Садығлар киреенде чахсы кӧзiдiглер
04.02.2026
Хабарлар
Хазна комитедінің кнезі Владимир Петров
Сан пирiс. Ирткен неделяда Хакасияның садығлар киреенде контракт системазын оңдайлирынҷа хазна комитедiнiң кнезi Владимир Петров республика пазы Валентин Коноваловха комитеттiң 2025 чылдағы тоғызының салтарларынҷа сан пирiс иткен
Пылтыр Хакасияның садығлар киреенде контракт системазын оңдайлирынҷа хазна комитедi 10119 садығ процедуразын иртiрген. Оларҷа контракттарның пасталығ иң пӧзiк паазы тиксi 13,5 млрд азыра салковайға тиңнелген. Идiлген контракттарның халғанҷы паазы 12,6 млрд салковайҷа пол парған. Мындағ оңдайнаң, 951,7 млн салковай бюджет ахчазы ӱзӱрлелген, проценттерге айландырза, ол 7 %.
Садығ киреендегі пiрге искiрiг системазының саннарынҷа, ӱзӱрлелген ахча синi хоостыра Хакасия Сибирьдегi федеральнай округтың регионнары аразында 6-ҷы орында пол парған, тиксi Россияның субъекттерi аразында – 22-ҷi орында. Владимир Дмитриевич пу уғаа чахсы кӧзiдiм тiп таныхтаан. Хазнабыста садығларда ӱзӱрлелген ахча синiнiң ортымахти кӧзiдии 4,85 %-ке тиңнелчеттiр.
Хазна комитедiнiң специалисттерi садығларда аралазарға сағынчатханнарның 13849 сурыныс пiчиин кӧргеннер, олардағы читпестернi чох идер ӱчӱн 10120 протокол тимнелген.
Iдӧк комитет хада-пiрге садығларны иртiрче, оларда пiр товарны, полызығны кирексiпчеткен нинҷе-де чахығҷы, пiрiгiп, араласча. 2025 чылда 1,3 млрд салковайға чағын 2233 андағ садығ иртiрiлген, оларда 82 млн азыра салковай ӱзӱрлелген.
Хазна комитедi 2025 чылда хада-пiрге садығларҷа ал полар ниме-нооның кӧрiмнерiнiң изерiзiн алғыдыбысхан, iди ирткен чылда хара тасты садызар аукционнар пастағызын на иртiрiлгеннер. Мындағ оңдайнаң 8,3 млн азыра салковайға хара тас алылған. Мыннаң мындар хада-пiрге садығлар синiн уламох ӧскiрерге пӧгiнчелер.
2025 чылда Хакасияның правительствозы хазна комитедiнiң положениезiнзер кӧнi садығлар иртiрерiнеңер алызығларны кирiбiскен. Комитеттiң тоғыс оңдайлары алғыдылған сылтаанда садығ процедуралары азых иртчелер, чӧптезiглернiң тузында паза чахсы толдырылары хайығда тудылча. Прай пу ниме ахчаны хоза ӱзӱрлир оңдай пирче.
Iдӧк Владимир Дмитриевич улуғ нимес синнiг садығларның электроннай садығ-туразының паза «Витрина товаров, работ и услуг» проекттiң тоғызынаңар чоохтаан. Пу платформалар кiчiг паза ортын пос киреенең айғасчатханнарға, ол санда орындағы сығарығҷыларға, садығларда аралазар оңдай пирче. 2025 чылда пу платформаларда 278 млн салковайға 2187 чӧптезiг идiлген. «Витрина товаров, работ и услуг» платформада ирткен чылда орындағы сығарығҷыларның 501 товары сығарылған, оларның санынаң 71 сығарығҷы «Хакасияда идiлген» бренднең тузаланча. Валентин Коновалов товарларны, полызығларны садысчатхан хазна паза муниципальнай чахығҷыларнаң, олар электроннай садығ туразынаң паза витринанаң ӧткiн тузаланзыннар тiп, тоғысты алғыдарға паза орындағы сығарығҷыларны «Хакасияда идiлген» брендке хозыларға кӧӧктiрерiне хайығ айландырарға кирек тiп таныхтаан.
Хакасияның садығлар киреенде контракт системазын оңдайлирынҷа хазна комитедi хазна паза муниципальнай чахығҷыларға читiрiлчеткен ас-тамахты хайығда тударынҷа тоғысты апарча. Пу пӧгiннең специалисттер Роспотребнадзорның Хакасияҷа устанызынаң хада конференциялар иртiрчелер. Оларда чахығҷыларға читкен ас-тамахты сыныхтирынҷа, экспертиза иртiрерiнҷе паза претензиялар тимнирiнҷе методика чӧптерi тимнелген.
Iдӧк комитет республиканың аал хонии паза ас-тамах министерствозынаң хада Хакасияның хазна паза муниципальнай учреждениелерiнзер ағылылчатхан чиистiң качествозын сыныхтирынҷа улуғ тоғыс апарған. Ол чахығҷыларның паза качествозы хомай ас-тамахты сатхан поставщиктернiң хада-пiрге тоғызын тӧремiл хайығда тутча. Иртiрiлген сыныхтағлар чахығҷыларның претензия тимнирiнҷе тоғысты чахсы апарчатханын кӧзiткеннер. Уйан качестволығ товар табырах айландырыл турған, аны чахсы чииске алыстыр турғаннар.
Хазна комитедi пасха даа кӧстеглерге чарыдылған мероприятиелер иртiрче. Iди ирткен чылда садығларны орта иртiрерiне, оларнаң палғалыстығ сидiксiнiстерге чарыдылған тӧрт улуғ конференция иртiрiлген. Оларда iдӧк хонҷых регионнарның – Туваның паза Хызылчар крайының ӱстӱнзархы аймахтарының – специалисттерi араласханнар. Паза Хакасия комитедiнiң тоғынҷылары муниципальнай чахығҷыларға тимнелген семинарларнаң тоғыс чорығына сигiс хати чӧргеннер.
Хазна комитедi Хакасияның пасха даа организацияларынаң, структураларынаң хада-пiрге тоғысты апарча. Оларның санында Хакасияҷа УФСИН паза УФАС. УФСИН аймах товарларны паза полызығларны пирче, ол санда мебельнi, ағастаң паза тимiрдең идiлген ниме-нооны, тоғыста кизер кип-азахты сығарча. Чылдаң чылға республикада УФСИН-наң тоғынчатхан хазна паза муниципальнай чахығҷыларның саны ӧзiп одырча.
УФАС-наң тоғынарынаңар чоохтаза, ирткен чылда Хакасияда иртiрiлген 10 муң азыра садығ процедуразына 93 хоп кiрген. Хазна комитедiнiң кӱстенiзiнең оларның 53-i сылтаа чох пирiлгенге саналған.
Хакасияның хазна комитедi, Россияның контракт системазынаңар законодательствозында сайбағларны полдыртпас ӱчӱн, национальнай паза федеральнай проекттерҷе садығларны чарлалған тустох сыныхтапча. 2025 чылда 234 садығ иртiрерiнеңер айланыс сыныхталған, оларның санынаң 66 сурыныс пiчии (28,2 %) алҷаас чох тимнелген, пасхазында (71,8 %) ол-пу читпестер табылғаннар. Тузында иртiрiлген тоғыс национальнай паза региональнай проекттернi чуртасха тӱзiмнiг кирер оңдай пирген.
2025 чылда садығларны иртiрерiнҷе 358 муниципальнай сурыныс пiчии сыныхталған. Оларны пiрiктiрерiнҷе тоғыс апарылча, пӱӱнгi кӱнде Хакасияның 10 муниципальнай пӱдiзiнең чӧптезiглер тимнелген.
Iдӧк комитет устағҷызы «Сибирское соглашение» регионнар аразындағы ассоциациянаң тоғыс хайди апарылчатханынаңар искiрген. Ирткен чылда республикабыста садығ иртiрерiне чарыдылған улуғ мероприятие пастағызын на иртiрiлген. Анда СФО-ның садығлар киреенде контракт системазын хайығда тутчатхан прай даа органнарның устағҷылары араласханнар.
Хакасияның хазна комитедi iдӧк ХГУ-наң пик палғалыс тутча. Аны хоостыра «Юриспруденция» кӧстеге «Правовое регулирование государственных закупок» дисциплина кирiлген, «Государственная и муниципальная служба» профильде студенттернi хазна комитедiнiң специалисттерi ӱгрет парчалар. Iдӧк специалисттер магистр диссертацияларын пасчатханнарның наука устағҷылары полчалар паза экзаменационнай хазна комиссиязына кiрчелер. Мындағ оңдайнаң, садығ киреенде тоғынчатхан кiзiлернiң узы тӧремiл кӧдiрiлiп одырча. Iдӧк чиит специалисттернi тартарынҷа тоғыс апарылча. Iди ӱгредiг ирткен iкi студент ведомствозар тоғысха алылған.
Паза хазна комитедiнiң кнезi Владимир Петров Валентин Коноваловха 2026 чылға пӧгiннердеңер хысхаҷахти чоохтаан. Ол мыннаң мындар муниципальнай чахығҷыларны пiрiктiрерiнҷе, оларға чӧптер паза хабазығ пирерiнҷе тоғыс узарадылар тiп таныхтаан. Iдӧк «Сибирское соглашение» ассоциациянаң, ХГУ-наң, ХакИРО и ПК-наң паза пасхазынаң даа хада-пiрге тоғыс пиктелер тiп кӧрiлче.
Сом r-19.ru cайттаң
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 1 |
Кӱн таңмазы
Хакасияда
Россияда
Тилекейде
