Хакасия хазна правительствозының сан пирізінде адалған
28.02.2026
Хабарлар
Хазна Думазында чыл салтарлары хоостыра правительствоның сан пирізі ирткен. Премьер-министр Михаил Мишустин чооғында президенттің чахиинаң хай пірее регионнарда алынҷа тиліс программалары тоғынча тіп таныхтаан. Хакасия оларның санына кірче.
Россия правительствозының 2024 чылның 12 улуғ хырлазында алылған 3874-р № чарадии хоостыра республикабыстың 2025-2030 чылларға кӧрілген социально-экономическай тиліс программазына 7 ӧӧн мероприятие киріл парған:
‒ промышленность сығарызының «Хакасская технологическая долина» алынҷа экономика орнын тӧстирі;
‒ индустриальнай (промышленнай) парктарны, промышленность технопарктарын паза пӧзік технологиялар кӧстегҷе технопарктарны тӧстирі паза тилідері;
‒ Хакасияның гарантия чыындызына хоза ахча пирері;
‒ Хакасияның промышленность тилізінің чыындызына хоза ахча пирері;
‒ Шира аймаандағы Жемчужнай посёлоктағы турист кінінің ибіркізін иптирі, ол санда проект-смета пічіктерін тимнирі;
‒ республикада туризмні тилідеріне кӧстегліг проекттерге хабазарына субсидиялар пирері;
‒ Алтай аймаанда чуртағҷыларны чарытхы пирҷең сетьтерге піріктірері (Хубачар паза Кӧк хайа аалларда 110/10 кВ подстанцияларын пӱдірері, наа инвестиция проекттері чуртасха кирілчеткені хоостыра чарытхы пирҷең линияларны нааҷылиры).
Программаны чуртасха кирер пӧгіннең республикаа позыдылчатхан ахчаның сині 6 млрд салковайҷа (980 млн салковай 2025 чылда паза пазағы чылларда пірер млрд салковай) полар. Ирткен чылда ахча 6 мероприятиені («Хакасская технологическая долина» алынҷа экономика орнын тӧстирінең пасха) чуртасха киреріне хорадылған.
Таныхтирға кирек, алынҷа тиліс программалары тиксі хазнаҷа ортымахти кӧзідіглердең тӧбін бюджет парыстығ регионнарға тимнелгеннер. Олар социально-экономическай ӧзіске, наа тоғыс орыннарын тӧстиріне паза инвестициялар тартарына кӧстегліглер.
Сом r-19.ru сайттаң
Автор :
Тимнеен Татьяна Кыштымова
| Пн | Вт | Ср | Чт | Пт | Сб | Вс |
| 23 | 24 | 25 | 26 | 27 | 28 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
