Часхыда сығысчатхан прай хорғыстарға тимде поларға
20.03.2026
Хабарлар
Селекторҷа чыылығ. Киҷее Хакасия пазы Валентин Коновалов чурт-коммунальнай хоных объекттерi соохтарны хайди иртчеткен, iдӧк ӧрттер сығызарынаң паза суғлар чайыларынаң хорғыстығ тусты иртiрерiне тимненiс хайди апарылчатхан сурығларҷа чыылығ иртiрген
Хакасияның чурт-коммунальнай хоных паза энергетика министрi Максим Виноградов пу сферадағы объекттер соохтарны хайди иртчеткен сурығҷа чоох тутхан. Хайди ол искiрген, пӱӱл республиканың ЖКХ объекттерiнде 123 сайбағ таныхталған, оларның 28-i энергетика сферазында. Котельнайларда амғы тусха 34 муң тонна хара тас пилетелген, ол кӧрiлген синге читче, Асхыс аймаандағы Тӧӧ пазы посёлокта ла хара тас пис кӱнге чидер.
ЖКХ объекттерiн нааҷылирына пӱӱл 168,9 миллион салковай субсидия позыдылча. 1 хосхарға котельнайларны тиксi тыхтирға подрядчиктернең чӧптезiглер идiл парарға кирек. Прай министерство-ведомстволарға постарының нааҷылирға киректелчеткен объекттерiнiң санын пирерге кирек. Кем пирбес, оларның ахчазы пасха объекттерге ӱлестiрiлер.
Мында Валентин Коновалов муниципалитеттер пастарының хайиин коммунальнай полызығлар ӱчӱн тӧлеглернi тузында чыырына айландырған. Аның чооғынаң, Хакасияда пу тӧлеглерҷе алым 55 % чит парған, Ағбанда – 46 %, Ағбан пилтiрi аймаанда – 30 %. Прайзы пу сурығнаң айғазарға кирек, ол тоғысха чарғы приставтарын тартарға.
Iдӧк Хакасия пазы MAХ мессенджер республикада хайди чуртасха кирiлчеткен сурығны кӧдiрген. Муниципалитеттерде пу тоғыс ам даа уйан апарылча. Андағлар санында Таштып паза Орджоникидзе аймахтары. Федеральнай кiн республикаа 60 % синнiг пӧгiн турғыс салған.
Ӧрттер сығызарынаң паза суғлар чайыларынаң хорғыстарға тимненiс тоғыстары хайди апарылчатханнаңар чоох тутхан Хакасияның ГО, ЧС паза ПБ хазна комитедiнiң кнезi Владимир Карамашев. Аның чооғынаң, планнаң кӧрiлген мероприятиелер толдырыл парғаннар. Cурығ сағыбаан саайларҷа комиссия чыылиинда ӱзӱрiлген. Чыл сай часхыда хайылчатхан пус Ағбан суғда Абаза паза Хубачар хыринда тығылысча. Метеорологтарның кӧрiзiнең, Ағбан суғҷа пус хосхар айының ортызында инiп пастир. Ол орыннарда чара чачырастар идiлер. Муниципалитеттер пусты амох харалтчалар, андада ол табырах хайылча. Прай киректер сыныхтағда тудылча. Чағынғы туста наңмырлар чаары кӧрiлбинче, кӱннiң сай кии 5 градусха теере чылир. Пiрее тӧбiн чирлердегi участоктарға суғ кiрерге айабас.
Ӧрттердеңер чоохтаза, пӱӱл республикада 345 ӧрт ӱзiрiлген, анда 13 кiзi ӱреен. Муниципалитеттерге ааллар ибiре ӧрт иртiрбес чоллар тартарына, оларны нааҷылирына хайығ саларға кирек. Пу тоғыс, тохтадылбин, сыбыра апарылзын. Ӧрттердең тоғыр кӱрезерге 382 ӧме тӧстелген, оларның санында 29 маневреннай ӧме, 220 патруль тимде. 1 хосхардаң ӧрттең тоғыр режим кирiлерi кӧрiлче, аннаңар ағаа теере тимненiс тоғыстарының кӧбiзiн толдыр саларға кирек. Чазыларда 26 ӧрт ӱзiрiлген. Пос кӧңнiнең ӧрт ӱзiрҷең дружиналарға хоза субсидия киректелче, олар улуғ тоғыс апарчалар.
Чыылығда iдӧк постарының чирлерiнде тоғыс хайди апарылчатханнаңар чоох тутханнар Асхыс аймаа пазының тоғызын толдырчатхан Евгений Костяков, Cорығның пазы Марина Гурай, Абазаның пазы Валентина Филимонова, Орджоникидзе аймаа пазы Анатолий Тайченачев паза постарының сфераларында тоғыс хайди апарылчатханнаңар искiргеннер Хакасияның ЖКХ паза энергетика министрiнiң орынҷызы Анна Ямщикова, чир-чайаан ис-пайы паза экология министрi Владимир Лебедев, МЧС-тың Хакасияҷа Ӧӧн устаа пастығының орынҷызы Алексей Максименко паза даа пасхазы.
Чыылығның тоғызын тоозып, Валентин Коновалов таныхтаан:
– Прай муниципалитеттер пастарына читпестернi тӱзет саларға кирек. Амды чылығ кӱннер турары кӧрiлче. Соохтар ам даа тоозылбаан, аннаңар котельнайларда кӧрiлген синнiг пилетелген хара тас читкiҷе ползын. Ааллар ибiре ӧрт иртiрбес чолларны нааҷылирына хайығ айландырыңар. Коммунальнай полызығлар ӱчӱн тӧлеглернi тузында чыырына прай устағҷыларның хайиин айландырчам. Суғлар чайыларына тимде полыңар, гидротехническай пӱдiрiглернiң тимдезiн сыныхтап турыңар, кирек полза, тыхтағ тоғыстарын апарыңар. Ӧрттер сығызарынаң оой нимес тус полар, чил чох полза, хуруғ отты ӧртебiзiңер, сыныхтағда тудып. Аалларда сӧп-сапты арығлап салыңар, дачаларда тастал парған участоктарға хайығ салыңар. Ӧрт ӱзiрҷеңнерге суғ алар орыннар тимде ползын. Фермерлер постарының чирлерi ибiре ӧрт иртiрбес чоллар тартсыннар, – теен Хакасия пазы.
Автор :
Николай Султреков
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
