Марығлас оды айланча ба?
27.03.2026
Хабарлар
«Саяны» команда «Ізеніс кубогы» турнир соонда
Меспектіг хоккей. Россия чемпионадының финаллары хайхатханнар паза спорт кӧрімiнің таңдағызына ізеніс пиргеннер
Илееде тус меспектіг хоккей пістің хазнабыстың чуртағҷыларының иң хынчатхан спорт кӧрімі полған. Командаларның кӧбізі 1920 чылларда тӧстелген. Полған на ойынға чон стадионнарға тығырама чыылҷаң. Кӧрігҷілер, соохты соох тібин, командалар ӱчӱн «ағырарға» килҷеңнер. Чуртас орнында турбинча. Наа спорт кӧрімнерi, чуртас оңдайлары чонның сағыс-кӧрізін алыстырғаннар. Че аннаңох улуғ ӱрег меспектіг хоккейге Россияның спорт федерациязының (ФХМР) халғанҷы чыллардағы политиказы ағылған. Кізілер, ойыннарны нимес, меспектіг хоккей ибіре парчатхан хайызығларны ӱзӱрҷеңнер. Сезон тоозылғалах, прайзы чемпионның адын пілче. Андағ ниме хайди полҷаң? Салтарында кӧрігҷілер саны хызырылған, инвесторлар даа пу cпорт кӧрімiнзер ахча позыдарға тың на хынминыбысханнар.
Пылтыр улуғ хырлас айында федерацияның устағ-пастаана наа кізілер табылғаннар. Амды бизнесмен Олег Дерипаска президент полча, пастағы вице-президент – читі хати тилекей чемпионы Евгений Иванушкин. Наа ӧме хазнадағы меспектіг хоккейнің тилізіне кӧстегліг. Анзын Россия чемпионадының азах мееттері киречілееннер. Пӱӱл арға-мӧрійнің финаллары чапсытханнар, хайхатханнар, ӧріндіргеннер. Че аннаңар алғыда.
2025/2026 чылларның cезонында 12 ле хоккей ӧмезі араласханнаңар, федерация хоза «ФХМР-ның кубогын» паза «Ізеніс кубогын» иртірерге чаратхан. Андағ оңдайнаң прай командаларны ӱс ӧмее чарыбысханнар. Чарым финалға таллағны иртiбіскен «СКА-Нефтяник» (Хабаровск), «Динамо» (Москва), «Кузбасс» (Кемеров) паза «Водник» (Архангельск) чиңіс ӱчӱн харбасханнар. «ФХМР-ның кубогы» турнирде 5 – 8-ҷі орыннар ӱчӱн харбазығ парған, «Ізеніс кубогында» – 9 – 12-ҷі орыннар ӱчӱн.
Пістің «Саяны» халғанҷы марығда кӱс сынаан. Оолларыбыс хомай нимес кӧрінгеннер. Командалар удур-тӧдір ікі хати ойнааннар. Салтарында Хакасияның командазы 4 сан тоғынып алған. Пістіңнернің пір чиңіс, пір хайым паза тӧрт утырыс. «Ізеніс кубогында» чир-суғҷыларыбыс ӱзінҷі орынға сыхханнар. Пу марығда командаларның чемпионаттың пастағы чардығындағы чидіглерін санға алғаннаңар, салтарында «Саяны» турнир таблицазында 12-ҷi орында халған.
«ФХМР-ның кубогын» Хызылчар удурлаан. «Енисейге» постың пус чазызында оң полар тіп пірдеезі ікінҷілебеен. Хонҷыхтарыбыс «Стартты» (Нижегородскай область) 10:5 саннаң унада сабысханнар. Че «Уральский трубникті» (Свердловск облазы) чабыра пазыбызарға хызылчардағыларның кӱзі читпиндір. Ойын 4:5 саннаң тоозылған. «Уральский трубник» 5-ҷі орында, «Енисей» 6-ҷы орында, анаң парча «Родина» (Киров), 8-ҷі орынға тӱс парған «Старт». Халғанҷы ӧме чемпионаттың I чардығында 6-ҷы орында парчатхан. Че «ФХМР-ның кубогында» хоккей ӧмелері наанаң ойнааннар.
Халғанҷы ойыннар Хабаровскта ирткеннер. Чемпионатта кем хайдағ орынға сығарын турнир таблицазы хоостыра сизінерге чарир. «СКА-Нефтяник» сезон тооза пастағы орында парған, ікінҷі орынға «Динамо» сыххан, ӱзінҷі орынға – «Кузбасс», тӧртінҷізі «Водник» полған. Пірее ниме алызар ба? «СКА-Нефтяник» пос чазызында ойнапча. Команда финалға пір ле утырыстығ читкен. «Кузбасс» халғанҷы ікі чыл Россия чемпионы ат ал чӧрче. «Водник» – кӱстіг ӧме, че ағаа кӧп сидіксініс тобырарға килісче. Пастап ухаанҷыластар толчатханға тӧӧй пілдіргеннер. 20 кӧрікте кемеровтағылар «Водникнең» хола медаль ӱчӱн харбасханнар, азах меетте «СКА-Нефтяник» паза «Динамо» тоғасханнар. Че пустығ чазыда кирек сағыбаан оңдайнаң парыбысхан. Меспектіг хоккейзер марығлас оды айланған полар чи? Россия чемпионнары архангельсктегілерге 1:3 cаннаң утыр салғаннар. Пастағы таймны «Водник» 2:0 саннаң утып алған, ойынның ікінҷі чардығында ӧмедегілер «Кузбассха» хоза гол кире сабысханнар. Кемеровтағыларның 71-ҷі минутада пір хати нандыр пирерге кӱстері читтір. «Водник» – Россия чемпионадының хола призеры.
«СКА-Нефтяниктің» чиңіc тудар прай оңдайлар полған. Команда сезон тооза айағ пілбинчеткен машина оcхас ойнаан нооза. Азах меет «Ерофей Арена» пустығ ӧргеде ирткен. Хабаровсктағыларның ӱчӱн 10 муң кӧрігҷі «ағырарға» килген. Пастап «СКА-Нефтяник» 2:0 саннаң утчатхан. Пик сындырлығ «Динамо» пос салынмаан. Пастағы тайм 2:2 саннаң тоозылды. Тынағ cоонда ікі ӧмее ойынны наадаң пастирға кирек. Матчтың ікінҷі чардығы аннаңох хазыр парча. 74-ҷі минутада сан 5:5 пол парды. Кем чиңіс тудар ни? Москвадағыларны тут полбассың. «СКА-Нефтяниктің» хаалхазынзар соон сӱрістіре меспектер учухчалар. 90-ҷы минутада сан 6:8 пол парған. «Динамо» онынҷы хати Россияның чемпионы атха турысты! Меспектіг хоккейде кӧнік парғаннар: азах меетті удурлапчатхан команда чиңіc тутча. «Спорт-Экспресс» СМИ-ның таниинаң, халғанҷызын пу кибір 2016 чылда сайбалған. Финал Иркутскта ирткен. Андада «Байкал-Энергия» Хызылчардағы «Енисейге» чиңдір салған.
Хоккеисттер Хабаровскта финалға турыстығ ойын кӧзіт пиргеннер. Кізілер аны амға теере ӱзӱрчелер. Аймах СМИ-ларда сыххан искіріглер киречілепчелер: спортсменнер паза тренерлер меспектіг хоккейнің таңдағызынзар ізеніснең кӧрчелер. Итсе, федерацияа кӧп сурығ пӧгерге килізер. Кӧзідімге, «Водниктең» иң кӱстіг хоккеисттер тарас парирлар. Пӱӱнгі кӱнге ӱс кізі пасха клубтарнаң чӧптезіг идiбіскен. Спорт инфраструктуразы нааҷылас кирексіпче. «Саянызар» айланза, піс команда Суперлигада пазох ойнирына киртінчебіc. Килер сезонда аның ӱчӱн «ағырарға» тимдебіс.
Сом «Волга» клубти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
