Алғыстастар
29.12.2025
Хабарлар
Радион Сунчугашев, «Хакас чирі» газетаның ӧӧн редакторы, филология наукаларының кандидады
Аарлығ арғыстар, чир-суғҷылар!
Ӱр ниместең Ат чылын удурлирбыстар. Чылғы мал чоныбыстың хас пурунғыдаң сын арғызы, iзестiг полысчызы полча. Оң ползын наа чылда чоныбысха!
Парчатхан чылда «Хакас чирi» газетабыстың страницаларында аймах рубрикаларнаң танысхазар. Таныхтирға кирек, 2025 чыл ӧӧнiнде «Ада чир-суубыс арачылағҷызы» паза «Илбек Чиңiске – 80 чыл» темаларнаң палғалыстығ полған. Аннаңар «Илбек Чиңiс» паза СВО-наң палғалыстығ «Матырлар тузы», «Хакасия матырлары» рубрикалар удаа сых турғаннар. Iдӧк редакцияның ӧмезi «Минiң матыр ағам» Илбек Ада чаа араласчыларына хумартхыли чарыдылған чоохтар мариин иртiрген. Улуғ алғыс прай араласчыларға. Сағынчабыс, мында прайзы чиңiсчi полча. Ӧӧнi – матыр ағаларыбысты ундубинчатханыбыс.
Газетабыстың страницалары тiл алысчаң, аймах сағыстарнаң паза чапсых хабарларнаң ӱлесчең орын полча. Iди пiс Хакас чирiнiң аймах тоғысчы кiзiлерiнеңер, оларның чидiглерiнеңер паза сидiксiнiс-кирексiнiстерiнеңер пiлiп алчабыс. Iкiнҷiлес чох, пос тiлiнең пазылған пiчiк тiлiбiс паза тиксi культурабыс тилiзiне iзестiг тiрег полча паза пос оңдайлығ пiр чон полчатханыбысты киречiлепче.
Чуртас ондайлары чылдаң чылға алызып одырчалар. Ол алызығлар хаҷан даа сағысха тӱзiрчелер паза тоғысты наа оңдайнаң апарарға кирексiпчелер. Мының алнында полған на, теедег, аалда почта полҷаң паза почтальоннар газетаа пазыныс киреенҷе чоннаң ӧткiн тоғынҷаңнар. Пӱӱн, тiзең, чуртас саңай пасха. Почта пӧлiктерi чабылғаннар, почтальоннар саны саңай хызырыл парған. Пӱӱнгi туста иргiдегi чiли тоғынҷаң оңдай чоғыл. Ӧӧнiнде газетаа пазындырар паза аны тарадар киректе. Аннаңар чуртастаң соона халбас ӱчӱн паза пiр орында турбас ӱчӱн чӱгӱрерге кирек. Ол сылтағнаң пiс илееде чыл газетабыс тиражының чардығын позыбыс пазындырып таратчабыс. Пiстiң опыдыбыснаң ам пасха даа редакциялар тузаланчалар. Пӱӱнгi туста редакция транспортынаң газетабысты Ағбан городтағы паза Асхыс, Таштып аймахтарындағы организацияларҷа таратчабыс.
Наа чыл алнында алғыс сӧстерiн читiрчебiс iзестiг нанҷыларыбысха, хайзылары почта пастыра пазынчалар, паза чылдаң чылға «Хакас чирi» газетаа ӧменең пазынчатхан учреждениелернiң тоғынҷыларына паза устағҷыларына. Мына ол матырлар: А.М. Топановтың адынаң Хакас национальнай драма театры; Н.Ф.Катановтың адынаң национальнай гимназия; «Читiген» театр; «Ӱлгер» паза «Кӱн сузы» ансамбльлар; ХакНИИЯЛИ; С.П.Кадышевтiң адынаң чон чайаачызының национальнай кiнi; Н.М.Одежкиннiң адынаң республиканың харах имнег туразы; Хакасияның культура министерствозы. Iдӧк 4-5-зер газета алчатхан школалар, олған садтары паза пасха даа ӱгредiг, имнег учреждениелерi.
Iдӧк редакцияның собкорлары пастыра Асхыс паза Таштып аймахтарында школалар паза имнег туралары тоғынҷылары, тӧремiл пазынып, газетабысты алчалар. Радион Топоев, Асхыс аймаанҷа собкор (тел. 8-983-263-02-27), «Хакас чирiне» пазындырар паза тарадар сурығларҷа чахсы полысчыларны таныхтапча: Боргоякова В.А., Иптышева Л.Н. (Асхыс аал); Канзычаков Р.Ю. (Калинин аал); Киргинекова Г.К., Чебодаева Л.А. (Пилтiр аал); Топоева М.С., Сунчугашева И.А. (Полтах аал); Тюдешева М.Д. (Индiркi Тӧӧ аал). Пу чылда пiс Паза чирi аалларзар газета тарадар чол азып алғабыс. Виктор Чанковха (тел. 8-923-394-04-39) газетабысты тарадарға паза пазындырарға полысчалар: Майнагашева Н.Я., Ивандаева Э.М., Карамашева А.В., Шуптерекова Е.И. (Индiркi Паза аал); Алагашева Ж.А. (Паза Пиизi аал); Сунчугашева О.Н., Минор Т.Г. (Асхыс поселок). Таштып аймаанҷа собкорыбыс Тарина Бутанаева (тел. 8-923-213-58-29) алғыс сӧстерiн читiрче: Челтыгмашева Т.Г. (Пыдырах аал); Бурнакова Н.С., Нефедова М.И. (Таштып аал); Тодояков А.М. (Ибiг аал).
Пiс улуғ алғызыбыс читiрчебiс «Хакас чирi» газетаа пазынчатхан прай хығырығҷыларыбысха. Iзенчебiс, наа чылда чалғыс газетабысха iдӧк пазынарзар. Сiрер Ада чир-суубыстың паза чоныбыстың сын патриоттары полчазар.
2026 чыл Россияның чоннары пiрiкчеткен чыл тiп чарлал парған. Хакас чирiнде пiр чӱсче аймах чон чуртапча. Улуғларыбыстаң хыйға чоох удаа истерге килiсчең – чурт ээзi иптiг тудынза, аалҷылар iдӧк тудынарлар. Аннаңар чоныбыс ынағ паза пiр чӧптiг ползын. Прайзыбыс, хада-пiрге тудынып, тiлiбiстi, кибiрлерiбiстi, тиксi Ада чир-суубысты хайраллап чуртаалар. Iзенчебiс, прайзыбыстың пiрге кӱстенiзi хайдағ даа сидiктернi тобырарға полызар. Таңдағы кӱн киҷеегiзiнең артых поларына киртiнiстi чiдiрбеске кирекпiс. Редакцияның ӧмезi газетабыс тузалығ паза хынығ ползын тiп аннаң андар кӱзiн салар. Мында iдӧк пос чирiне хынчатхан паза сағыссырапчатхан сын патриоттар тоғынчалар нооза.
Аарлығ чир-суғҷыларыбыс! Прай чӱреебiснең сiрернi Наа 2026 чылнаң алғыстапчабыс! Наа чылда прайзыңар толдыра хоныхтығ, пик хазыхтығ, ӧрчiлiг полыңар. Пала-пархаңарны пик азахтығ ӧскiрiңер. Прай чоныбысха пӧзiк чидiглер паза амыр чуртас алғапчабыс!
Хакасияның чуртағҷылары чир-суғҷыларны чағдапчатхан Наа чылнаң алғыстапчалар
Чылғы чылы тӱзімніг ползын!
Автор :
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
