«Аскизский труженик» полған на чуртсар читсiн
14.01.2026
Хабарлар
Сол саринаң: турчалар А.А.Кутукова, А.В.Кичеева, В.А.Иванова, С.С.Кузнецова, С.Г.Чертыкова, одырчалар: А.Н.Чаптыкова, М.К.Ахпашев, Е.П.Иптышева
Печать кӱнi. Киҷее, 13 кӱргенде, хазнабыстың хабарҷылары профессия ӱлӱкӱнiн, Печать кӱнiн, таныхтааннар. Пу кӱнге удур пiс Асхыс аймаандағы «Аскизский труженик» газетаның ӧӧн редакторы Евгения Иптышеванаң чоохтазып алғабыс
– «Аскизский труженик» газетаны кӧп кiзi хынып хығырча. Пазынчатханнарның хайиин хайди тартып алчазар?
– Пiстiң газетаа ӧӧнiнде ортын паза улуғ частығлар пазынчалар. Олар муниципалитет icтiнде чуртас хайди иртчеткенiн пiлер ӱчӱн, пiс Асхыс аймааның прай пулуңнарынзар чит пар килерге кӱстенчебiс, иң ыраххы аалларзар даа чорыхнаң сыхчабыс. Анда пiс чаа палаларынаң, СВО араласчыларынаң, тыл iстенҷiлерiнең тоғасчабыс. Аннаң пасха, пiстiң газетада ТОС-тарның, аал хонии тоғынҷыларының тоғыстарынаңар паза пасха даа кӧстеглердеңер хығырып аларға чарир. Пiстiң ӧӧн пӧгiнiбiс – газета страницаларында сыхчатхан материаллар прайзына тузалығ паза хынығ полары: ӱгретчiлерге, имҷiлерге, тынағдағыларға, чииттерге паза пасхазына даа.
– Газета хығырығҷының холына кiрер алнында хайдағ кiзiлернiң холынҷа иртче? Пасха сӧcнең, кем газетаны тимнепче?
– Пiстiң газета неделяда пiр хати сыхча. Ол тимге сығар алнында илееде кiзiнiң холынҷа иртче. Редакцияның ӧмезiнде чииттер дее, улуғ частығлар даа пар. Олар прайзы пӧзiк пiлiстiглер, улуғ опыттығлар. Чоохтирға кирек, газетаа статьяларны хабарҷылар ла паспинчалар, пiстiң полған на тоғынҷы – ол хабарҷы, сомҷы, корректор, верстальщик, пасха даа тоғыс толдырча тирге чарир. Полған на специалист аны-мыны ит полча, водитель ле позының тоғызын толдырча полар, неке (хатхырча. – Авт.). Пiр сӧснең, пiстiң сӧбiре улуғ даа полбаза, пiс уғаа ынағбыс, удур-тӧдiр полызысчабыс.
Газета тимненiзi хабарҷыдаң пасталча. Редакцияда иң илееде чыл тоғын салғаннарның санында Анна Алексеевна Кутукова. 70 час алтабысхан даа полза, чапчаң тоғынча. Ол редакцияда тоғынып пастаанда, типография пасха орында полған. Ол туста газета неделяда ӱс хати сыхчаң. Хайди удаа чоохтапча Анна Алексеевна, ол тоғынып пастаан туста хабарҷылар, иирде ааллардаң килiп, хараа статьялар пазып, иртен пасха чорыхха сых турҷаңнар.
Пiс аның сағызына уғаа хайхапчабыс. Ол хайдағ чылда аймахтың устағ-пастаа кем полғанын, хайдағ танығлығ киректер хаҷан полғанын прай оңнапча.
Анна Алексеевна аймахтың турыстығ чуртағҷыларынаңар маңат пасча: культура, спорт, имнег тоғынҷыларынаңар. Аның материаллары хаҷан даа толдыра полчалар. Пiрее ниме пiл полбин халза, таныстарынаң сурча, интернетте тiлепче. Газетада ол прай тоғыстар толдырған: ӧӧн редактор, нандырығлығ хачы, корректор, хабарҷы полған. Хайдағ даа тоғыста тоғынза, аны матлама толдырча.
Хабарҷы Виктория Анатольевна Иванова аалларзар сығарға, чоннаң чоох алызарға уғаа хынча. Ол, орыс таа полза, хакас тiлiн ӱгренерге матап сiренче. Пiрее аалда туразар кiрзе, чурт ээзi, орыс омалығ кiзiнi кӧрiп, аннаң орыс тiлiнең изеннесче, Виктория Анатольевна, тiзең, аннаң хакастап изеннесче паза позынаң хакас тiлiнең чоохтазарға сурынча.
Виктория Иванова, статьялар пазарынаң пасха, газетаа iкiнҷi чуртас пирче. Ол газетаны ибірiп, аннаң аймах ниме-ноо итче. Кӧзiдiмге, iдiс-хамыс. Тыс пiлбес хабарҷы волонтёр даа поларға маңнанча. Ӧнетiн чаа операциязы араласчыларына гуманитарнай полызығ чыырының тӧстегҷiзi, араласчызы полча паза андар ӱc-тӧрт хати гуманитарнай полызығ апар килген. Iдӧк пу теманы чахсы чарытча, газета хығырығҷыларын СВО матырларынаң таныстырча. Пу чағында хабарҷы СВО араласчызы Герман Костяковнаң таныстырар.
Ӧӧн редактор орынҷызы Максим Константинович Ахпашев iдӧк хабарҷы, сомҷы полча. Аның тоғызы сылтаанда газета страницаларында сiлiг сомнар, чапсых коллажтар кӧрерге чарир. Чоохтирға кирек, ӱр ниместе редакция icтiнде аның сомнар кӧзiдии cығарылған. Анда чир-чайаан сiлиин, республика ӱлӱкӱннерiн кӧрiп аларға чарир. Максим Константинович Асхыс аймааның депутаттар чӧбiнең чағын тоғынча, муниципалитеттiң ӱлгӱ тоғызын чахсы чарытча. Ол iдӧк СВО араласчыларынаңар чахсы пасча, аның материалларын хатап-хатап хығырарға чарир.
Нандырығлығ хачы Елена Николаевна Никитина iдӧк редакциядағы прай тоғыстарны толдыр салған. Ол хабарҷы, корректор полған. Газета хайдағ сығары аның узынаң палғалыстығ. Корректор Светлана Григорьевна Чертыкова – пӧзiк пілістіг, иптiг паза амыр чоохтығ специалист. Версткада Светлана Сергеевна Кузнецова тоғынча. Пiрее туста статьяны иптiг пӱдiр полбинчатса, Светлана Сергеевна сах андох тексттi иптебiсче. Ол «Официальный вестник» газетаның приложениезiнең тирең тоғынча. Газета кӧрiмi прай Светлана Кузнецованың чiтiг хараанаң иптiг сығарылча.
Директорыбыс Анатолий Викторович Ковригиннеңер чоохтирға кирек. Ол аймахта сыхчатхан СМИ-ларнаң устапча. Чоохтирға кирек, Анатолий Ковригин Асхыстағы телевидениенiң тӧстирiнде турча. Пiс аннаң, аалларҷа удаа чӧрiп, газетаа пазыныс киреенең айғасчабыс. Пазыныc пiстiң хомай нимес парча, анзы аймах устағ-пастаа хабасчатханынаң палғалыстығ.
Бухгалтерлер Анна Викторовна Кичеева паза Анна Николаевна Чаптыкова полчалар. Газета страницаларында оларның статьяларын хығырып аларға чарирӧк. Анна Кичеева пiстiң иң хатығ критигiбiс полча, ол-пу читпестернi сизiнiп одырча. Ол аймах мероприятиелерге пар килче, пазыбысча. Аның кӧп хығырчатханы пiлдiрче. Кем кинделер хығырча, ол пас полар тiп санапчам.
Водитель Андрей Павлович Майнагашев чох пiс аалларзар чит полбин турарҷыхпыс, неке. Ол iдӧк редакцияда илееде чыл тоғын парир. Муниципалитеттi прай ӧтiре пiлче. Типографиязар пар килче, анаң газеталарны таратча. Ол хайдағ учреждение нинҷе газета алчатханын прай пазында тутча, организациялар, тiзең, асхынах нимес. Ағаа чаҷын кирек чоғыл.
Позым мин пу орында iкiнҷi чылы тоғын парим. Аның алнында Хызылчар крайында олған садында воспитатель полып iстенгем. Че андар парар алнында мин пу газетада ӱр нимес тоғынғамох. Минi пеер газетаның ӧӧн редакторы полған Мира Ильинична Беспоместных алған. Хызылчардаң айланчатханда, хатап редакциязар хабарҷы тоғызына аларға сурынғам, че устағ-пастағ минi ӧӧн редакторның тоғызына турғысхан. Хабарҷының паза ӧӧн редакторның тоғыстары пасхалалча. Тоғыс пастаан чылда табығлар ирткен, уғаа аар чыл полған.
Амды кӧп сан пирiс тоғызын толдырарға килiсче, аннаң пасха, аалларҷа кӧп чӧрчем, статьялар пасчам.
– Редакцияда кӧп кiзi тоғынминчатса даа, газетаны тузында сығарарға маңнанчазар?
– Я, анзы орта. План пӱдiрчебiс. Календарьға тӧстенiп, танығлығ кӱннерге чарыдылған материалларны азынада тимнеп салчабыс, кӧрiл парған туста ол сыхча. Аннаң пасха, пландағы нимес мероприятиелер сығыс килчелер. Тоғынҷылар асхынахта, прай тоғысты азынада тимнирге килiсче. Пасха сӧснең, нинҷе-де хаалаға азынада.
– Халғанҷы чылларда аалларда почта пӧлiктерi чабылча. Аалларзар хайди газета читiрчезер?
– Водительiбiс Андрей Майнагашев вторникте типографиядаң газеталарны алып, Асхыссар ағылча. Ағбан – Асхыс трасса хыринда орныхчатхан аалларзар кiр парыбызып, газеталар артыс салча. Средада, тiзең, Асхыс iстiнде газета таратча, анаң Ӱс чул аал чӧбiне кiрчеткен аалларны ибiр парыбысча. Cоонаң Асхыс чоғархызар, Пазазар, Асхыс станциязынзар читче.
Писхамҷы аал позы газетаа килче, Пирiкчул паза Палыхтығ суғ аалларзар «Аскизский тружениктi» маршрут ГАЗельiнең ысчабыс. Водительлернең чағын тоғынчабыс, нинҷе кирек газета сананып, автовокзалда ГАЗельнi удурлап, газеталарны пирiбiсчебiс, Пирiкчулда паза Палыхтығ суғда, тiзең, газеталарны удурлапчалар.
– Печать кӱнiне удур СМИ тоғынҷыларына ниме алғап пирерҷiксер?
– Пiстiң тоғызыбыс ӧӧнiнде чоннаң тоғазарынаң, чоох алызарынаң палғалыстығ. Удаа кiзiлер хабарҷыларға удур парарға ынабинчалар. Аннаңар хабарҷыларға ниик тоғыс, удур парчатхан матырлар алғапчам. Газета страницаларында кӧп тузалығ, чапсых матырлар сых турзыннар.
Сом Дмитрий Сунчугашевти
Автор :
Чоохтасхан Оксана Котюбеева
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
