Чааҷылар пілістерін алғытчалар
11.02.2026
Хабарлар
«Хакасия матырлары» проекттiң араласчызы Юрий Нербышев
«Хакасия матырлары» проект. Пу наада региондағы кадрлар проектінiң араласчылары ікінҷі модульҷа ӱгредiгнi узаратханнар
Ирткен чылда кӱскӱзін пістің республикада ӧнетін чаа операциязында араласчатхан чааҷыларға паза ветераннарға «Хакасия матырлары» проект тоғынып пастаан. Амды аны хоостыра ХГУ-да 20 азыра чааҷы «Хазна паза муниципальнай устағ. Хакасия матырлары» кӧстегҷе хоза ӱгредіг алча.
ХГУ-ның кадрлар квалификациязын кӧдірер, пасха даа специализацияа тимнир институттың директоры Татьяна Толмашованың таниинаң, проект араласчылары 2025 чылның 15 ӱртӱнiнең сығара чыл тоозылғанҷа аймах министерстволарда паза ведомстволарда, стажировка иртіп, пілістерін алғытханнар. Проектте араласчатхан полған на чааҷының кураторы министр алай аның орынҷызы полча. Стажировка ирткен соонаң киҷеегі чааҷылар постарының тоғызы хоостыра сан пиріс тимнееннер.
Пӱӱл 26 кӱргеннең сығара 5 азыға теере кадрлар проекті араласчылары «Экономика паза финанстар» ікінҷі модульҷа ӱгредiгнi узаратханнар. Занятиелер кӱнзіре ирткеннер. Лекцияларны оларға пӧзік пілістіг, пос профессиязын чахсы пілчеткен ӱгретчілер апарғаннар. 9 азығдаң пасти проект араласчылары аймах министерство-ведомстволарда ікінҷі хати стажировка иртчелер. Паза киҷеегі чааҷылар диплом тоғыстарын пазып пастирлар.
Чоохтирға кирек, «Хакасия матырлары» проект тиксі тӧрт модульдаң пӱтче: пастағызы – хазна политиказы паза хазна устаа, ікінҷізі – экономика паза финанстар, ӱзінҷізі – хазна паза муниципальнай устағ, тӧртінҷізі – саннығ экономика. Ол хоза ӱгредіге 514 час пирілче.
Ікінҷі модуль тоғынып пастаанда, піс регион синіндегі проекттің хай пірее араласчыларынаң чоохтазып алғабыс. Оларның санында Юрий Алексеевич Нербышев, «Хакасия матырлары» кадрлар проектінiң араласчызы полча.
– 2022 чылның кічіг хырлас айында контракт пазыбысхам. Повестка килген соонаң мин СВО-зар 2023 чылның кӱрген айының халғанҷы кӱннерінде парыбысхам. Ноға мин контракт пазыбысхам? (Кӱлiніп, позының суриина нандырча. – Авт.) Парбин поларға чарабас полған. Ол туста чаада чат халған оолларны ибзер ағыл сыхханнар. Чон аразында ӧнетін чаа операциязынаңар ла чоохтар парғаннар. Мин ол туста Асхыс аймаандағы Калининдегі ортымах школада тоғынғабын. Ӱгретчілер дее аразында чоох аннаңар ла полған. Сағынып, сағынып, посха чарадығ алыбысхам.
Пісті кічігдеңӧк сығара пос хазназына хынарға ӱгреткеннер. Экранға сыхчатхан киноның кӧбізі Илбек Ада чаадаңар полған. Армия службазын мин 1987 – 1989 чылларда ирткебін, улуғ сержант званиелiг айланғабын.
Сынны чоохтаза, мағаа уғаа сидік полған иң чағын кізілеріме позымның сағызын паза чарадиимны читір пирерге. Пастап аар полған. Че тус ирт парғанда, олар мағаа чӧлег полғаннар. Улуғ частығ іҷем чолға сығар алнында мағаа ир кізі чир-суун арачылирға кирек тіп чоохтаан. Андада ол мағаа чолымны ас пирген тирге чарир.
Андар читкенде, мин штурм бригадазынзар кір парғам. Анда позымнаң чазыт илееде иреннең танызып алғабын. Олар минӧк чіли, чир-суубыс ӱчӱн турызарға чарадып, чааҷы чолын таллап алғаннар. Піс анда прайзы ынағ чуртаабыс. 2023 чылның хосхар айында мин палығлат салғабын. Госпитальда чатхам. Аның соонаң мині чазым хоостыра демобилизовать полыбысханнар.
Амыр чуртассар айланғанда, мин «Матырлар тузы» федеральнай программада аралас кӧрерге чаратхам. Анда аралазар ӱчӱн таллағ иртіп аларға киректелген. Ол таллағны мин прай иртiбіскебін. Че нандырығ чох полған. Федеральнай проект тоғын сыххан соонаң пістің регионда «Хакасияның матырлары» проект азылған. Анаң анда аралас кӧрерге чаратхам. Прай таллағларны маңнаныстығ ирт парыбызып, мин проект араласчызы пол парғам. Сынны чоохтаза, пу уғаа чахсы паза тузалығ проект. Пастағы модульда хазна законнарын тирең ӱгренгебіс. Посха кӧп тузалығ искіріг алып алғабын. Практиканы Хакасияның Табығ комиссиязында ирткем. Мин, школада тоғынчатханда, кӧп чыл табығлар комиссиязының кнезі полғам. Аннаңар пу кӧстегні таллап алғам. Ол тоғыста законнарны чахсы пілерге кирек. Ӱгретчілер полған на чааҷының суриина тирең, чарыда нандырчалар, – теен киҷеегі чааҷы.
Сом Илона Каковани
Автор :
Ольга Томочакова
| Пн | Вт | Ср | Чт | Пт | Сб | Вс |
| 23 | 24 | 25 | 26 | 27 | 28 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
