Турғызылған прай пӧгіннер толдырылған
18.02.2026
Хабарлар
Хакасияның ГО, ЧС паза ПБ хазна комитедiнiң кнезi Владимир Карамашев ирткен чылдағы тоғыс салтарларынаңар сан пирiс тутча
Сан пиріс. Хакасияның ГО, ЧС паза ПБ хазна комитедінің кнезі Владимир Карамашев республика пазы Валентин Коноваловтың алнында хазна комитедінің ирткен чылдағы тоғыс салтарларынҷа сан пиріс тутхан
Хакасия пазы Валентин Коновалов пӱӱл часхыда суғлар чайыларынаң паза ӧрттер сығызарынаң хорғыстардаңар чоохтап, Владимир Карамашевке хазна комитедінің ирткен чылдағы тоғыс салтарларынаңар паза хорғыстарға азынада тимненер планнаңар искiр пирерге чахаан.
Хайди хазна комитедiнің кнезі искірген, республика чонын паза чирлерін хорғыстығ киректердең арачылиры хазна комитедінің ӧӧн пӧгіні полча. Республикада суғлар чайыларынаң паза ӧрттер сығызарынаң палғалыстығ киректер чыл сай полчалар. Техногеннай саайлар даа поларға айабас. Хазна комитедiнің ӧӧн полномочиелерінің пiрсі республиканы хорғыстардаң арачылир сферада нормативнай право акттарын тимнирі полча. 2025 чылда андағ 77 акт тимнелген, ол санда 62 чарадығ паза чахығ.
Iдӧк комитет ӱс комиссия тоғындырча: ЧС-ча комиссияны, кізілерні кӧдірҷең комиссияны паза тӧреміл тоғынчатхан аттестация комиссиязын.
Кибірли ӧӧн хайығ салылча часхыда суғлар чайылчатса паза ӧрттер сығысчатхан туста сағыбаан саайлар полдыртпазына. Андағ пӧгіннең 2025 чылда кӧп мероприятие иртірілген, планнар тимнелген, суғ кірчеткен ааллар списогы орталадылған, нинҷе кӱс паза техника киректелері кӧрiл парған, оларнаң ӱгредіглер паза тренировкалар иртірiлген.
Суғларда пус тығылызар орыннарда чара чачырадыс тоғыстары апарылған, ааллар ибіре ӧрттер иртірбес полосалар тартылған паза нааҷылалған. Че 2025 чылда прай киректер оой полбааннар. Iди кӧрік айында чылығ кӱннер турыбысханда, наңмырлар чағанда паза хар хайыл сыхханда, cуғлар тӧбiн орыннарзар, чолларзар, тротуарларзар, туралар хыринзар, дачаларзар кір сыхханнар. Сілкер айында Абазада суғ тың кӧдірiлген, Абаза – Арбыт чолға суғ кiрген. Че чурттарға суғ кірбеен.
Ӧрттер сығарынаң хорғыстығ туста регион синінде пір ЧС чарлалған. Пис хосхар айында хазыр чил полғанда (аның кӱзі секундада 32 метрге читчеткен), аалларда чарытхы ӱзілген, тура хырлары сайбалған. Республикада пір кӱнде 60 ӧрт сыххан, олар аалларға хорғыс ағылғаннар. Чонны арачылир тоғыс апарылған, ӧрттердең тоғыр режим кирілген. Ӧрттерні аалларзар позытпас ӱчӱн улуғ тоғыс апарылған. Республиканың резерв фондынаң хыйалға кірген кізiлерге 4,440 миллион салковайға полызығ пирілген.
Хакасияда чонны сағыбаан саайлардаң арачылир хазна программазы тоғынча. 2025 чылда аны чуртасха киреріне 822,794 миллион салковай позыдылған, ол санда ӧрттердең хорғыс полдыртпазына – 542,249 миллион салковай. Ӧрттер санын хызырар пӧгіннең муниципальнай пӱдістерде уйан чуртапчатхан паза кӧп палалығ сӧбiрелернің тураларында ыс сыхчатханнаңар искірҷең приборлар турғызар тоғыс апарылған. Пылтыр андағ 635 прибор турғызылған.
Суғларда кізілерге хорғыс чох полдырар план чарадыға алылған. Кӧп чон полчатхан орыннарда арачылағҷылар посттары турғызылған. Пылтыр андағ 16 пост тоғынған. Арачылағҷы матростар тимнир программаҷа 13 кізі ӱгредіг ирткен. Суғларда 15 кізі саайланған, анзы 2024 чылдағызынаң 12 процентке асхынах.
Сан пирісте пасха даа саннар кӧп адалған.
2026 чылға пӧгіннердеңер чоохтаза, ӧӧнi суғлар чайылар паза ӧрттер сығызар тусты иптіг иртіреріне азынада тимненері. Iдӧк Хакасияның ӧрт ӱзірҷең хадаан тилідер программаны чуртасха кирерiнҷе тоғысты узарадарға кирек.
Владимир Карамашев сан пирізін тоосханда, Хакасия пазы позының кӧрізін читірген:
– Пӱӱл кӧп ниме хайдағ кӱннер турарынаң палғалыстығ полар. Ӧрттер сығызар тусха чахсы тимненерге кирек, ааллар ибiре ӧрт иртірбес чоллар тартарға, оларны нааҷылирға киректелче. Орындағы ӱлгӱлернең палғалыс тудып, суғлар чайыларына оларнаң хада тимненіс тоғыстарын апарарға. Планға кирілген прай мероприятиелер толдырыл парзын. Оой полбас, азынада тоғыс апарарға кирек. Пылтыр, хосхар айы пасталчатханда, ӧрттер киреенең уғаа сидік полған. Хазыр чил улам харығ полған. Прай ӱлгӱ органнарының, службаларның, чуртағҷыларның хада-пірге тоғызы сылтаанда піс сыдасхабыс. Кирек 2015 чылдағызынаң даа сидік полған.
ГО, ЧС паза ПБ хазна комитедiнің ӧмезіне алғыс читіріңер, – теен Валентин Коновалов.
Сом Хакасия пазының пресс-службазыни
Автор :
Николай Султреков
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
