Крымның чоны – ол Россияның чоны
20.03.2026
Хабарлар
Хакасияның саблығ артизі Ольга Васильева «Мы» сарынны толдырча
Чайаачы иир. В.Г.Чаптыковтың адынаң Хакас филармониязында «Мы – вместе» концерт ирткен. Ол 12 чыл мының алнында 18 кӧрiкте Крым паза Севастополь Россиязар нандыра айланғанына чарыдылған
Крымда 2014 чылда часхызын референдум иртiрiлген. Андада чарым олтырыхтың прай даа чуртағҷызы (96,77 %) Россиязар нандыра айланҷаң кӧңнiн искiрген. Пу танығлығ кирек, «Крым часхызы» адалып, тархынға кiр парған. Чирге чир хозылча, чоннаң чон пiрiкче. Аннаң сығара тиксi Россия чыл сай 18 кӧрiкте чахсы ӱлӱкӱннi таныхтапча.
Хакасияда пу ӱлӱкӱннi филармонияда алғым пайрамнадылар. Ағбан городтың чуртағҷылары паза аалҷылары «Мы – вместе» концертке хынып килгеннер, кӧрiгҷiлер залында пос орын даа халбаан. Чайаачы иирнi Хакасияның саблығ артизi Ольга Васильева «Мы» сiлiг сарыннаң асхан. Аның кӧзiдиин «Шейк» ансамбль махалығ теелбекнең чазаан.
– Пiс Крым Россиязар нандыра айланғанын таныхтапчабыс. Пу кӱн пiстiң хазнаның тархынына саңайға кiр парған. Он iкi чыл мының алнында чуртағҷылар орта чарадығ алғаннары чылдаң чылға пик киречiлелче. Совет Союзы соонаң Украинаның ӱлгӱзi Крымға хайығ салбиныбысхан. Саблығ имненҷең орыннар паза олған лагерьлерi тастал парғаннар. Инфраструктура тооза изелген. Крым Россиязар нандыра айланғанда, чарым олтырых наа тыныс алған. Чарларны пiрiктiрчеткен Крым тахтазы транспорт палғалызын, чоннарның ынархазын, культура тилiзiн тыытча. Амғы туста чоныбыс хатығ сынағларны иртчеткенде, пiс хада-пiрге тудынарға кирек тiп улам чахсы сизiнчебiс. Хакасия 2014 чылда iдӧк прай хазнанаң хада полған. Андада пiстiң филармонияның артисттерi паза С.П.Кадышевтiң адынаң чон чайаачызы кiнiнiң тоғынҷылары чонның кӧңнiн кӧдiре аларға ӧнетiн Крымзар чӧргеннер. Оларны анда чылығ удурлааннар. Аарлығ нанҷылар, пу ӱлӱкӱнде прайзына амыр-хазых чуртас алғапчам. Полған на сӧбiреде ӧрiнiс ползын. Палаларыбыс хазнабысха, тархыныбысха поғдархазыннар, – чылығ сӧстер читiрген Хакасия пазы Валентин Коновалов.
Алғыстастарға iдӧк Хакасияның Ӧӧркi Чӧп кнезiнiң тоғызын толдырчатхан, хакас чонның Улуғлар чӧбiнiң кнезi Пётр Воронин хозылған. Анаң «Мы – вместе» концертте Хакасияның чон артизi Артур Марлужоков, Хакасияның саблығ артизi Ольга Васильева паза филармонияның ырҷызы Сергей Зибуков кееркестiг сарыннар толдырғаннар. Чайаачы иир соонаң пic аалҷыларнаң чоохтазып алғабыс.
Алексей Саражаков, ӧнетiн чаа операциязының ветераны:
– Пу халған Запорожье, Херсон областьтары позыдылзалар, ӧнетiн чаа операциязы тоозылар тiп сағынчам. Пiстiң ооллар алнынзар парчалар, матап кӱстенчелер. Пӱӱн концертке килгенде, сағысха кiрген, Крым Россияа пiрiкчеткенде, пiстiң ооллар анда полғаннарох. Ол туста пiр дее атыс чох Крым пiссер нандыра айланған.
20 кӧрiкте Ағбаннаң сығара чааҷыларыбысха гуманитарнай полызығ ызарбыс. Iкi фура парар. Волонтёрлар паза минiң хада тоғынған арғыстарым чахсы полысчалар. Позымның тӧреен-ӧскен Чоғархы Тӧӧ аалыҷаамның чуртағҷылары iдӧк гуманитарнай полызығ тимнеп салғаннар. Аннаңар прайзына улуғ алғызым читiрчем.
Андрей Парилов, ӧнетiн чаа операциязының ветераны:
– Крым Россиязар закон хоостыра айлан килгенi орта. Хазнабыстың пасха чирлерi iдӧк нандыра хозыл парзалар, пiстiң прай ниме чахсы полар.
Сергей Тодышев, Аршаннар аалындағы школаның тархын ӱгретчiзi:
– Пӱӱнгi чайаачы иир пӧзiк синде ирт парды. Филармония ӱлӱкӱнге чахсы тимнен салғаны iле кӧрiнче. Крымнаңар чоохтаза, ол пурунғыдаң сығара пiстiң хазнани полған. Совет Союзы тузында аны закон хыйыстыра Украинаа пирiбiскеннер. Андада таңдағы кӱннеңер ырах сағынмааннар. Президент Владимир Владимирович Путин, Крымдағы чонның алнын алып, оларның кӧңнiн толдырған. Iкi миллион кiзi, чуртағҷыларның 97 процентi, Россиязар нандыра айланарға ӱн пирген. Он iкi чыл мының алнында президент паза чон орта хаалағ иткенiн пӱӱнгi чуртас чахсы кӧзiтче. Крымның чоны – ол Россияның чоны.
Сом Дмитрий Сунчугашевти
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
