СВО матырлары паспорттар читiргеннер
27.02.2026
Хабарлар
Ӱгренҷілер Аттила Табаев, Анна Баскучекова, Альбина Тахтобина, Михаил Тахтараков СВО ветераннарынаң хада
Танығлығ кӱн. Аттила Табаев, Михаил Тахтараков, Анна Баскучекова паза Альбина Тахтобина Н.Ф.Катановтың адынаң хакас гимназияда ӱгренчелер
Оолахтар спортнаң айғасчалар, хызыҷахтар, тiзең, чайаачылар. Аттила косики-каратэ секциязына чӧрче, Михаил – кӱреске. Аннанаң Альбина Хакас Республиканың олған искусство школазының ӱгренҷiлерi полчалар. Анна тимiр хомыснаң ойнапча, Альбина теелбектенче. Прайзы олар маңат ӱгренчелер, спорт паза чайаачы марығларда араласчалар. Iдӧк чииттер Пастағылар чӧрiмiне кiрчелер.
Пу наада олар 14 час толдырдылар. Россия законодательствозы хоостыра пу часха читкеннер хазнаның ӧӧн пiчиин – паспорт – алчалар. Хакас гимназияның оолах-хызыҷахтары аны ӧнетiн чаа операциязының ветераннары холынаң алғаннар.
Танығлығ мероприятие Россияның «Ада чир-суубыс арачылағҷылары» чыындызының Хакасиядағы пӧлиинде ирткен. Андар iдӧк Ағбандағы школаларның ӱгренҷiлерi хығыртылғаннар. Прай 10 азыра пала. Олар даа ӱгредiгде, чайаачыда, спортта паза даа пасха кӧстеглерде пӧзiк чидiглерге читчелер, гуманитарнай полызығ чыырында чахсы полысчалар. Андағ олғаннарны хайди таныхтабас? Чиит оол-хыстарға паспорттарны «Мы – граждане России» тиксi Россия чӧрiмi хоостыра СВО ветераннары Виктор Павлюченко, Евгений Воронков паза Эрик Чумаченко читiргеннер.
– Ӧнетiн чаа операциязы ветераннарының холынаң хазнаның ӧӧн пiчиин аларға уғаа нандырығлығ. Мағаа, тiзең, уламох чӱрексiнiстiг. Минiң пабам СВО араласчызы полча. Андар ол пос кӧңнiнең хаҷанох парыбысхан. Ол пiснең палғалысча, отпускка кил парча. Пiс, аның ӱс палазы, матыр пабабыс ӱчӱн поғдархапчабыс. Аны ибзер хазых сахтапчабыс, – ӱлескен Анна Баскучекова.
Паспорттар аларынаң пасха, чииттер СВО матырларынаң чоох алызып алғаннар. Россияның «Ада чир-суубыс арачылағҷылары» чыындызының Хакасиядағы пӧлии, мындағ тоғазығларны сыбыра иртiрiп, патриотизм тоғызын маңат апарча. Пу тусха 300 азыра пала 30 азыра СВО матырының холынаң паспорт алған.
Сом авторни
Автор :
Оксана Котюбеева
| Пн | Вт | Ср | Чт | Пт | Сб | Вс |
| 23 | 24 | 25 | 26 | 27 | 28 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
