Россия гимні сигіс хати толдырылған
18.03.2026
Хабарлар
Тӧрт медаль утхан Варвара Ворончихина (ортызында) сыйыхтас тузында
Спорт. Пістің спортсменнер Паралимпиадада, 12 медаль холға киріп, ӧменең ӱзінҷі орынға сыхханнар
Амғы Паралимп ойыннарын піс хаҷан даа ундубаспыс. 12 чыл пазынаң Россияның піріктірілген командазы пазох гимнніг паза флагтығ марығласты. Хазна ӱчӱн алты ла кізі турысхан, че ол син асхынах спортсмен 8 алтын, 1 кӱмӱс паза 3 хола медаль утып алған.
Паралимпиада Италияда 6 – 15 кӧрікте ирткен. Пас меетке 612 кізі сыххан. Олар, 55 хазнаның алнын алып, 79 медальлар чыындызы ӱчӱн харбасханнар. Пӱӱл арға-мӧрійнің программазына алты спорт кӧрімі кірген: тағ индіре чылары, саналығ чӱгӱріс, биатлон, сноуборд, следж-хоккей, коляскалығ кёрлинг. Чоохтирға кирек, пірее спорт кӧрімі нинҷе-нинҷе дисциплинадаң пӱтче. Кӧзідімге, Паралимпиадада саналығ чӱгӱрісте пис дисциплина полған: спринт, 10 км классика оңдайлығ чарыс, 20 км конек оңдайынаң чӱгӱріс паза ікі эстафета. Ағаа хоза, полған на чарыс ӱс категорияҷа ирткен: турып чӱгӱр полчатханнарға, санаға одырып чарысчатханнарға паза харах оды чохтарға. Марығ оңдайларынҷа харах оды чохтар дистанцияны спортсмен-гиднең хада чӱгӱрчелер.
Чир-суғҷыларыбыстаң Варвара Ворончихина, Алексей Бугаев (тағ индіре чылары), Иван Голубков, Анастасия Багиян (саналығ чарыс), Дмитрий Фадеев паза Филипп Шеббо Монзер (сноуборд) чиңіс ӱчӱн харбасханнар. Пастағы ӱс спортсмен тӧрееннең кинек. Анастасия Багиян 15 частығда харах оды чох халтыр. Фадеев Новосибирск облазынаң. Ол 2020 чылда, сноуборднаң катайланып, азаан сындыр салған. Ирен аар палығлатхан сылтаанда пір азаа чох халған. Филипп Шеббо Монзер – РСФСР-ның чон артизі Галина Польскихтің пархазы. Филипп, мотоциклліг cаайға кіріп, Фадеев чіли, пір азаа чох халған. Ол инженер ӱгредігліг, аның предприятиезі протезтер сығарча. Алексей Бугаевті алынҷа таныхтирға кирек. Хызылчарның чуртағҷызы 2014 чылда Сочиде Паралимпиадада пастағы алтын медальны холға кирген. Ағаа андада 17 час полған. Пу аның ӱзінҷі Паралимп ойыннары. Пасхалары хазии уйан улусха кӧрілген тилекейнің иң улуғ мариинда пастағызын на кӱстерін сынааннар.
Улуғ марығлар ухаанҷыластарнаң танығлығ. Специалисттер нинҷе медаль поларын азынада санирға хынадырлар. Че пӱӱл Россияның паралимп комитеді арға-мӧрій алнында андағ чоохтар апарбаан. Хатығластар пылтыр кӱскӱзін суурылған ползалар даа, пістің параатлеттер марығда ӧнетін хығыртығлар хоостыра араласханнар. Ол сылтағнаң Россиядаң пас меетке алты кізі cыххан. Нинҷе-де спортсмен чидіглерінең Паралимпиаданың наа страницазын азар тіп пірдеезі сағыбаан. Итсе, спортта кирек удаа сағыбаан оңдайнаң парыбысча.
7 кӧрікте 23 частығ Варвара Ворончихина Россияа пастағы медальны ағылча. Кӧрігҷілернің ӧрінізі пу чир нимес. 9 кӧрікте, тізең, наа чидіг. Иркутск облазынаң сыххан абахай супергигантта чиңіс тутхан. Ол кӱн 12 чыл аразына пастағызын на Россия флагы кӧдірілген паза хазнабыстың гимні толдырылған. Ачых-чарых кӧңніліг Варвара арғыстарына пьедесталзар чол ас пирген тирге чарир. 10 кӧрікте чиңіс чӧріміне Анастасия Багиян хозылча. Пермь крайының чуртағҷызы спринтте алтын медальны холға кирген. Ол 1,5 километрні 3 минута 24,7 секундаа тобырған. 11 кӧрікте Настя 10 километрде прайзын ас парыбысхан. Пик хуйахтығ Багиянға трассада спортсмен-гид Сергей Синякин полысча. 30 частығ Иван Голубков хыстардаң халбинча. Ваня ідӧк 10 километрде «ыырҷыларына» маң пирбеен. Пір cӧснең, 7 кӧріктең пасти пістің спортсменнер кӱннің сай медальлар утханнар. Че Паралимпиаданың халғанҷы кӱні спортха хынчатханнарның сағызында хаҷанға даа халар. Пастап Иван Голубков 20 километрліг дистанцияда чиңіс тутхан, анаң Анастасия олох чидіге читкен. Алексей Бугаев слаломда чемпион атха турысхан. Алында параатлет ікі хола медаль холға кирген. Ӱс чиңіс Россия командазын сах андох ӱзінҷі орынға кӧдір парыбысхан.
Сноубордисттердеңер чоохтаза, оларға сыйыхтығ орынға сығарға опыт читпеендір. Дмитрий Фадеев тее, Филипп Шеббо Монзер дее кинеп парғанда ла спортта кӱстерін сынирға пастааннар. Ворончихина, Бугаев паза Голубков кічігдең марығласчалар. Багиян саналарға 17 частығда турыбысхан. Иван Голубков спортнаң Сыктывкардағы олған туразында танысхан. Ол ӧскен учреждениені чонда «чемпионнарның интернады» адапчаттырлар. Аннаң кӧп саблығ параспортсмен сыххан. Пӱӱнгі кӱнде Иван Голубков Москвада чуртапча.
Ӧмелер мариинда Россияның командазы ӱзінҷізі полыбысхан. Чидіг рекордха тиңнелче. Ноғадаңар? Пастағы орында парчатхан Хыдат (44 медаль) пас меетке 79 кізіні сығарған, CША-ның 23 медаль, че аның алнын 68 спортсмен алған. Пістің спортсменнер алтолаң 12 медаль холға киргеннер. Оларның кӱстенізінең Альпы тағларында Россия гимні 8 хати толдырылған. Поғдархапчабыс чемпионнарыбысха!
Сом интернеттең
Автор :
Майя Кильчичакова
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
