Палаларны имнирiне чахсы оңдайлар тӧстелген
13.01.2026
Хабарлар
Устағ-пастағ наа поликлиникаа алылған оборудованиенi кӧрче
Нацпроект. 2025 чылның халғанҷы кӱннерiнде Асхыс аалда уғаа ӧрiнiстiг паза танығлығ мероприятие ирткен. Анда пiр кӱнде 200 олғанны кӧрҷең наа олған поликлиниказы пайрамни азылған. Андар Хакасия пазы Валентин Коновалов чӧр килген
Асхыс чирiнiң кiнiнде наа пӱдiрiг Россия президентi Владимир Путин турғысхан кӧстеглер хоостыра «Ӧткiн паза узах чуртас» национальнай проект полызиинаң «Пастағы имнег полызии имнег учреждениелерiн нааҷылиры» регион программазынҷа чуртасха кирiлген.
Таныхтирға кирек, Хакасия правительствозының тоғыс кӧстеглерiнiң пiрсi республика чуртағҷыларына чахсы паза турыстығ чуртас оңдайларын тӧстирi полча. Iди 2019 чылдаң сығара Хакасияда национальнай проекттер паза федеральнай программалар полызиинаң 30 азыра имнег объектi пӱдiрiл парған, 150 азыра имнег учреждениезiнде тиксi тыхтағ тоғыстары толдырылған, ағаа хоза, имнег тураларының автопаркы паза оборудованиезi нааҷылалған.
Олған поликлиниказын пайрамни азарында Хакасия пазы Валентин Коновалов, Асхыс аймаа пазының тоғызын ӱр нимес тусха толдырчатхан Евгений Костяков паза аймахтағы ӧӧн имнег туразының ӧӧн имҷiзi Людмила Кичеева араласханнар. Улуғ аалҷыларны поликлиника алнында айраннаң паза талғаннаң удурлааннар, анаң олар хызыл лентаны хыплааннар. Хакасия пазы Валентин Коновалов имнег учреждениезiнiң пӱдiриинде араласхан кiзiлерге прайзына алғызын читiрген. Iдӧк аймах чуртағҷыларын паза имнег туразының тоғынҷыларын наа олған поликлиниказы пайрамни азылчатханынаң алғыстаан.
– Наа олған поликлиниказы тузаланысха кирiлчеткенi аймахха ла танығлығ кирек нимес, ол тиксi республикаа танығлығ полча. Мындағ имнег туразында олғаннарның хазиин iстезерiне, орта диагноз турғызарына паза тузында имнег полызиин пирерiне прай оңдайлар пар. Имҷiлерге паза пациенттерге имнег туразында уғаа истiг оңдайлар тӧстелген. Наа имнег туралары паза поликлиникалар регионның паза тиксi хазна чуртағҷыларының хазиин тыыдарына паза чахсы чуртастарына улуғ хозым полчалар, – таныхтаан Валентин Олегович.
Асхыстағы наа олған поликлиниказы улуғ, ӱс хадыллығ. Ол чарых, амғы тусха килiстiре пӱдiрiлген. Аның пӱдiриине 400 миллионға чағын салковай хорадылған, федеральнай паза республика бюджеттерiнең ахча позыдылған. Наа олған поликлиниказында кирексiнiс турыбысхан, хаҷан иргi 1930 чылда пӱдiрiлген олған имнег туразы изел сыххан, ол тузаланысха чарабиныбысхан. Кiчiг пациенттернi пала тапчаң туразар кӧзiргеннер, анда хазых сыныхтаҷаң оңдайлар тӧстелген. Наа олған имнег туразының пӱдiрии, киректелчеткен оборудование паза тирiглер прай нааҷылал парары кӧрiлген.
Амды ӱс хадыллығ наа олған поликлиниказының пастағы хадылында педиатрлар, дерматовенеролог, соона салдырбас имнег полызиин пирҷең, хазых пала, прививка турғысчаң, уколлар итчең кабинеттер кӧрiл парған. Iдӧк iҷее паза палаа пӧлiк, регистратура паза тастына кисчең кип-азах iлҷең орын пар. Iкiнҷi хадылында тiс имҷiлерiнiң пӧлiктерi, психолог, хирург, перевязочнай, оториноларинголог, акушер-гинеколог, невролог, психиатр, процедурнай паза УЗИ кабинеттерi орныхчалар. Iдӧк эндокринолог, харах имҷiзiнiң кабинеттерi паза палаҷахтарға ойнап алҷаң орын кӧрiл парған. Ӱзiнҷi хадылында физиотерапевтическай паза массаж итчең кабинеттер, клинико-диагностика лабораториялары, телемедицинскай консультациялар иртiрҷең алынҷа кабинет кӧрiл парған, iдӧк конференц-зал пар.
Валентин Олеговичке прай ӱс хадылҷа экскурсия иртiрiлген, имҷiлернiң амғы тусха килiстiре наа оборудованиее ӧрiнiстерi iле кӧрiнчеткен. Олар имнег тирiглерiнең паза оборудованиенең сидiксiнiстер чох тузаланарға ӱгренiп алғаннар.
Таныхтирға кирек, олған поликлиниказы аймахтағы прай палаларға имнег полызиин пирер. Iди пу имнег туразының имҷiлерi 9 муңа чағын паланың хазиин хайығда тударлар.
Наа олған поликлиниказы
Олған поликлиниказының iстi-тастын прай тиксi кӧрiп алған соонаң, килген аалҷыларға улуғ нимес концерт кӧзiдiлген. Пайрамнығ мероприятиенiң чайаачы чардығында Хакасия пазы Валентин Коновалов иң турыстығ тоғынҷыларға Хакасия правительствозының алғыстас пiчiктерiн читiрген.
Наа поликлиника, iзиин азып, iкiнҷi неделязын тоғынчатхан. Асхыс чуртағҷызы Дмитрий Ивандаев Алина паза Кирилл палаҷахтарының хазиин сыныхтирға килген.
– Пiс поликлиниказар iкiнҷi хати килгебiс. Палаларым ирткен неделяда кискектебiскеннер, амды имненiп алған соонаң сыныхтанарға килдiбiс. Наа поликлиниканы илееде сахтаабыс. Ол улуғ паза чарых, icтiнзер кiрзе, кӧңнiң дее чалахай полыбысча. Мындағ имнег учреждениезiн пӱдiр пиргеннерiне ӱлгӱдегiлерге паза пӱдiрiгҷiлерге аймах чуртағҷыларынаң улуғ алғызыбысты читiрерге сағынчам. Амды имҷiлер дее пiссер тартыларына, специалисттер чидiспинчеткенi пӧгiл парарына iзенчем, – сағыстарынаң ӱлескен Дмитрий Ивандаев.
Олған поликлиниказы Асхыстағы ӧӧн имнег туразынзар кiрче, iдӧк – имнег-диагностика кабинеттiг поликлиника, ипчiлер консультациязы, табырах имнег полызиин пирҷең пӧлiк, хараа-кӱнӧрте паза кӱнӧрте чатчаң стационарлар, пис участковай имнег туразы, тӧрт имнег амбулаториязы, 19 ФАП, пис фельдшер пункты. Асхыстағы ӧӧн имнег туразынзар 36602 кiзi имнег полызиин аларға айланча, ол санда – тоғыс муңа чағын пала.
Иргi олған поликлиниказында имҷiлерге кабинеттер чидiспин турған, амды улуғ наа турада олар читкiҷе. Имнег туразының устағ-пастаа имнег тоғынҷыларының хайиин тартарынҷа тоғысты ӧткiн апарча. 2025 чылда имнег учреждениезiнзер анестезиолог-реаниматолог, олған неврологы, олған имҷiзi, харах имҷiзi, олған тiс имҷiзi, терапевт паза табырах имнег полызиин пирҷең пӧлiксер iкi фельдшер тоғынарға килгеннер. Амды, наа поликлиника азылғанда, специалисттернең кирексiнiс пӧгiл парарына iзенерге чарир.
Асхыстағы олған поликлиниказына тӧӧй, пiр кӱнге 200 олғанны кӧрiбiсчең оңдайлығ имнег туралары амғы туста Ағбанда паза Харатаста пӱдiрiлчелер.
Сомнар Илона Каковани
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 1 |
Кӱн таңмазы
Хакасияда
Россияда
Тилекейде
