Республикада ӧрттердең тоғыр режим кирілче
03.04.2026
Хабарлар
Владимир Карамашев паза Дмитрий Бученик чыылығ тузында
Комиссия чыылии. Хакасияның сағыбаан саайлар полдыртпазынҷа паза оларның салтарларын чох идерінҷе, iдӧк ӧрттердең хорғыс полдыртпазынҷа комиссия чыылии ирткен
Чыылығның тоғызын Хакасия пазының орынҷызы Дмитрий Бученик апарған. Хайди ол таныхтаан, мероприятиенің кӱн суриина суғлар чайылар паза ӧрттер сығызарынаң хорғыстығ тустарға, iдӧк сағыбаан саайлар полдыртпазына паза оларның салтарларын чох идеріне, чонға ӧрттердең хорғыс полдыртпазына тимненер сурығлар сығарылча. Iдӧк республикада ӧрттердең тоғыр режимні кирердеңер чарадығ алылар.
Хакасияның гидрометеорологияҷа паза ибіркіні кӧрерiнҷе кінiнің пастығы Татьяна Иванованың чооғынаң, республикада чағынғы туста хайдағ кӱннер турары пылтырғы олох тустаң тың алыспас. Амды суғларда пус табырах хайылча, тайға-тағларда хар сині хызырылча. Пу айның пастағы кӱннерінде кии кӱнӧрте 9 – 12 градусха теере чылир, хараазын 0–5 градус соох полар. Соонзар кии илееде чылып парыбызар, аннаңар суғлар чайыларынаң хорғыс кӧдірілер.
Республиканы суғлар чайыларынаң арачылир гидротехническай пӱдіріглер часхыда суғлар чайыларына хайди тимненчеткеннеңер искірген Хакасияның инженернай арачыланыстар устааның пастығы Сергей Широбоков. Аның чооғынаң, республикадағы гидротехническай пӱдіріглер тыхталчалар, iди Асхыс аймаанда пис дамба тыхталча, Таштып аймаанда – ӱс. Абазазар суғ синін хызырарға наа насостар хоза ызылғаннар, андар тоғынарға пір бригада ызылған. Суғ синін андағы орыннарда 10 кізі сыныхтағда тутча, хоза 20 кізі ызылар. Техника паза насостар тоғынарға тимделер.
Хакасияның ГО, ЧС паза ПБ хазна комитеді кнезінің орынҷызы Роман Потаповтың искіриинең, республикада пӱӱл 425 ӧрт ӱзірілген, чазыларда – 68. Иң кӧп ӧрттер сығысчалар Ағбан паза Харатас городтарда. Республикада ӧрттердең тоғыр режим пӱӱл тӧрт хосхардаң 11 сілкерге теере кирілче. Че анда ам даа алызығлар поларға айабас. Iди алынҷа аймахтар хайдағ орыннарда орныхчатханын санға алза, пірее аймахтарда режим сала орай кирілер, кӧзідімге, 8 хосхардаң сығара. Ӧрттердең тоғыр режим тоғынчатхан туста аны сайбаан кізілер административнай паза уголовнай даа нандырыға тартыларлар.
Республиканың чурт-коммунальнай хоных паза энергетика министрінің тоғызын толдырчатхан Анатолий Безлепкин Хакасиядағы иргілен парған чарытхы сетьтерінеңер чоохтаан. Хайди ол таныхтаан, хазыр чил полза, ааллардағы иргілен парған чарытхы сетьтерінің тоғызын муниципальнай пӱдістер азынада тохтат салчадарға кирек полар. Хайдағ хомай кӱн поларын олар постары азынада піліп аларға киректер.
«Россияның тимір чоллары» ОАО-ның пӧлии полчатхан Хызылчар тимір чолының Ағбандағы устааның региондағы инфраструктура дирекциязы пастығының орынҷызы Дмитрий Михно, Хакасиядағы тимір чоллар хыриндағы оттығ ӧзімнерні арығлап, ӧрттердең тоғыр мероприятиелер хайди толдырылчатханнаңар искірген. Аның чооғынаң, тимір чоллар хыриндағы ағастар узурылғаннар, узуны 1756 километр ӧрт иртірбес чоллар тартылары кӧрілче. Iдӧк андағы пӧзік от сабыл парар.
«Хакасский» заповедниктің чирлерін хадағда тударынҷа директорының орынҷызы Александр Черногор заповедник пӱӱлгі ӧрттер сығызарынаң хорғыстығ тусха хайди тимненчеткеннеңер чоохтаан. Хайди ол искірген, заповедникте оперативнай штаб тӧстелген, тоғынҷыларға инструктаж пирілче, оларны ӧрттердең тоғыр кӱрезерге ӱгретчелер, ӧрт иртірбес чоллар тартылчалар. Амды ӧрттердең тоғыр кӱрезіг апарарына 40 кізі тимненіс ирткен.
Чыылығда iдӧк, чоох тудып, тузалығ чӧптер пиргеннер МЧС-тың Хакасияҷа Ӧӧн устааның пастығы Александр Мулл паза аның гражданскай арачыланысча паза чонны арачылирынҷа орынҷызы Алексей Максименко. Хайди Александр Мулл таныхтаан, муниципалитеттерге мының алнында читпестерні тӱзедерге пирілген предписаниелер хайди толдырылчатханын сыныхтабызарға кирек. Iди чуртағҷыларнаң профилактика тоғызын апарарын узарадарына патрульлар, маневреннай ӧмелер чӧргізерге кирек. Алексей Максименконың чооғынаң, часхыда сығысчатхан хорғыстарға Абаза ла чахсы тимде, Асхыс аймаа тимде нимес, пасха аймахтар толдыразынаң тимде ниместер.
lдӧк чыылығда республиканың прай аймахтарының устағҷылары суғлар чайыларына паза ӧрттер сығызар тусха хайди тимненчеткеннеңер сан пиріс тутханнар.
Дмитрий Бученик, чыылығның тоғызын тоозып, суғларда пус чара чачырадылғаннаңар искірген паза часхыда прайзына сығызар хорғыстарға тимде поларға алғаан.
Хакасия пазы Валентин Коновалов суғлар чайыларынаң паза ӧрттер сығызарынаң хорғыстығ тустарға тимненер сурығҷа правительство кiзiлерiнең паза муниципалитеттер устағҷыларынаң хоза чыылығ иртiрген. Анда постарының сфераларында тимненiс тоғыстары хайди апарылчатханнаңар искiргеннер Хакасияның ГО, ЧС паза ПБ хазна комитедiнiң кнезi Владимир Карамашев, чир-чайаан ис-пайы паза экология министрiнiң тоғызын толдырчатхан Татьяна Брагина, ағас хонии министрi Олег Матвиенко паза ЖКХ паза энергетика министрiнiң тоғызын толдырчатхан Анатолий Безлепкин.
– Прайзы сығызар хорғыстарға тимде полыңар. Чағынғы туста уғаа чылығ кӱннер турыбызары кӧрiлче. Сығысчатхан читпестернi табырах тӱзет салыңар. Ӧрт иртiрбес чолларны нааҷылап салыңар, сӧп-сапты, хуруғ ӧзiмнернi арығлап турыңар, часхыны иптеп иртiрiбiзерге кирек, – теен Хакасия пазы.
Сом Дмитрий Сунчугашевти
Автор :
Николай Султреков
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
