Наталья Малышеваның хола медаль
04.02.2026
Хабарлар
Чоннар аразындағы класстығ спорт узы Наталья Малышева
Арға-мӧрій. «Иван Ярыгиннің кубогы» чоннар аразындағы турнирде 21 хазнаның кӱресчілері кибіске сыхханнар
Кибір хоостыра кӱрген айында Хызылчарда «Иван Ярыгиннің кубогы» марығ иртче. Турнирде аралазары – спортсменнерге улуғ чеес. Анзын араласчылар саны даа киречілепче. Пӱӱл арға-мӧрійде 496 кізі кӱзін сынаан: 322 ирен паза 174 ипчі. Ол син кӱресчі Хызылчардағы кибісте пастағызын на чыылысты. Ол рекорд полча.
Хакасиядаң турнирде тӧрт спортсмен араласхан: чоннар аразындағы класстығ спорт устары Наталья Пудова (50 кг), Наталья Малышева (53 кг), Артур Чебодаев (57 кг) паза Россияның спорт узы Алина Сагалакова (50 кг). Азынада пілдістіг полған: медальлар ӱчӱн харбазығ хазыр парар. Салтарында ӱзінҷі орын ӱчӱн харбасханнар Наташа Пудова паза Наташа Малышева.
Тӧӧ чирінең сыххан Пудова кічіг финалда Валерия Тюкпиекованаң тоғасхан. Валерия – шор чонның хызы, кӧп чыл Кемеров облазы ӱчӱн турысхан. Кӱреске хынчатханнар аны хыс фамилиязы – Чепсаракова – хоостыра таныпчалар. Иң улуғ чидии – Европа чемпионадында чиңіc тутханы. Амғы туста, тренер Владимир Чучуновтың холында узын таптап, Пермь крайы ӱчӱн турысча. Валерияның узы пӧзік полтыр, ол 1989 чылдаң даа полза, марығлардаң медальлар чох айланминча. Ярыгин турнирiнде ағаа iдӧк оң полған. Ол Пудованы чиңiп алған.
Марығның оргкомитедінің искіриинең, иреннернің аразында иң кӧп араласчы 74 кг кӧдірімде полған, 40 кізі харбасхан. Ипчілернің илеедізі – 29 абахай – 53 кг кӧдірімні таллап алтыр. Пір сӧснең, Наталья Малышеваа хатығ чуххан. Азах меетте тоғасханнар Хьогьонг Чое паза Кйон Рйон Ох. Ікізі дее Алтынзархы Кореядаң. Хола медаль ӱчӱн харбасханнар Ариузая Одончимег (Монголия) – Отгонтуя Баянмункх (Монголия) паза Сакибжамал Есбосынова (Узбекистан) – Наталья Малышева (Хакасия). Пу кӧдірімде чир-суғҷыбыс Россия спортсменнерінең чалғызан медаль ӱчӱн харбасхан. Ол «ыырҷызын» 6:0 саннаң утып алған.
Хакасияның физическай культура паза спорт министерствозының таниинаң, «Иван Ярыгиннің кубогы» марығда Европа чемпионадына таллағ парған. Пістің кӱресчі хыстар арға-мӧрійде аралазарлар ба тiп соонаң искірерлер.
Сом r-19.ru сайттаң
Автор :
Майя Кильчичакова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 1 |
Кӱн таңмазы
Хакасияда
Россияда
Тилекейде
