СВО араласчыларына
11.02.2026
Хабарлар
Лев Кайдараков – «Агромотиватор» грант алған пастағы фермер
Хазна хабазии. Россияның аал хонии министерствозы «Агромотиватор» грантты 2025 чылдаң пирiп пастаан
Пу хазна хабазии СВО араласчыларына кӧрiлген. Аннаң идiнҷектерге, кресен (фермер) хоныхтары пастарына паза чуртастарын аал хониинаң палғалыстырарға сағынчатхан олаңай чуртағҷыларға тузаланарға чарир.
Хакасияда «Агромотиватор» грантты пастағызын КФХ пазы Лев Кайдараков алған. Ол Асхыс аймааның Кызлас аалында чуртапча. Ирен 2022 чылның ӱртӱнiнде чардыхти мобилизацияа тартылған, 2023 чылның улуғ хырлас айында службазын тоосхан. Махачызы ӱчӱн II степеньнiг медальнаң таныхтатхан.
Фермерге пирiлген хазна хабазииның синi 7 миллион салковайға тиңнелген. Фермер материально-техническай базазын пиктеп алған паза иттiг породалығ тӧл салҷаң чиит малны садысхан.
– Хазна хабазии полызиинаң мал санын 50 пасха теере ӧскiрiп алғам, – чоохтаан СВО ветераны. – Iдӧк мин кӧп син отты тимнирге полызар ниме-нооны – «Беларус» тракторны, пресстi, косилканы, тырбосты – садызып алғам. Че грантты алар алнында мин киреем килiзер бе, чох па тiп сананғам – малны хадарар паза от сабар чирiм читкiҷе бе, проекттi чуртасха кирерге позымның ахчам чидер бе тiп.
2026 чылда «Агромотиватор» грантты пирер сурығ «Ада чир-суубыс арачылағҷылары» фондтың республикадағы пӧлиинiң устағҷызы Оксана Трусованың паза Хакасияның аал хонии паза ас-тамах министрiнiң пастағы орынҷызы Александр Башковтың тоғазиинда ӱзӱрiлген.
Министерство чӧбiнең, «Ада чир-суубыс арачылағҷылары» фондтың араласчылары ведомствоның специалисттерiнең хада ӧнетiн чаа операциязы араласчыларында пол килерлер. Олар грантты алар кирексiнiстердеңер чоохтирлар паза тузалығ чӧптер пирерлер.
Iди, грантты алып алар ӱчӱн, проектте аралазарға сағынчатхан кiзiнiң аал хониин апарарға чарадылчатхан позының алай пис чылдаң асхынах нимес тусха арендаа алылған чир пар поларға кирек. Iдӧк аның материально-техническай базазы, аал хониинда тоғынған опыды паза позының ахчазы (пирiлчеткен ахчаның 10 %-нең асхынах нимес) поларға кирек.
Пӱӱл СВО ветераннарына кӧрiлген хазна хабазиин аларына сурыныс пiчiктерiн чылның iкiнҷi кварталы пасталыбысса алып пастирлар. Амғы тусха грант аларға сағынчатханнаңар читі кiзi искiрген.
Сом r-19.ru сайттаң
Автор :
Хакасияның аал хонии паза ас-тамах министерствозының пресс-службазы
| Пн | Вт | Ср | Чт | Пт | Сб | Вс |
| 23 | 24 | 25 | 26 | 27 | 28 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
