Пас меетке 1500 кізі cыххан
17.02.2026
Хабарлар
«Россияның сана чолы» – чоннарны піріктірчеткен чӧрім
Чӧрім. Хакасияның чуртағҷылары «Россияның сана чолы-2026» кӧп чон араласчатхан чарысха хозылғаннар
Кӧп чон араласчатхан саналығ чарыс – кибірліг мероприятие. Ол 1982 чылдаң тархынын апарча. Пiстің республика тиксі хазнадағы чӧрімге 2009 чылда хозылған. Алында спорт акциязы Хакасияның нинҷе-де ле муниципалитедінде иртчең полза, халғанҷы туста кізілер прай город-аймахтарда «Россияның сана чолына» чыылысчалар. Чӧрімде пӧзік устығ спортсменнер дее, саналарға наа ла турыбысхан улус таа кӱзін сынапча.
Хакасияның физическай культура паза спорт министерствозының чарадиинаң «Россияның сана чолы» чарыстың ӧӧн пас меедін, теестезіп, аймах муниципалитеттер удурлапчалар. Пір чыл ол Хакасияның ӧӧн городында ирткен, анаң Шира аймаана теес читкен, Саяногорск чӧрімге хозылғанох. Пӱӱл пазох Ағбанға ӧӧн пас меетті удурлир ӱлӱс тӱсті. Чарыс городтың 95 чылына паза Россияның чоннары пірікчеткен чылға чарыдылған.
Чарыс Ағбанның тынағ паркында ікінҷі тахта кистінде ирткен. Чылығ кӱннер турыбысханда, хар хайыл парар тіп чочыныс полған. Чох. Паркта чахсы чӱгӱрҷең чол салылых. Хурчағның узуны – 2,5 километр. Евгений Чертыков мында неделя сай саналығ чӱгӱр чӧрчеттір. Чир-суғҷыбыс уйан исчеткен палаларның школа-интернадында 14-ҷі чылы ӱгретчі-организатор полып істен парир. Хайди таныхтаан Евгений Алексеевич, школаның ӧмезі аймах мероприятиелерде аралазарға хынадыр. «Россияның сана чолы» – ӱгретчілернің паза ӱгренҷілернің иң хынчатхан акциязы. Пӱӱл чарыста 25 кізі араласча, иң кічіг спортсмен 2-ҷi класста ӱгренчеттір. Чертыков, школада тоғынып, саналығ чӱгӱрерге ӱгреніп алтыр. Евгений Алексеевич теен:
– Хада хонғанымнаң ӧткін тынаға хынчабыс. Пос туста конькиліг, роликтіг чӱгӱр чӧрчебіс. Оолғыма 13 час, аны спортха тартчабыс.
Аркадий Ултургашев чуртазын кӱс структураларынаң палғалыстырыбысхан. Чир-суғҷыбыс тоғыста спорт нормативтерін тӧреміл толдырча. Аркадий Кузьмич таныхтаан:
– Саналығ чӱгӱр чӧрерге кӧңніме кірче. Позым 1982 чылдаңмын, аннаңар рекордтар турғызарға хазиим читпес. Пӱӱн 10 километр тобырарға пӧгінчем. Чарысха чарым час парыбызар, неке. Пеер неделяда пір хати килчем. Арығ кии, чӱгӱрҷең чахсы чол. Чӱгӱріc cоонда ол-пу сағыстар сах андох парыбысчалар. «Россияның сана чолы» чӧрімде пизінҷі чылы аралас парим. Палаларымны хада алып аларға иткем. Че олар пу туста школада ӱгренчелер.
Чарыс 11.45 часта пайрамни азылған. Чоох тудып, чыылған чонзар айланғаннар Хакасияның спорт министрінің тоғызын толдырчатхан Дмитрий Сафронов, Ағбанның пазы Алексей Лёмин паза чоннар аразындағы класстығ спорт узы, Хакасияның саналығ чарыс федерациязының президенті Пётр Макарчук. Прайзы чӱгӱріc оой иртсін тіп алғаан.
«Россияның сана чолы» чӧрімде ӱc дистанция кӧрілген: 100 метр, 5 паза 10 километр. Кибір хоостыра иң пурун пас меетке кічіглер сыхханнар. Олған садынзар чӧрчеткен иркеҷектер иң хысхаҷах дистанцияны маңзырабин ирткеннер. Палаларның піреезі саналарға пастағызын на турған нооза. 5 километрні 2009 чылда тӧрееннер паза олардаң часха кічіглер тобырғаннар. Ооллардаң чиңіc тутхан Иван Глухов (Ағбан), Cтепан Шваргонов (Шира аймаа) ікінҷі орынға сыххан, Роман Павлов (Шира аймаа) – ӱзінҷі орынға. Хыстардаң оң полған Алёна Сипкинаа (Таштып аймаа), кӱмӱc медальны Валерия Канзычакова (Таштып аймаа) холға кирген, Ангелина Опрокиднёва (Шира аймаа) ӱзінҷізі полыбысхан. 10 километр дистанцияда ағбандағылар пірдеезіне чол пирбееннер. Михаил Сорокин паза Кристина Кузьмина чемпион полыбысханнар, Владислав Хамидулин паза Илона Кужакова кӱмӱc медальлар утханнар, Константин Атрощенко паза Лариса Буханова – хола медальлар.
Хакасияның спорт министерствозының искіриинең, 14 азығда тиксі республикада чарысха 1500 артиинаң кізі cыххан, Ағбанда – 350 спортсмен. Ширадағылар спорт акциязын 22 азығда иртірерлер.
Сом Илона Каковани
Автор :
Майя Кильчичакова
| Пн | Вт | Ср | Чт | Пт | Сб | Вс |
| 23 | 24 | 25 | 26 | 27 | 28 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
