Стадионда пус «хайылған»
14.01.2026
Хабарлар
Кӧрігҷілер прай чӱреенең «Саяны» ӱчӱн «ағырғаннар»
Меспектiг хоккей. Тынағ кӱннерде «Саяны» команда паза кічіг хоккеисттернің «Саяны-Подсинее» ӧмезі чиңіc ӱчӱн харбасханнар
Пӱӱл Хакасияда спорт чылын хоккеисттер асханнар. 5 – 12 кӱргенде Ағбанда «Ӱрілген меспек» турнирнiң пастағы чардығы ирткен. Анда 2014-2015 чылларда тӧреен оолахтар устарын кӧзіткеннер. Пiстiң республика ӱчӱн «Саяны-Подсинее» ӧме турысхан. «Саяны» команда, тізең, 8 кӱргенде «Сибсельмашнаң» (Новосибирск) тоғасхан, 11 кӱргенде – «Кузбасснаң» (Кемеров). Аннаңар алғыда.
Сынны чоохтаза, Россия чемпионадының пастағы хурчаанда пістің оолларға оң полбады. 2025 чылда «Саяны», 11 ойын иртiрібізіп, пір сан даа тоғын полбаан. Пылтыр халғанҷы матч 24 улуғ хырласта ирткен. Ӧмедегілер «Уральский трубникке» (Свердловск облазы) 1:10 саннаң утыр салғаннар. Іди дее полза, сын кӧрігҷінің чӱреенде командаа ізеніс чітпинче. «Саяны» ӱчӱн «ағырчатхан» улус хоккеисттерібіс, утырыстарын ундудып, чиңіcтерінең ӧріндірерлер тіп сағынған. Хакасияның командазы постың чазызында піреезіне сыдан саларға кирек нооза.
«Сибсельмашнаң» матч чахсы пасталған. Оолларыбыс атакаа парчалар, «ыырҷының» хаалхазын ибiрчелер. Меспекті кире сабызарға кӧмес ле читпинче. 20-ҷі минутада сан 1:0 пол парды. Аның авторы – Егор Бердников. Трибунада чон асхынах. Че оларның суулазын прай Ағбан исче. «Сибсельмаш» амох нандыр пирер, неке. Чох. «Саяны» аалҷыларны чабыра пасча. 41-ҷі минутада капитан Руслан Гавричков меспекті 12 метрдең кире сабысты. Сан – 2:0. Пастағы тайм тоозылчатханда, пазох гол! Григорий Фёдоров трибунадағыларның кӧңнін кӧдірген. Таныхтирға кирек, Бердников таа, Фёдоров таа Чингис Хандамаевтің полызиинаң «ыырҷаа» меспекті кире сабысханнар. «Саяны» 2026 чылны чиңіснең азарға харасча. Ӧріністіг.
Новосибирсктегі ӧме – «Саянының» ӧӧн «ыырҷыларының» пірcі. Ікі команданың кӱзі тиң. Тоғазығ Новосибирскте иртсе, пістіңнер «Сибсельмашха» утыр салчалар, ойын Ағбанда полза, «Саяны» чиңіc тутча. Пӱӱл кибір сайбалған. Ікінҷі таймда аалҷылар, Хакасияның командазының хаалхазынзар соон сӱрістіре ӱс меспек кире сабызып, 75-ҷі минутада санны тиңнестірібіскеннер. Руслан Гавричков Аркадий Сыраевтің хабазиинаң удурлазарға кӱстенген, че ойын хайымнаң тоозылған. Сан – 4:4. Пасха оңдайларда тоғазығның салтарлары ӧріндірерҷіктер, че чӱректе хомзыныс. «Саяны» 8 кӱргенде пір сан тоғынып алған.
11 кӱргенде хоккеисттерібіс кемеровтағыларнаң ойнааннар. «Кузбасс» Россияның чемпионы полча. Хакасиядағы ӧменің «ыырҷынаң» хада турыстыра ойнирға кӱзі читкiҷе нимес. Хонҷыхтарнаң матч 2:7 саннаң тоозылған. 15 кӱргенде «Саяны» команда «Волганаң» (Ульяновск) ойнир, 18 кӱргенде «Ак Барс-Динамонаң» (Хазан) тоғазар.
«Ӱрілген меспектеңер» чоохтаза, анда 12 часха читкелек хоккеисттер кӱстерін сынааннар. Тиксі алза, марығда 20 команда араласхан. Олардаң 8 ӧме – «Енисей» (Хызылчар), «Сибскана» (Иркутск), «Сибсельмаш» (Новосибирск), «Байкал-Энергия-ЦРС» (Иркутск), «СКА-Нефтяник-2014» (Хабаровск), «СШОР Кузбасс» (Кемеров), «Чарас» (Тағлығ Алтай), «Саяны-Подсинее» (Хакасия) – Ағбанда ойнаан, пасхазы Ульяновскта тоғасхан. Сибирьде араласчылар саны кӧп полбааннаңар, прай ӧмелер удур-тӧдір ойнааннар. Ульяновскта командаларны ӱс ӧмее чарарға киліскен.
Пістің палалар хайди ойнабысханнар? Олар, «Чарас» паза «СШОР Кузбассты» утып алып, алтынҷы орынға сығып алғаннар. «Ӱрілген меспектің» ікінҷі чардығында 1 – 3 орынға сыххан командалар ойнирлар. Хомзынарға кирек чоғыл. Спортсменнер часха кічiглер, оларның ӧӧн чиңiстері алнында. Командада ікі хакас пала ойнапча: хаалха хадағҷызы Аяс Сагалаков паза Георгий Боргояков.
Хоза пір танығ. Россияның меспектіг хоккейҷе спорт федерациязында алызығлар пол парған. Амды пірігіснең бизнесмен Олег Дерипаска устапча. Аны 26 улуғ хырласта 2025 чылда конференцияның делегаттары федерацияның президентіне таап алғаннар. Пастағнаң сыхханнар регионнардағы пірігістер, ол санда Хакасияның меспектіг хоккейҷе спорт федерациязы. Наа устағ-пастағ Суперлигада 16-17 команданы ойнаттырарға паза Россияның хоккеисттерін чоннар аразындағы марығларда араластырарға пӧгінче.
Сом «Саяны» клубти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 1 |
Кӱн таңмазы
Хакасияда
Россияда
Тилекейде
