Пӱдіріглер тузында тимге сығарлар
01.04.2026
Хабарлар
Хакасияның устағ-пастаа наа пӱдірігні кӧрче
Тоғыс чорығы. Хакасия пазы Валентин Коновалов Боград аймаанда пол килген. Анда «Аалларның тиксi тилiзi» хазна программазынҷа ікі объект пӱдірілче
Пiстің республика нацпроекттерде, хазна программаларында аралазарға кӱс. Олар наа пӱдіріглер чуртасха кирерге, тиксі тыхтағ тоғыстарын иртірерге, инфраструктураны нааҷылирға оңдай пирчелер. Хысхаҷах тус аразына Хакасияда аймах пӱдіріглер тимге сыхханнар. Олардаң ас нимес объект «Аалларның тиксi тилiзi» (КРСТ) хазна программазынҷа пӱдірілген. Программаның ӧӧн пӧгіні – аалдағыларға истіг чуртас оңдайларын тӧстирі. Хакасияда аның ӱчӱн республиканың аал хонии паза ас-тамах министерствозы нандырча. Поғдархаҷаң ниме пар. Ведомствоның пресс-службазының искіриинең, 2020 – 2024 чылларда программаҷа ӱгредіг киреене ле кӧрілген 25 объект пӱдірілген паза нааҷылалған. Ағаа хоза, пылтыр Таштып аймаандағы Арбыт аалда нап-наа школа ізиин асхан, Хубачарда (Алтай аймаа) – олған сады. Ідӧк Боградта тиксі тыхтағ тоғыстары соонда «Кӱнiҷек» олған сады тоғынып пастады. КРСТ-тың «Чурт» кӧстее улуғ кирексіністiг. Аны хоостыра Хакасияда 2020 – 2024 чылларда 1,5 муң сӧбіре чурт оңдайларын чахсыландырып алған.
Амғы туста Боградта «Аалларның тиксi тилiзi» хазна программазынҷа ікі объект пӱдірілче: cуғны арығлап ағысчаң ӧӧн cистема (КОС) паза кӧп кӧстеглiг спортзал. 30 кӧрікте пӱдіріглерде Хакасия пазы Валентин Коновалов сыныхтағ пӧгіннең пол килген. КОС-та улуғ пастыхты аал хонии министрі Сергей Труфанов, чурт-коммунальнай хоных паза энергетика министрі Максим Виноградов паза Боград аймааның пазы Сергей Чернышов удурлааннар. Устағҷыларның таниинаң, пӱӱнгі кӱнде cуғны арығлап ағысчаң ӧӧн cистема 82 процентке тимде. Арығлаҷаң оборудованиенің 13 блок модульы паза ікі насос станциязы турғызылған, ікі ӧрт ӱзiрҷең резервуар пӱдірілген, суғ трубалары тартылғаннар. Суғ трубаларының тиксі узуны – 668 метр. Хосхар айында пӱдірігҷілер cуғны арығлап ағысчаң ӧӧн cистеманы панельлернең чабызарлар, сілкер айында КОС-тың ибіркізін иптирлер. Боградта хар толдыразынаң хайылғалах. Объект орныхчатхан орында палғас полған, анда ниикке чӧрҷең машиналар даа патчатханнар. КОС-ты пӱдіреріне 508 миллион салковай кӧрілген. Ол пӱӱл ӱртӱн айында тоғынып пастир.
Суғны арығлап ағысчаң ӧӧн cистемада тоғыстар хыызында парча
Анаң Валентин Коновалов кӧп кӧстеглiг спортзалзар чол тутхан. Таныхтирға кирек, пасха муниципалитеттернең тиңнестірзе, Боград аймаанда спорт инфраструктуразынаң киректер уйан арах. Бородино аалда ла спорткомплекс пар. Алында Боградта паза Улуғ Чорбада спорткомплекстер полған, че олар чабыл парғаннар. Аннаңар пылтыр хосхар айында аймахтың кінінде наа спорт объектiн пӱдірер орында ӧрге сабылғанда, чуртағҷыларның ӧрінізі пу чир полбаан. Мында пасха ниме таңнатча. Сидік тее оңдайларда Боград аймаанда гиря кӧдірері, армиядағы хол-азахнаң тудыс паза пауэрлифтинг чахсы тиліпчелер. Анзын орындағы спортсменнернің чидіглері киречілепче. Кӧзідімге, сағам сабланчатхан Даниела Колесник (пауэрлифтинг) Сарығ хас аалдаң. Абахай чир-суғҷыбыс спортта пастағы хаалағларын тӧреен аалында иткен. Никита Полоротов армиядағы хол-азахнаң тудысча 2023 паза 2024 чылларда Россия первенствозында чиңiс тутхан. Никитаның нанҷызы Александр Каур олох марығларда алтын паза кӱмӱс медальлар холға кирген. Амды ооллар Рязаньдағы кии-десант училищезiнде пiлiстерiн алғытчалар. Национальнай спорт кӧрімнерiнің тилізінде боградтағыларның хозымы парох. Орындағы гиревиктер тренер Александр Шипилёвтың устаанынаң хапчаң таста, ағаснаң тартыста, тобитте устарын тӧреміл кӧзітчелер.
Кӧп кӧстеглiг спортзалзар айланза, ол кізі хайиин ырахтынох тартча. Чарых ӧңніг пӱдіріг аалдағы ортымах школа паза стадион хыринда орныхчаттыр. Спортзал пір хадыллығ, аның улии – 736 квадраттығ метр. Потолоктары пӧзік. Мында футбол ла нимес, волейбол, баскетбол ойнирға чарир. Объект 50 процентке тимде. Ӧӧнінде істіндегі тоғыстар халтыр, хайди даа ибіркізін иптирге кирек. Пӱдірігҷілер графиктең сала халчаттырлар, че материалларнаң сидікcініс чоғыл. Спортзалдаң пасха, олар ідӧк воркаут ачығын пӱдірерлер. Хакасия пазы Валентин Коновалов Боград аймааның устағ-пастаана паза подрядчиктерге тоғысты чапчаң арах апарарға чахығ пирген. Пӱӱл ӱртӱн айында олғаннар спортзалда волейбол ойнирға киректер. Хакасияның аал хонии паза ас-тамах министерствозы пресс-службазының таниинаң, спортзалны пӱдіреріне кӧрілген ахчаның сині – 112 миллион салковай.
«Аалларның тиксi тилiзi» хазна программазы хоостыра сағыстарынаң ӱлескен спорт министрі Пётр Макарчук. Пётр Анатольевич чоохтаан:
– Хакасияның саблығ спортсменнерiнің паза тренерлерiнің ӧӧн чардығы – ааллардаң cыххан улус. Позымның тӧреен-ӧскен чирім – Шира аймаандағы Сон пилтірі аал. Пу программа, тізең, аалдағыларның чуртазын чахсыландырарға оңдай пирче. Спортзал хоостыра пӧгіннер кӧп. Мында аймах спорт кӧрімнерiнҷе cекциялар тоғындырарға чарир. Сағынчам, хонҷых ааллардаң пеер кил турарларох. Боградта хайди даа марығлар, спартакиадалар иртір турарбыс. Сынны чоохтаза, объект иң пурун олғаннарға кӧрілген. Палаларның соонҷа паба-іҷелер пеер чӧр сығарына ізенчебіс. Мында наа спорт «чылтыстарының» аттары тамызылар тіп ікінҷілес чоғыл.
Сомнар Дмитрий Сунчугашевти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
