Ӱгренҷілер пілістерін сынааннар
04.03.2026
Хабарлар
Олимпиаданың араласчылары
Олимпиада-2026. Пу кӱннерде ХГУ-ның ӧӧн корпузында тӧреен тіллерге чарыдылған олимпиада ирткен
Пістің республикада М.И.Боргояковтың адынаң хакас тілінҷе паза литературазынҷа олимпиаданың паза Россиядағы чоннарның тӧреен тіллерінҷе паза литературазынҷа федеральнай олимпиаданың халғанҷы чардығы пайрамни азылған. Хакас хазна университедінің улуғ залында аның араласчыларына улуғ нимес концерт кӧзіділген. Анда чыылған улусха хакас тілінең сарыннар толдырылғаннар.
– Хазна синінде чыл сай иртчеткен олимпиадада олғаннар пос тілінҷе паза литературазынҷа пілістерін сыныхтапчалар. Анда 8 – 11 класстарның ӱгренҷілері араласчалар. Чоохтирға кирек, тӧреен тіллерге чарыдылған олимпиада пӱӱл хазна синінде пизінҷі хати иртiрілче. Пістің республика анда тӧртінҷізін араласча. Пу чыл хазнабыста олимпиада 54 тілҷе иртче. Ол санда хакас тілінҷе.
Хакас тілінҷе олимпиада ікі чардыхти иртiрілче. Пастап анда пос кӧңнінең кем хынча араласча. Олар интернет пастыра сурығларға нандырчалар. Толдырылған тоғыстар соонаң тӧстегҷілерге Якутиязар ызылчалар. Оларны анда машина сыныхтапча. Анаң иң артыхтары олимпиаданың ікінҷі чардығында араласчалар. Пастағы чардыхта тоғыстар тың сидік нимес. Аның ӧӧн пӧгіні олғаннарны пос тілінҷе сыныхтағларны иртерге кӧніктiрері полча. Ікінҷі чардыхтың, тізең, пӧгіні пасха. Мында піс хакас тілін иң чахсы пілчеткен олғаннарны таап аларға харасчабыс. Аннаңар даа чахығлар сидік арах. Оларның кӧбізі чайаачы тоғыс полча. Ідӧк тілбестеге чарыдылчатхан тоғыстар пар. Ӱгренҷі оларны толдыр полбаза, сыйыхтығ орынға сых полбас.
Олимпиаданың пастағы чардығында 768 пала араласхан. Ікінҷі чардыхха 337 олған сыххан. Че пічікке алылған 300-ке чағын пала. Тиксі хазна синін алза, араласчатханнарның саны хоостыра Хакасия тӧреміл тӧртінҷі орынға сыхча, – теен ХГУ-ның хакас кафедразының улуғ ӱгретчізі Инга Кызласова.
Таныхтирға кирек, хакас тілінҷе паза литературазынҷа олимпиада пістің ӱгренҷілерге вузсар сыныхтағ чох кірерге алай хоза балл тоғынып аларға оңдай пирче. Ӱгренҷілер, тізең, ол оңдайны позытпин, посха вузсар чол азып аларға кӱстенчелер.
Чыл сай тӧреен тілге паза хакас тіліне чарыдылған олимпиада пістің республиканың аймах пулуңнарындағы олғаннарны пір орында чыып алча. Олар анда тӧреен тілін хайди чахсы пілчеткенін кӧзітчелер.
Пӱӱл дее ХГУ-ның улуғ залында илееде ӱгренҷі полған. Оларның ӱчӱн ӱгретчілері матап чӱрексееннер. Шира аймаанаң пис пала килтір. Оларның ӱзі Тоғыр чул аалдаң. Хакас тілі ӱгретчізі Александр Сербигешев олимпиадаа ӱс хызыҷахты тимнептір.
– Минің мында сигізінҷі, тоғызынҷы паза онынҷы класстардаң пірер ӱгренҷі араласча. Пӱӱнгі олимпиадада олар пос пілістерін чахсы кӧзіт пирзіннер. Хайдағ пілістер оларның пары ілезіне сығар. Аның салтарлары пістің алныбыста наа пӧгіннер турғызар. Мин олғаннарға піліс мариинда сыйыхтығ орынға сыххан ӱгренҷее вузсар марығ чох ӱгренерге кіріп алар оңдай пирілче тіп чоохтаам. Минің пір ӱгренҷім хакас кафедразынзар ӱгренерге кірерге сағыс тутча. Пӱӱнгі олимпиада аның пілістер синін чахсы кӧзіт пирер тіп сағынчам, – чоохтаан ӱгретчі.
ХГУ-ның улуғ залында Таштып аймаанаң килген олғаннар аразында Улуғ Сии аалның чиит чуртағҷызы Ева Елисеева полған. Сигізінҷі класстың ӱгренҷізі хакас тілінҷе олимпиадада пастағызын араласчаттыр.
– Мағаа олимпиаданың пастағы чардығын иртiбізерге сидік полбаан. Мин прай сурығларға табырах нандырыбысхам. Марығның ікінҷі чардығына ӱгретчібіс Нина Сергеевна Бурнакова тимнеен. Мин пеер хада ӱгренчеткен ікі арғызымнаң килгем. Прай школадаң піс тӧртӧлең килгебіс. Ізенчебіс, піреезі сыйыхтығ орынға хайди даа сығар,– теен Ева.
Сом Илона Каковани
Автор :
Ольга Томочакова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
