Хазна хабазии ас-тамах сығарызына полысча
21.01.2026
Хабарлар
Хазна хабазии аймах кӧстеглерге пирілче, ол санда тӧлліг чиит маллар садызарына субсидия
Аал хонии. «2026 чылға паза 2027, 2028 чыллардағы план тузына республика бюджедiнеңер» Хакас Республиканың Законында пӱӱл аал хонии ниме-ноозын сығарчатханнарға хазна хабазии кӧрiл парған, ол санда федеральнай бюджеттең 604,5 миллион салковай позыдылар
«Аал хонииның кiчiг пос киреенiң тилiзi» федеральнай проектке паза «Отрасльларның тилiзi паза аал хонии промышленность комплексiнiң техническай модернизациязы» регион проектiне иң кӧп ахча хорадылар.
2026 чылда наа аал хонии техниказын паза оборудование аларына субсидияларға регион бюджедiнде 172,5 миллион салковай кӧрiл парған, аалдағы хоныхтарға хабазарына – 160 миллион салковай.
2026 чылдаң сығара кресен (фермер) хоныхтары паза аал хонии кооперациялары тилiзiне субсидиялар паза гранттар пирiлчеткенi «Аал хонииның кiчiг пос киреенiң тилiзi» наа федеральнай проекттiң чардыхтары полыбысханнар. Олох проектсер фермер хониин алчатхан СВО араласчыларына паза ветераннарына хазна хабазии (11,2 миллион салковай) кірче.
Аал хонии промышленнозы комплексiнiң ӧӧн кӧcтеглерiне хабазар субсидияларға 134 миллион салковай кӧрiл парған. Чоох парча пу хабазығлардаңар:
– мал паза ӧзiмнер ӧскiрерiнде аал хонии страхованиезi;
– тӧллiг паза тiзi маллар ӱчӱн (тiзi мал ӱчӱн субсидиялар синi 11 миллион салковайға ӧс парған);
– элитнай ӱреннер сығарызы;
– тӧллiг чиит маллар садызары (хабазығның тиксi синi iкi хати ӧс парған – 5 миллион салковайға теере);
– аал хонии технология тоғыстарын иртiрерi;
– кiчiг паза ортын пос кирее предприятиелерiнiң сӱт сығарызы (9,9 миллион салковай).
Ине хойлар ӱчӱн ахчалығ хабазығның орнына амды хойларны тiрiге соғымға сатхан ӱчӱн хабазығ пирiлер (23,8 миллион салковай). Iди хазна аал хонии ниме-ноозы регион iстiнде садылзын тiп кӧрiске хабасча.
2026 чылда тоңастығларны ӧскiрерiнде паза садарында хорадығларның чардығын айландырарына 12,6 миллион салковай позыдылар.
Хакасияның аал хонии паза ас-тамах министрi Сергей Труфановтың таниинаң, ӱстӱнде адалған хабазығларға ахчаның чардығы федеральнай бюджеттең пирiлер.
Хазна хабазиин аларына кирексiнiстер хатығлалчатса даа, 2026 чылда республика аал хонии промышленнозы комплексiне федеральнай субсидиялар паза гранттар синiн 305,8 миллион салковайға теере ӧскiрiбiзер оңдай тапхан.
– Аал хонии ниме-ноо сығарызынаң айғасчатханнарға хазна хабазии пирiлчеткен сылтаанда, аалдағы чонның чуртас синi ӧсче, чахсы ас-тамах сығарылча паза аал хониинда наа тоғыс орыннары тӧстелче, анзы регионның чуртас-экономика тилiзiне паза ас-тамах читкiҷе сығарыларына ӧӧн оңдай полча, – таныхтаан Сергей Труфанов.
Сом Дмитрий Сунчугашевти
Автор :
Хакасияның аал хонии паза ас-тамах министерствозының пресс-службазы
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 1 |
Кӱн таңмазы
Хакасияда
Россияда
Тилекейде
