Чииттер кiнi азылар
27.03.2026
Хабарлар
Лилия Боргоякова
Сан пирiс. Хакасияның чииттер политиказынҷа паза халых тилiзiнҷе министрнiң тоғызын толдырчатхан Лилия Боргоякова регион пазы Валентин Коноваловха пу чылға пӧгiннердеңер искiрген
Пылтыр хазнада «Чииттер паза палалар» наа нацпроект тоғынып пастаан. Хакасияның чииттер политиказынҷа паза халых тилiзiнҷе министерство аны хоостыра iкi федеральнай проект чуртасха кирче: «Россия – оңдайлар хазназы» паза «Пiс хада». Пу проекттер хоостыра кӧрiл парған мероприятиелер ирткен чылда прай толдырыл парғаннар. Прай 200 азыра мероприятие иртiрiлген, анзы, 2024 чылнаң тиңнестiрзе, iкi хати кӧп.
Ирткен чылда министерство коммерческай нимес организацияларнаң чағын тоғынған. Республиканың тоғынчатхан чииттерi паза чайаачы олғаннары чыл сай Хакасия пазының сыйиина турысчалар. Ирткен чылда марығда аралазардаңар 200 азыра сурыныс пiчии кiрген, артыхтары ахчалығ сыйыхтарға турысханнар. Хакасияның чииттер политиказынҷа паза халых тилiзiнҷе министерство чииттер кӱҷӱрлерге алаахтыртпас ӱчӱн чарыдығлығ тоғыс кӧп апарча.
Пу чылда министерствоның итчең тоғызы iдӧк пар. Танығлығларының cанында – ол Харатаста чииттер кiнi азылары. Амды анда тыхтағ тоғыстары апарылча. Ол иптел парза, республиканың чииттерiне чыылысчаң, чайаачыларын асчаң чахсы орын полар. Аннаң пасха, пӱӱл республикада Хакасияның чииттерiне 20 азыра мероприятие иртiрiлерi кӧрiлче.
Тоғазығда Хакасия пазы Валентин Коновалов республиканың чииттерiне чахсы хабасчатхан ӱчӱн министерство тоғынҷыларына алғызын читiрген паза федеральнай марығларда посты чахсы кӧзiдерге, регионзар хоза ахча тартарға кӱстенерге алғаан.
Сом r-19.ru сайттаң
Автор :
Оксана Котюбеева
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
