Пістіңнер ӱзінҷі орында
13.03.2026
Хабарлар
«LIGaPRO» команда – чемпионаттың хола призёры
Спорт. Ағбанда футзалҷа Cибирьнің паза Ыраххы Востоктың чемпионады ирткен. Турнир Пастағы лиганың командаларына кӧрілген
Латин Америкадаң сыххан
Хакасияда футзал алай мини-футбол чахсы тиліпчеткен спорт кӧрімнерi санына кірче тізе, саба полбас, неке. Аннаң улуғлар даа, кічіглер дее хынып айғасчалар. Орындағы футболисттернің иң улуғ чидии – 2022 чылда Россия первенствозында чиңіс тутханы. Ол чыл 12 часха читкелек оолағастар Хакасияа алтын медаль ағылғаннар. Ідӧк хызыҷахтар, «Мини-футбол школазар» проектте аралазып, пір ле хати нимес чемпион атха турысханнар.
Футзалның тархыны пай. Ол 1930 чыллардох Уругвайда тӧстелген. Наа тыныс алған Бразилияда. Аннаң сығара тилекейҷе тарап парыбысхан. Футзалҷа пастағы тилекей чемпионады 1989 чылда ирттір. Чиңіc тутхан Бразилияның піріктірілген ӧмезі. Пістің хазнадаңар чоохтаза, мында чӧрімге 1980 чылларның халғанҷызында хозылғаннар. Отыс артиинаң чыл аразына Россия футзалда кӧп чидіге читкен. Спортсменнерібіс 1996 чылда тилекей чемпионадында ӱзінҷі орынға сыхханнар, 2016 чылда кӱмӱс медаль холға киргеннер. Клубтар чоннар аразындағы турнирлерде тӧреміл чахсы ойнапчалар. Тиктең нимес Россия футзалҷа Европада кӱстіглернің cанына кірче.
Амғы туста пістің хазнада командалар ӱс дивизионға чарылчалар: Cуперлига, Пӧзік лига паза Пастағы лига. Суперлигазар 13 ӧме кірче. Олар Россияның чемпионадында кӱстерін сынапчалар. Сибирьдегі федеральнай округтаң анда ӱс команда араласча: «Норильский никель» (Хызылчар крайы), «Сибиряк» (Новосибирск облазы) паза «ИрАэро» (Иркутск облазы). Халғанҷы ікі дивизионда ир кізілер паза ипчілер командалары ойнапчалар.
Хакасиядағы командалар Пастағы лигазар кірчелер. Сибирь синінде салтарлар хомай нимес. Пӱӱл азығ айында ипчілернің ӧмезі Кемеровта хола призер полыбысхан. Иреннернің «LIGaPRO» командазы 2024 чылда Сибирь чемпионадында чиңіс тутхан, олох чылда, Россия мариинда аралазып, 16 ӧме аразында пизінҷі орынға сыххан.
Чемпионат
7 – 9 кӧрікте Н.Г.Булакиннің адынаң спорткомплексте футзалҷа Cибирьнің паза Ыраххы Востоктың чемпионады ирткен. Мындағ марығны Хакасия ікінҷі хати удурлапча. Алында футболисттер Ағбанда 2024 чылда чиңіc ӱчӱн харбасханнар. Пӱӱл улуғ залның паркедінзер алты команда сыхты: «АлтПолитех» (Барнаул), «Аян» (Чита), «БайкалАвтоТрак» (Улан-Удэ), «Сибиряк» (Новосибирск), «LIGaPRO» паза «КСШ» (Ағбан). Новосибирсктегi ӧмедеңер пір танығ: андар Суперлигада ойнапчатхан «Сибиряктың» чииттері кіргеннер.
Турнирні 8 кӧрікте пайрамни асханнар. Мероприятиеде Хакасияның спорт министрі Пётр Макарчук араласхан. Пётр Анатольевич, чоох тудып, спортсменнерге чиңіс тударға, пик хылыхтарын кӧзідерге алғаан. Ідӧк спорт министрі, абахайларзар айланып, оларны Ипчілернің чоннар аразындағы кӱнiнең алғыcтаан паза чир-суғҷыларыбыс ӱчӱн матап «ағырарға» сурынған. Кӧрігҷілер Пётр Анатольевичтің cӧстерін ізіг айа сабызынаң удурлааннар.
Марығ ӱлӱкӱнге киліс парғаннаңар, кӧрігҷілер саны кӧп полбаан, че паркетте харбазығ хазыр парған. Пастағы лигада пос оңдайлығ спортсменнер ойнапчаттырлар. Чарғыҷыларнаң чоохтасханда, чемпионатха таллағ иртпеендір. Марығда ахча таап алған ӧмелер араласханнар тирге чарир. Турнирнің оңдайларынҷа прай командалар удур-тӧдір ойнааннар, полғаны ла пизер матч иртiрібіскен. Футзалда, улуғ футболдағы чіли, ойын ікі чардыхтаң пӱтче. Пір тайм 20 минута парча. Командада 5 кізі: тӧрт ойынҷы паза хаалха хадағҷызы. Футзалда чазы даа, хаалха даа, меспек тее кічіг арахтар. Чемпионат тооза командалар саннар чығаннар. Чиңіс ӱчӱн ӧмее 3 сан пирілче, хайым ӱчӱн – 1 сан, утырыс ӱчӱн – 0 сан.
Чемпионаттың салтарлары киречілееннер, Ағбандағы паркетсер устарынаң тиң командалар сыхханнар. Араласчылардаң пірдеезі унада саптырбаан. Пу кізі «КСШ» ӧменің ӱчӱн прай чӱреенең «ағырған». Ол – Ағбанның Комплекснай спорт школазының командазы. Анда 2009-2010 чылларда тӧреен саарбахтар ойнааннар. Спортсменнерні махтирға кирек. Часха прайзынаң кічіг дее ползалар, олар «LIGaPRO» ӧменең тиң ойнабысханнар, сан – 2:2, «Аянны», тізең, 4:2 cаннаң чиңіп алғаннар. Хаалха хадағҷызы Иван Ахпашев чемпионаттың иң чахсы хаалха хадағҷызына саналған. Cаарбахтарның пизінҷі орын, оларны марыға тренерлер Денис Козлов паза Денис Кученеков тимнееннер.
Пастағы орынға сыххан «БайкалАвтоТрак» (Улан-Удэ). Чиңісчінің 12 cан. Пӱрӱт футболисттер Ағбандағы «LIGaPRO» командаа ла 1:2 саннаң утыр салғаннар. Чоохтирға кирек, пӱӱл «БайкалАвтоТрак» ідӧк Улан-Удэнің кубогында чиңіс тутхан. Арға-мӧрійде 24 команда узын кӧзіттір. Городтың устағ-пастаа чемпионға 1 миллион салковай сыйлап пирген. Амды «БайкалАвтоТрак» хосхар айында Россия мариинда аралазар.
Иң хазыр харбазығ ікінҷі паза ӱзінҷі орын ӱчӱн парған. Ноғадаңар? «АлтПолитех» (Барнаул) паза «LIGaPRO» (Ағбан) 10-ар сан чыып алғаннар. Че пістіңнер, аалҷыларға утыр салғаннаңар, ӱзінҷі орында халғаннар. Таныхтирға кирек, Пастағы лиганың командалар аразындағы Россия марии Барнаулда иртер. Ол сылтағнаң «АлтПолитех» ідӧк арға-мӧрійде кӱзiн сынир.
Хола призёрлар
«LIGaPRO» ӧме 2019 чылда Ағбанда тӧстелген. Аның ӧӧн тренері – идінҷек Николай Шигалаков. Хайди таныхтаан Николай Сергеевич, командазар 15 кізі кірче. Футзал прайзының хынчатхан кирее полча. Иреннер аймах сфераларда істенчелер, тренировкаларға неделяда ікі хати чыылысчалар. Аренда ӱчӱн тӧлирге килісче. Иң чахсы ойынҷыларға Виталий Сагалаков, Григорий Линдт паза Данил Борисенко саналчаттырлар. Хакастардаң командада ідӧк Николай Чистыгашев, Самуил Мамышев паза Александр Карачаков ойнапчалар. Николай Шигалаков чемпионат араласчыларының устарын пӧзік паалаан. Ол чоохтаан:
– Cанапчам, ӧмелер, утырзалар даа, уғаа чахсы ойнааннар. Піске «ыырҷыларны» чиңіп аларға оой полбаан. Анзынаң пу марығ хынығ. Арғызым Виталий Сагалаковтың ӱчӱн ӧріністіг. Ол чемпионаттың иң чахсы нападающайы пол парған. Прайзын спортнаң айғазарға хығырчам. Ол кӱс хосча, хазыхты пиктирге оңдай пирче. Мындағ марығлар Хакасияда иртсе, кил турыңар. Піс матч тузында прай кӧңнілерібіcті cалып ойнапчабыс.
Сом Николай Шигалаковтың архивiнең
Автор :
Майя Кильчичакова
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
