комплексін иптирі узарадылар. Анда глемпингтер, ол санда кинек кізілерге киліcтіре полчатханнар, турғызылар.
Аннаң пасха, пазағы чылда республиканың аалҷыларны хондырҷаң номерлер чыындызын 115-ке ӧскірібізері кӧрілче.
2027 чылда Таштып аймаанда «Мурты» тынағ базазы азылар тіп кӧрілче. Ол прай планнарның иң асхынах чардығы ла.
Сом r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
