Хакасиядағы колониялардаң пір дее кізі тиспеен
27.02.2026
Хабарлар
Хакасия пазы Валентин Коновалов УФСИН-ның пастығы Андрей Мисюранаң хада кӧзідіге сығарылған ниме-нооны кӧрчелер
Коллегия чыылии. Чарғы чарадығларын толдырчатхан федеральнай службаның (ФСИН) Хакасияҷа устааның пастығы Андрей Мисюра ведомствоның ирткен чылдағы тоғыс салтарларынҷа коллегия чыылиин иртірген
Чыылығда араласханнар Хакасия пазы Валентин Коновалов, Ӧӧркi Чӧп кнезінің орынҷызы Михаил Молчанов, Хакасияҷа МВД министрі Владимир Генералов, Хакасия прокурорының тоғызын толдырчатхан Антон Ан, Хакасияҷа УФСБ-ның устағҷызы Алексей Мотовилов, Хакасияның кізі праволарынҷа уполномоченнайы Светлана Могилина паза Хакасияҷа УФСИН-дағы учреждениелернің устағҷылары паза тоғынҷылары.
Хайди искірген Андрей Мисюра, 2025 чылда ведомствоны прай саринаң сыныхтааннар, аның салтарында оларның тоғызын хомай нимеске паалааннар. Амғы туста УФСИН-да 8 учреждение тоғынча, ол санда хатығ, тыыдылған, тиксі режимніг колониялар, имнег частьы, изолятор, СИЗО, iдӧк харибде одырарға чарғылатпаан кізілерні санда тутчатхан инспекция. Колониялардағы кізілер саны 13 % хызырыл парған, инспекцияда санға алылғаннар 25 % хозылған.
УФСИН-ның прай службаларының чахсы тоғызы сылтаанда учреждениелерде правопорядок пӧзiк синде тудылған. Ирткен чылда колониялардаң пір дее кізі тиспеен, кӧп чон араласхан сайбағлар полбаан, чарғылатхан кізілернің аразында сотовай палғалыснаң кӱҷӱрлестер идiлбеен. УФСБ-наң паза МВД-наң хада-пірге тоғыс апарылғанда, экстремизмге паза терроризмге тоғырланар тоғыс тыыдылған. УФСИН-ның тоғынҷылары коллегаларға 370 сайбағны ілезіне сығарарға хабасханнар, ол санда ирткен чыллардағы сайбағларны.
УФСИН-ның учреждениелерінде законностьты паза правопорядокты тыыдар пӧгiннең, чарғылатханнарның праволары сайбалбинчатханын сыбыра сыныхтағда тутханнар прокуратура, Кізі праволарынҷа уполномоченнайның аппарады паза регионның халых комиссиязы.
Ведомство республика правительствозынаң чахсы палғалыс тутча. 2025 чылда регионның паза муниципальнай ӱлгӱ органнарының кирексінiстеріне 40 миллион азыра салковайға 66 хазна паза муниципальнай контракт толдырылған. Таныхтирға кирек, пылтыр прай 287 контракт толдырылған, сығарылған товарларның, толдырылған тоғыстарның паза полызығларның сині 311 миллион салковайдаң асхан, анзы тоғынарға позыдылчатхан прай кізілерге тоғыс пирген.
Чарғылатхан кізілернең ӱгредігліг тоғыс апарарында ӧткін араласханнар религия конфессиялары, культура, ӱгредіг, искусство тоғынҷылары, волонтёрлар паза халых пірігістерi. Марығлар, фестивальлар паза спорт мероприятиелері иртірiлчеткенi чарғылатханнарның ӧмелерінің не нимеc, iдӧк ведомство тоғынҷыларының даа кӧңнілерін кӧдіреріне чахсы хабасхан. УФСИН-ның тоғынҷылары регионның халых чуртазында кибірли ӧткін араласчалар. Ведомствоның командазы «Динамоның» региондағы пӧлиинің кӱс структураларының спартакиадазында пастағы орын алған. Iдӧк УФСИН-ның тоғынҷылары, ветераннары паза чарғылатханнар ӧнетін чаа операциязы зоназында пӧгіннер толдырчатхан чааҷыларға гуманитарнай полызығ чыырында паза ызарында сыбыра араласчалар.
Коллегияның ӧӧн чардығы тоозылчатханда, чыылығ араласчыларынзар Хакасия пазы Валентин Коновалов айланған:
– Республика правительствозының паза УФСИН-ның аразында чахсы палғалыс. Піс чарғылатхан кізілернi тоғысха тартарынаң паза оларға тоғынҷаң орыннар пирерінең, iдӧк оларға социальнай полызығ пирерiнең паза реабилитация иртірерінең палғалыстығ илееде сурығларны пӧкчебiс. Пiстің пӧгінібіс – позыдылған кізілерні аннаң андар чуртасха кӧніктірерi паза хатап иділчеткен сайбағлар санын хызырары. Позыдылчатхан кізілерні регионның чуртас-экономиказына иптеп кирер сурығларны піс хада-пірге пӧгерге кирекпіс.
Пылтыр хада-пірге тоғысты улам алғыдып алғабыс: УФСИН-ның учреждениелері, орындағы производитель полып, школаларға паза олған садтарына мебель садызығларында араласханнар. Анзы піcке нинҷе-де ӧӧн пӧгінні пiр саңай чарадар оңдай пирче – муниципальнай паза хазна учреждениелеріне ниик пааҷа чахсы товарлар аларға хабасча. Мебельдең паза тіккен ниме-ноодаң пасха, ведомствоның учреждениелерінде тимір, тимір-бетон ниме-ноозы, тротуар плитказы, сувенирлер сығарылча, полуфабрикаттар тимнеҷең цехтар тоғынча.
Валентин Коновалов, УФСИН-ның тоғынҷыларын алғыстап, чахсы салтарлар кӧзітчеткеннерге сыйыхтар читірген, iдӧк службада наа чидіглер, кӧрілген планнарны толдырарға алғаан.
Чыылығда iдӧк чоох тудып, постарының сыйыхтарын читіргеннер Хакасияҷа МВД министрі Владимир Генералов, Ӧӧркі Чӧп кнезінің орынҷызы Михаил Молчанов паза Хакасияның кізі праволарынҷа уполномоченнайы Светлана Могилина.
Коллегия чыылииның iкiнҷi чардығы СМИ-лар чох ирткен.
Сом Хакасияҷа УФСИН-ның пресс-службазыни
Автор :
Николай Султреков
| Пн | Вт | Ср | Чт | Пт | Сб | Вс |
| 23 | 24 | 25 | 26 | 27 | 28 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
