Чирнi алғыдыбызарға киректелче
13.03.2026
Хабарлар
Кӱн сурии. Хакас национальнай гимназияның наа корпузын пӱдірер проектче тоғыс узарадылча
Россия президенті Владимир Путиннің чахиин толдырары хоостыра Хакасия правительствозы Ағбан городтың устағ-пастаанаң хада Н.Ф.Катановтың адынаң хакас национальнай гимназияның 1000 орыннығ наа корпузының проектін тимнирінҷе паза пӱдірерінҷе тоғысты апарча.
Объектке пастап улии 3,6 га тиңнелчеткен чир пу адресче пирілген: Ағбан г., Ломоносовтың ор., 51.
Проектті тимнепчеткенде, ол, 2025 чыл тоозылчатханда, тимнел сыххан, ол чир амғы тустағы пӱдіріг паза санитар нормалары хоостыра ӱгредіг комплексін пӱдіреріне читкіҷе нимес тiп ілезіне сығарылған. Федеральнай кін ӱгредіг учреждениелерінің проекттеріне кирексініcтерні хатығлабысхан сылтаанда. Ол алызығлар школа туразының параметріне дее, ідӧк школа хыриндағы чирлерде орныхчаң объекттерге дее теелчелер.
Амғы тустағы школа проекттерінҷе санузеллернің, коридорларның паза рекреация орыннарының, столовайларның, имнег кабинеттерінің, гардеробнайларның улии алғыдылған. Салтарында амғы наа школаларның туралары мының алнында пӱдірілгеннернің хыринда хай-хай улуғ чир кирексіпчелер.
Ӱгредіг учреждениезінің проектін тимнирінде ідӧк спорт стадионын, ибіре чӱгӱрҷең чолыҷахты, волейбол паза баскетбол площадкаларын, ырахха атыхчаң площадканы, тынағ орнын, ідӧк транспорт иртчең чолларны паза тротуарларны кӧр саларға киректелче. Аннаң пасха ӧрттең тоғыр паза санитарнай нормативтер, ағастар паза оттар одыртар кирексіністерні – пос чирнің 50%-інең ас нимес – толдырарға кирек.
Тиңнестіріге: Ағбандағы 33№ школа паза Хубачардағы школа улии 3,9 паза 4,04 га тиңнелчеткен чирлерде пӱдірілгеннер. Наа кирексініcтерні санға алза, прай кирек инфраструктуралығ 1000 орыннығ школаны улии 3,6 га тиңнелчеткен чирде пӱдір полбассың.
Аны хоостыра Хакас Республика правительствозы Ағбан городтың устағ-пастаанзар чирнi 1,6 гектарға теере алғыдыбызарға чӧпнең айланған. Сурығны пӧгеріне хонҷых чирнiң кӧрімін «ӱгредіг паза наука кӧcтегліг» кӧрімге алыстырыбызарға чӧп пирілче. Андада гимназияның наа корпузын пӱдіреріне тиксі улии 5,2 га полчатхан чир тӧстел парар.
Таныхтирға кирек, Н.Ф.Катановтың адынаң хакас национальнай гимназия республиканың иң чахсы ӱгредіг учреждениелерінің пірсі полча. Ол 1945 чылда тӧстелген паза онарлап чыллар изере аймах-пасха сфераларға чахсы специалисттерні тимнепче. Гимназияны тоосханнарның аразында – 12 наука докторы, 60 артиинаң наука кандидады, чоннар аразындағы спорт устары, Россияның писательлер пірігізі араласчылары. Гимназияны тоосхан 20 азыра кізі Хакас Республиканың паза Россия Федерациязының саблығ ӱгретчізі, имҷізі, артизі паза культура деятельі аарластығ аттарға турысхан.
Ағбан городтың устағ-пастаанзар официальнай айланыс ызылған.
Сом r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
