Нацпроект школаларны тыхтирға полысча
04.03.2026
Хабарлар
Хакасияның ӱгредiг паза наука министрiнiң орынҷызы Марина Сагатаева
Ӱгредiг. Iкiнҷi чылы хазнада «Чииттер паза олғаннар» национальнай проект тоғынча. Ол хайди чуртасха кирiлчеткеннеңер Хакасияның ӱгредiг паза наука министрiнiң пастағы орынҷызы Марина Сагатаева чоохтап пирген
«Чииттер паза олғаннар» нацпроект «Ӱгредiг» нацпроекттiң орнына 2025 чылда килген. Андар региондағы нинҷе-де проект кiрче. Полғанының на позының кӧстеглерi пар, хайзыларынҷа ӱгредiг министерствозы тоғыс апарча. Iдӧк министерствоның хайиинда «Сӧбiре» национальнай проект. Аны ол республиканың iстенiс паза социальнай арачыланыс министерствозынаң хада толдырча. Пу нацпроект сӧбiрелерге хабазарына кӧстеглiг.
«Чииттер паза олғаннар» нацпроект иң пурун ӱгредiг организацияларын пӱдiрерге паза нааҷылирға оңдай пирче. Ол санда ортын профессиональнай ӱгредiг учреждениелерiн. Чоохтирға кирек, амға теере СПО-ларға андағ хайығ салылбаҷаң. Амды оларны тыхтирынаң пасха, iдӧк оларның материально-техническай базазы нааҷылалча.
Хайди чарытча Марина Николаевна, ирткен чылда Харатастағы отрасльлар технологиялары техникумына оң полған. Пу нацпроектче аның ӱгредiг корпузы пӱкӱлее нааҷылал парған, пӱӱл, тiзең, общежитиезiнде тыхтағ тоғыстары толдырылар. Чағдапчатхан чылларда ӱгредiг министерствозы пасха даа профессиональнай ӱгредiг организацияларын тыхтирға кӱстенер.
2026 чылда федеральнай кiн «Чииттер паза олғаннар» паза «Сӧбiре» нацпроекттерҷе республикабысха 1 миллиард 400 миллионҷа салковай кӧр салған. Пӱӱл 10 ӱгредiг организациязы тыхталар тiп кӧрiлче, iдӧк ирткен чылда пастаан тоғыстар узарадылар. Хайдағ школаларда тыхтағ тоғыстары апарылар? Таштыптағы 1№ школа-интернатта паза Пиидегi Н.П.Князевтiң адынаң школа-интернатта. Пу ӱгредiг организацияларында тыхтағ тоғыстары чыл тоозылғанҷа толдырыл парарға киректер. Харатас городтағы 1№, Алтай аймаандағы Кӧк хайа, Ағбан пилтiрi аймаандағы Пӱӱр пилтiрi, Ағбан пилтiрi ааллардағы школалар iкi чыл нааҷылалары кӧрiлче. Олған садтарында, тiзең, тиксі тыхтағ пiр чыл апарыларға кирек. «Василёк» (Ағбан г.), «Звёздочка» (Харатас г.), «Буратино» (Алтай аймаа) паза «Звёздочка» (Ағбан пилтiрi аймаа) ӱгредiг организациялары, 2024 чылда федеральнай кiнде ирткен таллағны ирт парыбызып, пӱӱл нааҷылалар.
«Чииттер паза олғаннар» нацпроект хоостыра iдӧк кабинеттерге ӱгредiг тирiглерi алылча. Ирткен чылда ОБЗР (Основы безопасности и защиты Родины) паза труд (технология) кабинеттерiне кирек ниме-ноо алылған, пу чылда ИЗО, музыка паза физика предметтернiң кабинеттерiне техника алылар. Прай 100 азыра школаа оң полар.
Аннаң пасха, нацпроект хоостыра «Земскай ӱгретчi» программа аннаң андар чуртасха кирiлер. Пӱӱл анда аралазарға сағынчатханнарның саны хозылған. 17 ӱгретчi. Хайдағ школаларға ӱгретчiлер кирек? Асхыстағы лицей-интернатха (Асхыс аймаа), Пригорск посёлоктағы, Таштыптағы 2№ школаа (Таштып аймаа), Новотроицкай (Пии аймаа), Копьёв (Орджоникидзе аймаа), Ағбан пилтiрi (Ағбан пилтiрi аймаа), Тазоба пилтірi (Ағбан пилтiрi аймаа) ааллардағы школаларға математика ӱгретчiлерi киректелче, Cорығ городтағы 2№, Хубачардағы (Алтай аймаа), Ширадағы 18№ (Шира аймаа) школаларға – англия тiлi ӱгретчізі, Абаза городтағы 5№ школаа, Аршаннар (Алтай аймаа), Знаменка (Боград аймаа), Солнечнай (Ағбан пилтiрi) ааллардағы школаларға – орыс тiлi паза литература ӱгретчізі, Майнадағы школаа – биология ӱгретчізі.
Таллағ мариинда аралазарға сағынчатханнарға сурыныс пiчiктерiн министерствозар чайғы пасталғанҷа ағыл саларға кирек.
Iдӧк «Экономика данных и цифровая трансформация государства» национальнай проекттiң «Цифровые платформы в отраслях социальной сферы» федеральный проектiнҷе пу чылда 20-ҷе школада WI-FI турғызылар. 2030 чылға теере – 200 азыра.
Хакас национальнай гимназияның наа ӱгредiг корпузынаңар чоохтирға кирегӧк. Ағаа чир тимде. Амды проекттi тимнепчеткен специалисттер пу чирге ӱгредiг корпузын килiстiрчелер. Прай пiчiктер тимнел парзалар, олар федеральнай кiнзер ызыларлар. Ол пiр муң палаа кӧрiл парған.
Пӱӱл школа автобустары iдӧк пирiлер. Республика 14 автобус сахтапча. Аннаң пасха, класс устағҷыларына, кураторларға, ӱгредiг чӧпчiлерiне тӧлеглер пирiлерi паза даа пасха тоғыстар толдырылары узарадылар.
Сом Хакасияның ӱгредiг паза наука министерствозыни
Автор :
Оксана Котюбеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
