Піліcтер паза кӧнігістер кӧп алған
25.03.2026
Хабарлар
«Хакасия матырлары». Пу проект араласчызы республиканың юстиция паза регионда хорғыс полдыртпас киректерҷе министерствозында стажировка иртерін тоос салған
Ӧнетін чаа операциязының араласчызы Цырен Димчиков министерствода тӧрт ай стажировка ирткен. Пу тус аразына Цырен Дамбаевич ведомство тоғызынаң танызып алған мындағ кӧстеглерҷе: республика правительствозының тоғызына право саринаң полызары, мировой чарғыҷыларның тоғызын тимнирі, сайбағлар профилактиказы, коррупциядаң тоғыр кӱрезері.
Стажировка тузында «Хакасия матырлары» проект араласчызы норматив-право базазын ӱгренген, ведомствоның тоғынҷылары істенчеткен системаларнаң танысхан, чыылығларда араласхан паза практика пӧгіннерін толдырған.
– Хакасияның юстиция паза регионда хорғыс полдыртпас киректерҷе министерствозында стажировка чапсых паза тӱзімніг полған. Мин піліcтер паза тузалығ кӧнігістер кӧп алғам, олар мағаа хазна службазында хайди даа полызарлар. Ведомствоның устағ-пастаана паза тоғынҷыларына мині «туған-чағынны» чіли удурлаан, пілістерінең паза опыттарынаң ӱлескен, аймах-пасха сурығларны пӧгерінде хабасхан ӱчӱн улуғ алғызым читірчем. Стажировка тузы тоозыл парған даа полза, піс палғалыс тударын узаратчабыс. Министерство специалисттері мағаа ӱгредігні тоосчаң квалификациялығ тоғысты, ол сайбағлар профилактиказына чарыдылған, тимнирінде методикаҷа паза практикаҷа полысчалар. Ізенчем, проект хоостыра ӱгредігні тӱзімніг иртібізербiн паза посты хазна службазында кӧзідербiн, – сағыс-кӧрізінең ӱлескен Цырен Дамбаевич.
Таныхтирға кирек, Цырен Димчиков полицияның отставкадағы майоры полча. 2024 чылда пос кӧңнінең СВО-ға парған. Ибзер айланғанда, «Хакасия матырлары» кадрларны тимнеҷең проектте аралазарға паза, служба апарып, чир-сууна туза ағыларын узарадарға чаратхан.
Сом r-19.ru сайттаң
Автор :
Виктория Айснер
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
