Пос тiлiн пiлчетсең, марығда аралазып, ахча ут
06.03.2026
Хабарлар
Марығ. Хакасияның национальнай паза территориальнай политика министерствозы пизiнҷi класстағы ӱгренҷiлер аразында хакас тiлi мариин теестегi хати иртiрер
Марығның ӧӧн пӧгiнi – республиканың iкiнҷi хазна тiлiн хайраллиры, тилiдерi паза аны сӧбiреде сабландырары.
Анда аралазарға сағынчатхан сӧбiрелерге 25 кӧрiкке теере мындағ пiчiктер тимнеп саларға кирек:
– сурыныс пiчии;
– паспорттың хобырғаны;
– СНИЛС-тың хобырғаны;
– ИНН-ның хобырғаны;
– олғанның тӧрееннеңер пічіктің хобырғаны;
– школадаң пiчiк;
– паланың пабазы паза iҷезi ирепчi полчатханнаңар пічіктің хобырғаны;
– ӱгренҷiнiң опекуны пар полза, аның документтерiнiң хобырғаны;
– банк реквизиттерi.
Марығ 6 хосхарға теере иртiрілер. Анда олғаннар эксперт комиссиязынаң чоох алызарлар. Комиссиядағылар олған пос тiлiн пiл полчатханын, чоохтасчатханын, пос сағызын искiр полчатханын паалирлар. Чоох алызарынаң пасха, пизiнҷi класстағылар iдӧк хакас тiлiнең диктант пазарлар.
Иң кӧп балл чыып алған ӱгренҷi (ӱгренҷiлер) 25 муң салковай ахчалығ сыйых алар, iкiнҷi орында полыбысхан олған (олғаннар) – 23 муң салковай, ӱзiнҷi орындағылар – 21 муң салковай. «Иң артых диктант» номинацияда чиңiс тутхан палаа хоза 10 муң салковай аларға оңдай пар.
Iҷе-пабаларға пiчiктернi Хакасияның национальнай паза территориальнай политика министерствозынзар ызарға чарир пу адресче: 655017, Хакас Республика, Ағбан г., Щетинкиннiң ор., 18 алай ба саннығ кӧрiмде (PDF-файл алай ба JPG-файл форматча) электроннай почтазар: minnас@r-19.ru. Сурығларнаң 8(3902)239-002 телефонҷа айланарға чарир.
Хакас тiлi марии Хакасия пазы Валентин Коноваловтың пастаа хоостыра «Хакас тiлiн хайраллиры паза тилiдерi» хазна программазынҷа иртiрiлче.
Автор :
Светлана Астанаева
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
