Пірге тоғыс тыыдылар
18.02.2026
Хабарлар
Тоғазығда тӱзiмнiг пiрге тоғыс узарадылары ӱзӱрiлген
Тоғазығ. Хакасия пазы Валентин Коновалов Сбербанктың Ағбандағы пӧлиинің устағҷызы Дмитрий Полулехнең тоғасхан. Тоғазығда пірге проекттерні паза пастағларны мыннаң мындар чуртасха кирердеңер чоох парған
Хакасия правительствозы паза Сбербанк хаҷаннаң хада-пірге тоғыс апарчалар. Регионда амғы тусха килістіре технологиялығ пӧгіннер тӱзімніг толдырылчалар. Олар ЖКХ сферазында, хазых хайраллирында, туризмде паза транспортта полызығлар аларын нииктепчелер. Пірге проекттер ідӧк промышленностьта, энергетикада, кічіг паза ортын бизнесте, аал хониинда чуртасха кирілчелер.
Хакасия пазы паза Сбербанктың Ағбандағы пӧлиинің устағҷызы 2025 чылның салтарларын кӧрібіскеннер паза аймах-пасха кӧстеглерҷе мыннаң мындар пірге тоғынҷаң оңдайларны ӱзӱрібіскеннер.
Хазых хайраллирында кізілер хазиин ыраххыдаң сыныхтир сервис, ол ирткен чылда кирілген, тӱзімніг тоғынарын узаратча. Сбербанк тоғынчатхан платформаның функцияларын алғыдыбызарға пӧгінче.
Халых чонны тарт чӧрҷең транспортта чонға чорых ӱчӱн тӧлеҷең «Геопей» тоғынып пастабысхан: карта чох, навигация приложениезі полызиинаң тӧлирге чарир. Полызығ сағам троллейбустарда ла тоғынча. Сбербанк аны автобус паркына алғыдыбызарға сағыс тутча.
«Чуртағҷы картазы» проектті чуртасха кирері хоостыра аны алғыдыбызары паза картазар «Спорт хости» сервис кирібізері кӧрілче.
Регион экономиказынзар арған сағысха тӧстеніп тоғынчатхан технологияларны кирер сурыға алынҷа хайығ cалылған.
Таныхтирға кирек, ӱр ниместе правительствоның порталында чуртағҷыларның ЖКХ сурығларынҷа айланыстарын тоғысха алчатхан Чат-бот тоғын пастабысхан, ол Сбербанктың «GigaChat» базазына тӧcтеніп тимнелген.
Банктың планында – культура учреждениелерінде экскурсия тузында ӱнніг полысчы функциялығ GigaChat-тың арған сағызын кирері. Ол чоохты піл полар паза сурығларға нандырар.
Тоғазығда искірілген прай пастағлар Сбербанкнаң хада читіре тоғынылар паза оларны чуртасха кирерінҷе чӧптер тимнелер. Хакасия пазы ол кирек хоостыра республика правительствозының профильліг министерстволарына киліcтіре чахығлар пирген.
– Піс тӧстелген пірге тоғысты мыннаң мындар алғыдарын кирексіпчебіс. Киртінчем, салтарлар полар паза мындағ удур-тӧдір тузалығ партнерство пістің регионны мыннаң мындар тилідер, – таныхтаан Валентин Коновалов.
Дмитрий Полулех, позы саринаң, Хакасия пазына паза республика правительствозына ӱр чыллар пірге тоғынчатханы ӱчӱн алғызын читірген паза пу тӱзімніг пірге тоғысты узарадарға тимдезінеңер искірген.
Сом r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
