Наа чиңіcтерге чол азылзын
04.02.2026
Хабарлар
Хакасия пазы Валентин Коновалов чоох тутча
Спорт. Алтай аймаандағы Аршаннар аалында Кӱрес туразын пайрамни асханнар
Саблығ спортсменнер
Аршаннар аалында спортха хынчатхан чон чуртапча. Грек-рим кӱрезінҷе секция мында 1978 чылдох тоғынып пастаан. Итсе, тренерлер паза спортсменнер спортзал чох иреелентірлер. Халғанҷы 20 чыл тренировкалар иргі мылча полған орында иртчеңнер, марығлар – аалдағы Культура туразында. Сидік тее оңдайларда тренерлер чемпионнарны тимнеҷеңнер.
Кӧзідімге, Аршаннарда улуғ спортсар пастағы хаалағлар иткеннер олаңай кӱресче Россияның чоннар аразындағы класстығ cпорт узы Семён Уксеков паза грек-рим кӱрезінҷе Россияның спорт узы Вугар Пиримов. Ікізі дее тренер Вячеслав Конгаровтың холында харбазып пастаан. Амғы туста Уксеков Новосибирскте тренер полып істенче. Хомзынысха, Вугар Пиримов изен нимес, чиитке чуртастаң парыбысхан. Кӱресчі 1998 чылда Россия первенствозында чиңіc тутхан, тилекей первенствозында хола призер полыбысхан. Ідӧк Пиримов – Грецияда паза Швецияда ирткен чоннар аразындағы турнирлернің чиңісчізі.
Грек-рим кӱрезінҷе СССР-ның спорт узы Владимир Токояковты алынҷа таныхтирға кирек. Чир-суғҷыбыс, Хызылчар крайындағы Подтёсово поселокта чуртап, Анна ипчізінең хада спорт кӱрезінҷе секцияны апарча. Ирепчінің тӧрт палазы кибiсте ӧcкен тирге чарир. Улуғлары – 20 частығ Карина, 16 частығ Станислав паза 14 частығ Варвара, кӱреснең айғазып, тӧремiл сыйыхтығ орыннарға сыхчалар. Карина пылтыр Чарковтың турнирінде 50 кг кӧдірімде чиңіс тутхан, Станислав пу наада Сибирьнің первенствозында ӱзінҷізі полыбысхан.
Пӱӱнгі кӱнде Аршаннарда Олег Торбостаевтің кӱстенізінең олаңай кӱрес чахсы тиліпче. Олег Константинович – СССР-ның спорт узы, тренер тоғызына 37 чыл пир салған. Тӱзiмніг тоғызы ӱчӱн 2025 чылда ол «Хакасия физическай культуразының паза спортының саблығ тоғынҷызы» аарластығ атха турысхан. Чир-суғҷыбыс пір Россияның спорт узын тимнеп салған. Амғы ӱгренҷілерінең Кира Бурцеваны адирға чарир. Саарбах ирткен чылда Россия первенствозында ӱзінҷі орынға сыххан. Марығда 16 часха читкелектер кӱс сынааннар. Секцияа 50 артиинаң пала чӧрчеттір. Олег Торбостаев Ирина Аршанованаң хада тоғынча.
Кӱрес туразында Хакасия спортының таңдағызы харбасча
Толған сағыс
Кӱстіг спортсменнер чиңіcтерінең тӧреен чирін ырахха сабландырчалар. Че наа чемпионнарға истіг оңдайлар кирек. Спортзал сурии кӧп кізіні cағыссыратхан. 2022 чылда Алтай аймааның пазы Ирина Войновазар ол туста Аршаннардағы аал чӧбінің пазы Леонид Сыргашев айланған. Ікі пастых чоохтас салтыр: Леонид Николаевич проект-смета пічіктерін (ПСД) тимнепче, Ирина Войнова ахча тілепче. Пічіктер тимниріне сигiс ай парыбысхан, сыныхтағны иртеріне – пір чылға чағын. ПСД 2024 чылда чарыс айында толдыразынаң тимде полған. Аның соонда Ирина Войнова Майрых разрезінзер ахча сурап айлантыр. Хара тас аныҷаң предприятие Аршаннардағы аал чӧбінің бюджедінзер пір cаңай 88 миллион салковай позытхан, олардаң 63,9 миллион салковай Кӱрес туразын пӱдіреріне кӧрілген. Че 2025 чылда наа чобағ пол парған. Азығ айында, 66 чазын апарчадып, ах чарыхтаң парыбысхан Леонид Сыргашев. Тоғыс тохтадылбаан. Хосхар айында аукцион иртірілген, подрядчикке «Хакасгражданстрой» компания табылған. Аннаң устапча Олег Манжула. 15 хосхарда наа спорт объектi пӱдірілер орында ӧрге сапханда, Ирина Войнова сӧс пирген: Кӱрес залы Леонид Сыргашевтің адын ал чӧрер.
Леонид Николаевичтің орнына Антон Подкопаевті турғысханнар. Іди Антон Юрьевичке зал пӱдіриинең айғазарға киліскен. Чиит специалист сыдасхан. Cпорт объектi пылтыр 30 улуғ хырласта тимге сыххан. Аны 30 кӱргенде пайрамни асханнар.
Тура пайрамы
Нап-наа объекттерні кӧрерге хаҷан даа ӧріністіг. Олар ӱлгӱдегілер муниципальнай пӱдістің таңдағызына киртінчеткенін киречілепчелер нооза. Кӱрес залы Культура туразынаң ырах нимес орныхчаттыр. Ол пір хадыллығ, табырах пӱдірілчеткен объект полтыр. Аның улии – 723 квадрат метр. Кӱрес туразында улуғ чарых зал пар. Анда ікі кибіс чазыбызарға чарир. Спортсменнерге кип-азах алыстырҷаң ікі орын, туалеттер паза душ кӧрілген. Тренерлерге паза имнег киреенің тоғынҷыларына алынҷа пӧліктер пар. Залда потолоктар пӧзік нимес, аннаңар волейбол паза баскетбол ойнап полбас. Че cпорт кӱрезінең пасха мында мини-футболҷа, боксча, гиря кӧдірерінҷе, самбоҷа, каратеҷе секциялар тоғындырарға чарир. Пеер чағынғы аалларның олғаннарын тренировкаларға тарт чӧрерге паза аймах спорт кӧрімнерінҷе марығлар иртірерге пӧгінчелер. Пір сӧснең, наа объект толдыра кӱзінең тоғынар. Аннаңар прай даа аалҷылар чоохтанғаннар.
Кӱрес залын пайрамни азарында кӧп кізі араласхан, оларның санында Хакасия пазы Валентин Коновалов. Улуғ пастых иділ парған тоғысха пӧзік паалағ пирген. Хайди таныхтаан Валентин Олегович, Алтай аймааның устағ-пастаа, бизнеснең хада-пірге маңнаныстығ тоғынып, муниципалитеттің чуртазын чахсыландырарға, чонға истіг оңдайлар тӧстирге кӱстенче. Правительство адынаң Валентин Олегович ікі кӱрес кибізін сыйлап пирген. Оларны азынада тӧзебіскеннер. Ідӧк чоох тутханнар Ӧӧркі Чӧбінің чииттер политиказынҷа, туризмҷе, физическай культураҷа паза спортча комитедінің кнезі Александр Пащенко, Ӧӧркі Чӧп депутады Денис Филатов, УФСИН-ның Хакасияҷа пастығы Андрей Мисюра паза пасхазы. Полған на аалҷы сыйых иткен.
Че Ирина Войнованы истерге иң чӱрексіністіг полған. Ирина Ивановна Кӱрес залы хайди пӱткенiнеңер искірген. Чооғының халғанҷызында ол чыылған чонға организацияның ады пазыл парған чардыны кӧзіткен. Анда орыс паза хакас тіллерінең Кӱрес залы Леонид Сыргашевтің адын ал чӧрчеткені пазылых. Алтай аймааның устағ-пастаа секцияа чӧрчеткен прай палаларға харбасчаң триколар сыйлап пиртір. Алынҷа сыйых Кира Бурцеваа тимнеп салтырлар. Саарбахха хысхы куртканы паза ыстанны читір пиргеннер. Хызыҷах тӱрчедең Россия первенствозында пазох кӱс сынир. Анда ағаа оң ползын.
Аймахтың ӱлгӱзі, наа объекттер пӱдіріп, аалдағыларның кирексінiстерін хайығда тутчатханы уғаа чахсы. Амға теере спорт кӱрезінҷе турнирлерде ӧӧнінде аалдаң сыххан спортсменнер сыйыхтығ орыннарға сыхчалар. Анзын пӱӱл кӱрген айында ирткен арға-мӧрійлер киречілепчелер. Грек-рим кӱрезінҷе Сибирь первенствозында 18 часха читкелектернің аразында сыйыхтығ орынға турысханнар Айвар Султреков (Пыдырах), Руслан Торточаков (Асхыс чоғархы) паза Виктор Чаптыков (Пуланнығ кӧл). Сибирь мариинда 21 часха читкелектернің аразында чиңіc тутханнар Аймир Карамчаков паза Денис Чернов. Чернов Ағбанда тӧреен-ӧскен, Карамчаков, тізең, Асхыс поселокта харбазып пастаан. Ярыгин турнирінде Хакасияның ӱчӱн турысханнар Наталья Малышева, Наталья Пудова, Алина Сагалакова паза Артур Чебодаев. Олар олаңай кӱресте кӱстерін сынапчалар. Пазох прайзы аалдаңнар: Малышева Улуғ Сиидең, Пудова Ылырсыдаң, Сагалакова Киндірліг пилтірінең, Чебодаев Пилтірдең. Аршаннардағылар олардаң халбасха киректер. Наа залдаң хайди даа спорт «чылтыстары» сығар, оларға чиңіcтерге чол азылар тіп ізенчебіс.
Сомнар Дмитрий Сунчугашевти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 1 |
Кӱн таңмазы
Хакасияда
Россияда
Тилекейде
