Валентин Коновалов: «Пу пастағ Хакасияа уғаа кирек»
03.04.2026
Хабарлар
«Долина Менделеева» чыындының попечительлер чӧбінің чыылии
Тоғыс чорығы. Хакасия пазы, пу неделяда Москвада полып, «Долина Менделеева» наука-техника кінін тилітчең чыындының попечительлер чӧбі тоғызында араласхан
Халғанҷы туста Ангара-Ким макрорегионында ӧңніг паза арам учурапчатхан тимірлернең тирең тоғынҷаң кластер тӧстирінҷе килкім проектті чуртасха кирері ӧткін ӱзӱрілче. Москвада ол сурығны ситкіп ӱзӱреріне чарыдылған алғым чыылығ ирткен. Хакасия пазы Валентин Коновалов, пу неделяда хазнаның ӧӧн городында полып, ол чыылығның тоғызында араласхан.
1 хосхарда Россияның правительство кнезінің пастағы орынҷызы Денис Мантуровтың устаанынаң «Долина Менделеева» наука-техника кінін тилітчең чыындының попечительлер чӧбінің чыылии ирткен. Ол Ангара-Кимдегі кластернің наука-техникалығ ӧӧн чардығы полча.
Регион пазы паза чыындының попечительлер чӧбінзер кірчеткен пасха устағҷылар кластерні тилітчең стратегия проектін, кирек пічіктерні тимнир сурығларны ситкіп ӱзӱрібіскеннер, постың чӧптерін пиргеннер.
– Пу пастағ Хакасияа уғаа кирек. Ол социальнай паза ниме-ноо сығарызы инфраструктуразын тилідерге, тоғыс орыннарын тӧстирге, республика бюджедінзер кірчеткен парыстарны ӧскірерге оңдай пирер, – пас салған Валентин Коновалов социальнай сетьтердегі позының страницаларында, «Долина Менделеева» чыындының попечительлер чӧбі чыылииның салтарлары хоостыра.
Аның алнында регион устағҷызы пір ле хати нимес пу проекттің улуғ тузазын таныхтаан. Аның концепциязы Хакасияның Тиліс стратегиязына, хайзы экономиканы алыстырарына, промышленность сығарызы пӱдізін кӧӧлҷе пӧзік технологиялығ отрасльларға айландырарына паза сырьёнаң палғалыстығ поларын хызырарына кӧстелген, толдыразынаң килістіре полча.
Таныхтирға кирек, пу проектке, Хакасиядаң пасха, Хызылчар крайы, Иркутск облазы паза Тува кір парғаннар. Аны чуртасха кирері 2041 чылға теере кӧріл парған. Толдыра тоғыстығ кластер – ӧңніг паза арам учурапчатхан тимірлерні анирынаң паза оларнаң тирең тоғынарынаң пасти инновациялығ продукция сығарарына теере – промышленностьты, науканы паза ӱгредігні піріктірер. Андар предприятиелер паза наука институттары кірер. Ол инновациялығ технологияларны тилідеріне оңдай пирер, салтарында тың киректелчеткен тимірлернең тирең тоғынҷаң объекттер азылар.
Хакасияда проектті Саяногорск город хыринда алынҷа экономика орнын тилідері хоостыра чуртасха кирері кӧрілче.
Сом r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
