Гимн паза флаг таа чох Россия ӱчӱн турысчалар
27.02.2026
Хабарлар
Кӱмӱc призер Никита Филиппов
Олимп ойыннары-2026. Пістің нейтральнай атлеттернің пір кӱмӱс медаль. Аны ски-альпинист Никита Филиппов утып алған
Кӱӱлеп-суулап ирт парыбысты Хысхы Олимпиада Миланда паза Кортина-д’Ампеццода. Нименең ол ӧріндірген, таңнатхан? Хайдағ сағыстар артысхан? Пілдіcтіг, нинҷе кізі – ол син кӧріс. Норвегиядағылар Йоханнес Клебоның чидіглеріне поғдархапчалар. Спортсмен саналығ чӱгӱрісче амды 11 хати олимп чемпионы полча. Піреезі Ютта Лердамның (Нидерланды) пӧзік узына саңай аптаттыр салған. Сылағай хыс, конькиліг чӱгӱріп, 1000 метрні 1 минута 12,31 секундаа тобырған. Ол – олимп рекорды. Утырызынаң таңнатхан фигурист Илья Малинин (США). Пу сезонда чиит кізі соон сӱрістіре 14 марығда чиңіc тутхан. «Ыырҷылары» азынада ікінҷі паза ӱзінҷі орын ӱчӱн харбазарға тимненчеткеннер. Че фигурист, произвольнай программада пис улуғ алҷаас ит салып, 8-ҷі орында пол парған.
Россия чуртағҷыларының пасха сағыссырас. Ікінҷі Олимпиада изере пістің спортсменнер тилекейнің иң улуғ мариинда нейтральнай атлеттер чіли араласчалар. Ол статусты даа алып аларға сидік. 2024 чылда Парижте 15 кізее кӱс сынир оңдай пирілген, пӱӱл, тізең, пас меетке 13 ле оол-хыс сыхты. Итсе, салтарлар андағох. Парижте теннисист хыстар Мирра Андрееванаң Диана Шнайдер, хада-пірге ойнап, кӱмӱс медаль утханнар. Миланда ски-альпинист Никита Филипповха оң полды. Ол спринтте ікінҷізі полыбысхан. Чир-суғҷыбыстың чидиин чиңіснең тиңнестірерге чарир.
Ски-альпинизм – наа спорт кӧрімі, аны ідӧк скимо тіп адапчалар. Ол Олимп ойыннарының программазынзар пастағызын на кирілген. Камчатка крайынаң сыххан Никита Филиппов скимонаң 14 частығдаң айғас парир. Россияда ол хаҷаннаң пастағы номерге саналча. Филипповха талаан полған тирге чарир. Ски-альпинизмҷе чоннар аразындағы федерацияның чарадиинаң ол 2025 чыл тооза тилекей марығларында узын кӧзіткен. Пӱӱл кӱрген айында спортсмен Тилекей кубогында ікі хати хола медаль утхан, амды Олимпиадада – ікінҷі орын. Тимненіс тикке парбады.
Пасха спортсменнернің андағ оңдайлар полған полза, нейтральнай даа статустығ олар сыйыхтығ орыннарға сығарҷыхтар. Савелий Коростелёв скиатлонда азах меетке тӧртінҷізі читкен, марафонда – пизінҷізі. Аделия Петросяннаң Пётр Гуменник конькиліг хоос чыларында алты иң кӱстіг фигуристтер санына кіргеннер. Специалисттер Аделияның узына пирілген паалағнаң чарасханнар. Че Пётрны чарғыҷылар хыйыхтап салғаннар. Іди тренерлер дее, кӧрігҷілер дее санапчалар. Ол произвольнай программаны морсымнығ толдырыбысхан.
Интернетте Олимпиада ибіре чоохтар кӧп чӧрче. Ӧӧн cурығ: мындағ оңдайларда кирек пе марығлазарға? Піреезі спортсменнер, медальлар сӱрізіп, садыныбысханнар тіп санапча. Олимпиадада кӱс сынирға хайди даа кирек. Тиктең нимес ол тилекейнің иң улуғ марии полча. Чир-суғҷыларыбыс, сыйыхтығ орын чох халзалар даа, ырахха саблан парғаннар. Алында нинҷе кізі фигурист Пётр Гуменниктеңер искен? Амды аймах хазналарның чуртағҷылары чиит спортсменнің ӱчӱн турызарға тимделер. Кӧрігҷілер, Пётрның узын тӧбін паалаан чарғыҷыларны социальнай сетьтерде таап, оларнаң саңай тартыс парирлар. Гуменникті трибунадағы чон на нимес, пасха фигуристтер чылығ удурлааннар. Олар аннаң хада тилекей первенстволарында тӧреміл марығласчаңнар нооза. Аделия Петросяннаңар пір танығ. Таланттығ хысты Олимп ойыннарында Армения ӱчӱн турызарға хығырғаннар. Ол ынабаан. Андағ кізіні cадынған тирзiң ме? Никита Филиппов прайзын ски-альпинизмнең таныстырған. Амды скимоҷа cекцияларда пала тол парар.
Истерге киліскен: 2024 чылда кізілер Россияның командазы Олимпиадада араласпинчатханын сизінмин дее халғаннар. Анзынаң чаразарға килісче. Парижте 10,5 муң спортсмен пас меетке сыххан, Олимп ойыннарына 209 хазна піріктірілген командаларын ысхан. Че Миланда араласчылар саны 3 муңа даа читпеен, аннаңар пістің спортсменнер марығласпинчатханы харахха тасталған. Ағаа хоза Россия хысхы спорт кӧрімнерінің ӧӧн кіннерінің пірcі полча. 2022 чылда Пекинде чир-суғҷыларыбыс медальлар санынаң прайзын ас парыбысханнар.
Сизінгенде, прай спортсменнер Миланнаң чалахай кӧңніліг айланғаннар. Итсе, Никита Филиппов сах андох арғыстарынаң хада теестегі марығларға чӧрібіcкен, Савелий Коростелёвнаң Дарья Непряева аннаң андар саналығ чарысча Тилекей кубогында аралазарлар. Хомзынысха, Петросяннаң Гуменникке конькиліг хоос чыларынҷа тилекей чемпионадында кӱс сынирға чаратпааннар. Арға-мӧрій 23 – 29 кӧрікте иртер.
Чахсы хабарлар парох. 6 – 15 кӧрікте Паралимпиада полар. Анда Россиядаң 6 кізі араласча. Олар флагтығ паза гимнніг марығлазарлар. Итсе, пасха хазналарның делегациялары Паралимп комитедінің ол чарадиина матап тоғырланчалар.
Сом интернеттең
Автор :
Майя Кильчичакова
| Пн | Вт | Ср | Чт | Пт | Сб | Вс |
| 23 | 24 | 25 | 26 | 27 | 28 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
