Полған на хан тамҷығы тузалығ полча
31.03.2026
Хабарлар
Чиит донор Станислав Казагашев
Сыйыхтас. 27 кӧрiкте республиканың хан кiнiнде, пайрамнығ мероприятие иртiрiп, пу наада «Аарластығ донор» атха турысхан кiзiлернi сыйыхтааннар
Хакасияда амды «Аарластығ донор» ат пирiлген чуртағҷылар саны пу кӱнде 18 кiзее кӧп пол парды. Ирткен неделяда оларны республиканың хан кiнiнде «Аарластығ донор» кӧксiне хазанҷаң танығ паза удостоверение читiрiп, чеестееннер. Iдӧк донорлар чӧрiмiнiң араласчыларын Россиядағы «Хызыл Крест» полызығ организациязы сыйиинаң таныхтааннар.
Хан кiнiнзер чыылысхан донорларны, чылығ сӧстер читiрiп, алғыстаан хан кiнiнiң ӧӧн имҷiзi Геннадий Русаков. Ол чооғында таныхтаан:
– Донорство – чонға туза ағылчатхан аарластығ кирек. Пу чолға кiрiбiскен кiзiлерге амды постың хазиин хайраллирға, пик хазыхтығ поларға киректелче паза халых чуртаста кирексiнiснең тузаланылчалар. Сiрер позыңарның хан тамҷығынаң муңар кiзi чуртазын ал халчазар. Сiрернiң полызиинаң пiс, ӧнетiн чаа операциязында аралазып, чааҷыларға чиңiстi чағыннадарға хабасчабыс. Пӱӱн аарластығ донорлар ӧмезiне 18 чуртағҷы хозылча, че, хомзынысха, пайрамнығ мероприятиее прайзы кил полбаан. Сiрернi мындағ танығлағ кӱннең алғыстапчам, прайзына пик хазых, чидiглерге чидерге алғапчам. Паза пiстiң кiнзер кил турарға ундубаңар, сiрерге iзиибiс хаҷан даа азых.
Геннадий Николаевич пайрамнығ чыылығда ӧзiм чiлии доноры полчатхан Станислав Кабаевке, Хакасияда донорлар чӧрiмiн тилiдерiнде улуғ хозым итчеткен ӱчӱн, республиканың хазых хайраллаҷаң министерствозының алғыстас пiчиин читiрген. Паза Станислав Олегович Федеральнай имнег-биология агентствозының аарластығ таниинаң сыйыхтатхан – «Донорлар чӧрiмiне хабасчатхан ӱчӱн» медальнаң. Анаң хан кiнiнiң устағҷызы, «Аарластығ донор» кӧксiне хазанҷаң танығны паза удостоверениенi читiрiп, 12 кiзiнi сыйыхтаан.
Iдӧк пу танығлығ кӱнде чеестееннер донорлар чӧрiмнерiнiң араласчыларын. Оларны кiннiң имҷi-трансфузиологы Ирина Майорова Россиядағы «Хызыл Крест» полызығ организациязының адынаң алғыстаан. «Хызыл Кресттiң» танығлығ сыйиина турызып, пис кiзi «Тӧремiл донорство ӱчӱн» танығнаң таныхтатхан. Ирина Майорова iдӧк «Хызыл Крест» иртiрчеткен чӧрiмнiң чиит араласчыларын алғыстаан. «IT-донор» танығ 10 оол-хысха читiрiлген. «Тӧремiл донорство ӱчӱн» танығны алғаннарның санында Александр Топоев паза Станислав Казагашев полғаннар. Александр Владимирович «Абаканвагонмаш» предприятиеде штамповщик полып тоғынча. Станислав Анатольевич позына тоғыс таапчатхан кiзi полча. Аймах-пасха профессиялығ кiзiлернi чонға уғаа тузалығ полчатхан донорлар чӧрiмi пiрiктiрче.
– Мин пастағы хати ханны национальнай гимназияда, улуғ класстарда ӱгренчеткенде, пиргем. Кемге-де хан киректелгенде, пiстi, ӱгренҷiлернi, хан пирерге хығырғаннар. Iди 2006 чылда донор поларға килiс парған. Анаң пис чыл пазынаң пазох хан пир сыххам. Андада сағын салғам, хан пирiп, ноға донор полыбыспасха. Хан пирген соонаң хазиима хаҷан даа хомай полбинча, прай ниме чахсы иртiс парча. Мин ам ханымны тиксi 38 хати пир салдым, пу чыл чайғыда мағаа «Аарластығ донор» ат пирiлерге кирек. Пӱӱн, тiзең, донорлар чӧрiмiнiң араласчызы полып, iкi чыл аразына ханны 10 хати пир салған ӱчӱн «Хызыл Кресттiң» танығлығ сыйиинаң сыйладылар. Итсе-де, пу танығ мағаа пылтыр пирiлерге кирек полған, че андада кирек имҷi ағырыбысхан сылтаанда пiчiктер тимнебин салғаннар, – чоохтаан Ағбан чуртағҷызы Станислав Анатольевич.
Александр Владимирович 1992 чылдаң донор пол парир. Хайди ол чоохтапча, хан алҷаң станцияның имнег тоғынҷылары организацияларзар хан аларға кил парҷаңнар. Хаҷан олар аның тоғызынзар хати кил парғаннарында, пу уғаа улуғ полызығ полча, кiзiлернi ал халарға полысча тiп чоохтааннарында, чиит тоғынҷы ханын пирерге чӧр сыххан. Ол чылда ханын сыбыра пис хати пир турча. Пу кӱнге теере тиксi 144 хати пир салған. Ол «Аарластығ донор» атха 2003 чылда турысхан.
– Пӱӱн минi, донорлар чӧрiмнерiнде араласчатхан ӱчӱн, iдӧк «100 донация ӱчӱн» знакнаң таныхтадылар. Мындағ чӧрiмнер кирек тiп санапчам. Олар кiзiлернi хан пирерге кӧстепчелер. Пу тузалығ кирек полча тiп, туған-чағыннарыма даа чоохтап, донор поларға кӧӧктiрчем, че олар ноға-да хан пирерге килбинчелер. Мин донор поларға сағынчатхан улусха чӧп пирерҷiкпiн, хан пирерге хорыхпаңар, кiнзер хан пирерге килiңер. Iди кiзiлерге дее полысчазың паза позыңның хазииң даа чахсыланча, хан нааҷылал турча нооза. Ханны 10 хати пир салзаң, ханың прай алыс парча. Мин сизiнчем, хан пирiбiскен соонаң хазиима туза полча. Мының алнында минiң ханым пӧзiк полҷаң, пурнымнаң ах килҷең. Ам андағ ниме чоғыл, хан давлениезiнең паза ирееленминчем. Мин 56 частығбын, улуғланып одырзам даа, че ит-ханым кирiпче тiп сизiнминчем. Донор полып, кӱстiг азыранарға кӱстенчезiң, тамкаа паза iскее тартыларға чарабас. Мында пасха кiзiлернiң хазиинаңар сағыссырирға килiсче нооза – донор ханы чахсы, кӱстiг поларға кирек. Хаҷан пасхазына полызып, «Аарластығ донор» ат пирiлгенде, поғдархас толча. Чонға туза ағылчатхан ӱчӱн ӧрiнчем. Ханны 40 хати пир салзаң, тиксi 20 литр хан пиргенiне тиңнелче, андада сағынчазың, iди нинҷе кiзее полыс пиргезiң, нинҷе кiзiнiң чуртазын ал халғазың. Анзы сині ханны аннаң андар пир турарға кӧстепче, – теен Александр Топоев.
Паза танығлығ кӱнде прай донорларны мероприятиенiң сыбыра спонсоры полчатхан «Малинники» кафе-кондитерскай организацияның тадылығ сыйыхтарынаң сыйлааннар. Тоғазығның халғанҷызынзар донорлар флешмобта араласханнар. Хакасия пу кӱнде, «Чуртасты ал хал» регистр санына кiрiп, «Сила донорства – в единстве» тиксi Россиядағы чӧрiмге хозылған. Аннаңар донорларға видеороликте суурынарға киректелген. Пурун прайзы пiр орынға чыылызып, турып алғаннар. Анаң хан кiнiнiң имҷi-трансфузиологы Ирина Майорова республика «Сила донорства – в единстве» чӧрiмге хозылча тiп тыыда чарлаанда, прайзы пiр ӱннең искiрген: «Чуртасты ал хал» регистрге кiрiп ал».
Донорлар пу кӱннiң матырлары полчалар, хан пирiп, пасхазына полызарға кирек тiп андағ чахсы кирекке тартылчалар. Хакасияның хазых хайраллаҷаң министерствозы танығларынаң, республикада «Аарластығ донор» атха тиксi 2342 чуртағҷы турысхан, ол санда Ағбандағы 810 чуртағҷы. 855 кiзi чiлiң донорларының федеральнай регистрiне кирiл парған. «Аарластығ донор» атха турысчалар ханын 40 азыра алай хан плазмазын 60 хати пирген донорлар.
Сом Илона Каковани
Автор :
Инора Боргоякова
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
