Наа чыл хайхастары тоозылғалах
16.02.2026
Хабарлар
Хакасия пазы Валентин Коновалов Ярослав паза Артём Ахметгареевтернең
Чӧрім. Пу наада Хакасияның правительство туразында республика пазы Валентин Коновалов, «Ёлка желаний» полызығлығ чӧрiмде аралазып, Артём Ахметгареевке сыйых читiрген
Улуғ хырлас айында тиксi Хакасияда «Ёлка желаний» полызығлығ чӧрiм иртiрiлiп пасталған, ол 28 азыға теере иртче. Аны Пастағылар чӧрiмi Россияның чииттер киректерiнҷе федеральнай агентствозы хабазиинаң иртiрче. Анда ӱс частығдаң сығара 17 часха теере сидiк чуртас оңдайларына кiр парған, хазии уйан, кинек, чуға чуртапчатхан сӧбiрелердегi, iҷе-пабазы хайии чох халған олғаннар паза СВО араласчыларының палалары араласчалар. Олған-узахтың сағынған сағызы сыбы чазанҷыхтарында пазылған. Оларны республиканың полған на чуртағҷызы толдыр полар оңдайлығ.
Валентин Олегович чӧрiм пастыра iкi паланың сағызын толдырарға чарат салған. Пастап Наа чылға удур пизiнҷi класстың ӱгренҷiзi Милана хызыҷахха сыйыхха 3D принтер читiр пирген. Амды республика пазы Артём Ахметгареевтiң сағызын толдырча. Артём – 15 час толдыр салған саарбах, хазии уйаннаңар пасха олғаннар чiли тус иртiр полбинча. Ол кӧп тус компьютер кистiнде иртiрче. Аннаңар Наа чылға iдӧк 3D принтер сыйыхха сурған.
– Пӱӱн уғаа ӧрiнiстiг кирек. Мағаа Артёмның сағынған сағызын толдырарға оң полды. Мин пiлчем, син компьютернең айғасчазың, аннаңар пу сыйых сағаа тузалығ полар тiп iзенчем. Аның полызиинаң ойнаҷахтар, сувенирлер паза пасха даа ниме-ноо идерге чарир. Ол сағаа пiлiстерiңні алғыдарға паза тилiдерге полызар тiп сағынчам. Мыннаң мындар, пӧгiннер турғызып, чуртастағы сидiксiнiстернi тобырып, пӧзiк чидiглерге чидерге кӱстен, – алғыстастар алғап, сыйыхты читiрген Валентин Коновалов.
Правительство туразынзар Артём пабазы Ярослав Ахметгареевнең хада килген. Сыйых читiрiлген соонаң республика пазы Ахметгареевтер сӧбiрезiнең чоохтасхан. Пiлдiстiг, сӧбiре чуртазында сидiксiнiстер чох полбинча, Ярослав Фаритович Валентин Олеговичсер iкi сурыныснаң айланған.
– Артём Ағбандағы 27 № школада ӱгренче, азыранчатхан ӱчӱн компенсация алча. Че пӱӱл ол пирiлгелек, хаҷан пирiлерiн сурчабыс, че нандырығ чоғыл. Хайдағ сылтағнаң тудығ полчатханын паза пу сурығ хаҷан пӧгiлерiн пiлiп аларға чарир ба?
Iдӧк пiстiң сӧбiребiстiң ӧӧн сағыссыразы – ол чурт сурии. Пiстiң пос чурты чоғыл, квартираны арендаа суурчабыс. Iҷе капиталын хозып, чир участогын алып алғабыс. Пӱдiрiнер кӧңнiбiс пар, че ахчанаң сидiксiнiстер, арса, пiстiң сӧбiребiске хазна хабазығларынаң полызар оңдай пар. Пӱдiрiг материалларын алып алза ла, тоғыс парарҷых, – чоохтаан Ярослав Ахметгареев.
Валентин Коновалов, iкi сурығ хоостыра ведомстволығ органнарзар айланыстар тимнеп, сурығларны пӧкчең оңдайларны кӧрер тiп iзендiрген. Чурт суриин пӧгерiне ағас хонии, icтенiс паза социальнай арачыланыс министерстволарынзар айланып, республика синiндегi хабазығларны санға алып, хабасчаң оңдайларны кӧрерлер.
Артём читiрiлген сыйыхха уғаа ӧрiнген, 3D принтернең ол тузалан кӧрбеен, че ол хайди тоғынчатханын теория саринаң оңарча. Хайдағ ниме-ноо идерге пӧгiнчеткенiн чарытпаан, че пӱӱнӧк ит кӧрер кӧңнiнең ӱлескен. Ахметгареевтер сӧбiрезi «Ёлка желаний» полызығлығ чӧрiмде пастағызын на араласпаан. Тӧрт чыл мының алнында Артёмға сыйыхты Россияның Федерация Чӧбiнiң Хакасиядаң сенаторы Александр Жуков читiрген. Ол ағаа ноутбук сыйлаан. Пiлдiстiг, ол оолағасха уғаа киректелген. Артём школада ибдең сығара ӱгренче.
Хайди таныхтаан сӧбiре пазы Ярослав Фаритович, Артёмның хазии уйан даа полза, олар прай сӧбiренең тынанарға чӧрерге кӱстенчелер. Ирткен чайғызын олар Шира аймаандағы чапсых чирлерде пол килгеннер.
– Чайғызын хайди даа чир-суубыстағы кӧллерзер чит пар килерге кӱстенчебiс. Пылтыр чайғызын Шира аймаандағы «Тойымдағы ойым» турист комплексiнде, «Сундухтар» музей-заповедникте пол килгебiс. Палалар iди тынанарға чӧрерге хынчалар, – чоохтаан Ярослав Ахметгареев.
Cом Дмитрий Сунчугашевти
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
