Олаңай ла профессия нимес, сын чайаачы тоғыс
14.01.2026
Хабарлар
«Хакас чирі» газетаның сыйых алған тоғынҷылары: Анатолий Султреков, Оксана Котюбеева, Татьяна Тютюбеева, Наталья Тюкпеева, Оксана Челтыгмашева, Альберт Толмашов
Печать кӱні. Киҷее, 13 кӱргенде, Россияның печать кӱнінде Хакасия пазы Валентин Коновалов республикадағы СМИ тоғынҷыларын чеестеен
Республика правительствозының чыылығлар иртірҷең улуғ залында пу кӱнде журналисттер кӧп чыылыс парғаннар. Хакасия пазы Валентин Коновалов республикадағы печать изданиелерінің, телевидение паза радио компанияларының, хабарлар агентстволарының устағҷыларын паза тоғынҷыларын профессия ӱлӱкӱнінең алғыстаан паза сыйыхтар читірген.
– Аарлығ арғыстар, алғыстапчам сірерні Россияның печать кӱнінең, – айланған Валентин Коновалов чыылысхан хабарҷыларзар. – Пу кӱнде чеестепчебіс кізілерні, хайзыларының істенізі олаңай ла профессия нимес, ол сын чайаачы тоғыс. Сірер пістің чуртағҷыларны республикада, хазнада полчатхан прай киректернең таныстырчазар, оларны оңарып аларға хабасчазар. Ол уғаа кирек паза нандырығлығ тоғыс. Сірер кізілерге ниме сын, ниме тайма полчатханын піліп аларға полысчазар. Паза алынҷа алғыс сӧстерін читірчем журналистика ветераннарына. Сірер аның тӧстеен салғазар, чииттерге опыдыңарны, пілістеріңні пиргезер паза ам даа пирчезер!
Анаң сыйыхтас пасталған. Хакасия пазы Валентин Коновалов республикадағы СМИ-ларның 30 азыра тоғынҷызын сыйыхтаан. Сыйыхтарның ӧӧн чардығы Илбек Чиңістің 80 чылына чарыдылған марығнаң палғалыстығ полған. Пу марығда утханнарға Хакасия правительствозының алғыстас пічиине хоза танығлығ хол чазы читірілген.
Сыйыхха турысханнар санында «Хакас чирі» газетаның хабарҷылары полғаннар: ӧӧн редактор орынҷызы Альберт Толмашов (Хакасия пазының алғыстазы), хабарлар пӧлии редакторы Анатолий Султреков (Хакасия правительствозының алғыстас пічии паза хол чазы), ӱгредіг пӧлии редакторы Оксана Котюбеева (Хакасия правительствозының алғыстас пічии), экономика пӧлии редакторы Оксана Челтыгмашева (Хакасия пазының алғыстазы), культура пӧлии редакторы Татьяна Тютюбеева (Россияның Журналисттер пірігізінің Аарластығ пічии), социальнай политика пӧлии редакторы Наталья Тюкпеева (Россияның Журналисттер пірігізінің Аарластығ пічии).
Валентин Коновалов сыйых алғаннарға чахсы тоғыстары, пӧзік устары паза иң ӧӧні тоғыста сынға турысчатханнары ӱчӱн алғызын читірген.
Россияның Журналисттер пірігізінің (СЖР) Хакасиядағы пӧлиинің устағҷызы Ольга Ширковец позының паза СЖР кнезі Владимир Соловьёвтың адынаң прай хабарҷыларны профессия ӱлӱкӱнінең алғыстаан.
– Пістің алныбыста улуғ пӧгін, піс олаңай ла хабарҷылар нимеспіс нооза, піс миссионерлербіс, – таныхтаан Ольга Ширковец. – Пӱӱн Россия оой нимес туста чуртапча. Піснең, журналисттернең, кӧп ниме палғалыстығ: хайди піс ол прай сидіксіністерні тобырарбыс, кемнең хада, хайдағ баррикадаларда піс поларбыс, кемнің кирексіністері ӱчӱн турызарбыс.
Аның кӧрізінең, амғы аар туста Чир-суубысха хабарҷыларның хабазии тың киректелче. Сын журналисттер пос хазназынаң хада поларға, аның кирексіністері ӱчӱн турызарға киректер тіп таныхтаан ол.
Сом Дмитрий Сунчугашевти
Автор :
Иван Тинников
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
