Предприятие регионны тилiтче
20.03.2026
Хабарлар
Владимир Михалёв (оң саринаң) Валентин Коноваловты паза Роман Ковтунны пос предприятиезiнең таныстырча
Тоғыс чорығы. Пу кӱннерде Хакасия пазы Валентин Коновалов Ағбанда орныхчатхан «Абакан-Пласт» ООО-зар тоғыс чорығынаң сыххан
Ағбанның Индіркі Согра микрорайонында орныхчатхан предприятие 30 чылға чағын тоғын парир. Ол ас-тамах сығарчатхан компанияларға пластиктең идiлген банкалар, аймах синніг пиктелчеткен айахтар тимнепче. Iдӧк анда пӧзік технологиялығ оборудование полызиинаң тимірдең аймах хоза чардыхтар итчелер. Таныхтирға кирек, пістің республикада паза пір дее предприятиенiң андағ наа тиріглер чоғыл.
Ӧӧнінде ол предприятие сығарчатхан ниме-ноонаң палыхтаң тимнелген ас-тамах сығарчатхан компаниялар тузаланчалар. Ол санда «Рыбный мир», «Морис», «ЕлИСей»... Аннаңар «Абакан-Пласт» ООО-ның ниме-ноозын республиканың прай даа чуртағҷызы холда тутхан полар. Ідӧк оларның пластиктең иділген банкаларынаң мӧӧт сатчатхан идiнҷектер матап тузаланчалар. Аннаңар компанияның товарлары садығ рыногында хаҷан даа кирек полчалар.
Пӱӱнгі кӱнде «Абакан-Пласт» ООО чахсы тилiпчеткен предприятиелернің санына кірче. Анда 75 кізі істенче. Ӱр ниместе мағаа ол предприятиенің тоғызын пос хараанаң кӧріп аларға ӱлӱс тӱскен.
Мындағ чахсы тиліпчеткен предприятиенең Владимир Михалёв устапча. Олох аның тӧстегҷізі полча. 1998 чылда предприятие тоғызын ікі станоктаң пастаан. Амды, тізең, анда 80 азыра аарлығ, наа оборудование тоғынча. Оларны предприятиенің устағ-пастаа Хыдаттаң ағылтыр. Аймах ӧңніг лампочкаларнаң чарыпчатхан тиріглерні пос хараанаң кӧрерге пасхаҷыл полған. Полған на андағ тирігнің кистінде пӧзік пілістіг специалист турча. Оларны Владимир Петрович позы, таап, предприятиезер тоғынарға хығырған.
Владимир Михалёв кадрлар суриинаң сыбыра айғасча. Хайди таныхтаан предприятиенің бизнесті тилiдер сурығларнаң айғасчатхан менеджері Иван Нечепуренко, Владимир Петрович пӧзік пілістіг чиит специалисттерні предприятиезер тартып аларына улуғ хайығ салча. Аннаңар идiнҷек 2013 чылдаң Сибирьдегі федеральнай университеттің Ағбанда орныхчатхан пӧлии Хакас техника институдының «Технология машиностроения» специальностьча вузты тоосчатхан студенттерні сыныхтапчатхан комиссиязынзар кірче. 2019 чылдаң сығара, тізең, сыныхтағ комиссиязының кнезі полған. Чииттер дипломнарын арачылапчатса, ирен, иң чапчаң, ӧткін чиит специалисттерні таллап, оларны позының предприятиезінзер тоғынарға хығырча. Ідӧк «Абакан-Пласт» ООО ХТИ-ның студенттеріне пос предприятиезінде практика иртерге оңдай пирче. Іди ол чииттернің хай піреезі, вузты тоозып, істеніс чолын мында пастапча.
Предприятие устағҷызы тиктең нимес пӧзік пілістіг специалисттерге хайығ салча. Ол позы инженер специальностьтығ кізі. Ағбанзар, Брянсктағы институтты тоозып, тоғынарға килген. Iстеніс чолын Абаканвагонмашта инженер-конструктор полып пастаан. Ол кӧстегҷе устағҷы полған. Эксперименттер апарчатхан лабораториянаң устаан. Ол кӧстегҷе тоғынып, иреннің пластиктең ниме-ноо сығарарынаңар сағыс тӧреен.
Предприятие пӧзік качестволығ пластикнең тоғынча. Оларның товарлары СанПин кирексіністері хоостыра идiлче. Полған на сығарылған товарға сертификат пар. Олар пос ниме-ноозын «Сибур» Россиядағы нефть-газ химиязынаң айғасчатхан иң улуғ компания сырьёзынаң итчелер. Пістің хазнабыста ол компанияның товарлары иң пӧзік синде паалалчаттыр.
Ӱстӱнзархы Сибирьде мындағ пӧзік качестволығ пластиктең идiлген ниме-ноо сығарчатхан пу чалғыс предприятие полар, неке. Аннаңар компания пӱӱнгі кӱнде пос ниме-ноозын хазнабыстың аймах регионнарында чахсы таратча. Предприятиенең хада тоғынчатхан компаниялар (дилерлер) Хызылчарда, Омскта, Новосибирскте, Иркутскта, Улан-Удэде пар. Iдӧк предприятие пос товарларын Казахстанзар таратча.
«Абакан-Пласт» ООО-ның устағ-пастаа позының алнында кӧп пӧгіннер турғысча. Паза тоғынҷыларға истіг оңдайлар тӧстирге харасча. Аның сылтаанда наа тура пӱдірiлче. Анда тимірнең тоғынчатхан цех полар тіп кӧрілче. Пӱӱнгі кӱнде предприятие пір улуғ турада орныхча. Аның аймах пӧліктерінде читі цехтың тоғынҷылары істенчелер. Хакасия пазы Валентин Коновалов оларның полғанында ла пол килген, андағы тоғынҷыларнаң пір-ікі сӧснең алысхан.
Таныхтирға кирек, республика пазы тиктең нимес «Абакан-Пласт» ООО-ның тоғызынаң танысхан. Ағбанның Индіркі Согра микрорайонында орныхчатхан предприятие регионның экономика тилізіне улуғ хозым итче. Ирткен чылда компания 660 тонна ниме-ноо сығарыбысхан. Паза ол кӧп специалистке тоғыс орнын пирче: тимір хабыстырҷаңнарға, токарьларға, фрезеровщиктерге, слесарьларға, аймах профильліг инженерлерге паза даа пасхазына.
Ідӧк предприятие аймах марығларда, сыбыра аралазып, сыйыхтығ орыннарға сыхча. Іди «Абакан-Пласт» ООО 2023 чылда Хакасияның промышленнозы кӧстегҷе иң чахсы предприятие пол парған. Ирткен чылда ол Хакасияның промышленность тилізі чыындызының инвестиция полызиинаң чылығ пирҷең пес-хазан паза ниме-нооны кӧні чазаҷаң станок садызып алған. Наа пес-хазан, кізі полызии чох тоғынып, прай предприятиее чылығ пирче. Хара тас, пессер конвеерҷе чылып, нинҷе кирек синҷе урылча. Ол наа оборудование тоғызын Хакасия пазы пӧзік паалаан.
Сом Дмитрий Сунчугашевти
Автор :
Ольга Томочакова
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
