Чиңісчілер санында – «Хакас чирі» газета хабарҷызы
26.12.2025
Хабарлар
«Хрусталь парыс-2025» марығның чиңісчізі Наталья Сюптерекова
Марығ. Хакасияның Ӧӧркі Чӧбі «Хрусталь парыс-2025» парламент марииның салтарларын иткен
23 улуғ хырласта Хакасияның Ӧӧркі Чӧбі, кибірли «Хрусталь парыс-2025» парламент марии салтарларын идіп, закон сығарҷаң ӱлгӱ тоғызын чарытчатхан хабарҷыларны сыйыхтаан. Пайрамнығ чыылығны Ӧӧркі Чӧп кнезі Сергей Сокол асхан. Ол хабарҷыларға Ӧӧркі Чӧптің, депутаттарның тоғызын чарытчатханнары, сидіксіністіг сурығларға хайығ айландырчатханнары ӱчӱн алғызын читірген.
– Мин алғызым читірчем прайзыңарға, сірер парламент тоғызын ӧтіре пілчезер паза сын оңдайнаң чарытчазар, – таныхтаан Сергей Сокол.
Паза Сергей Михайлович республикадағы СМИ тоғынҷыларын чағдапчатхан Наа чылнаң паза Кӧлееденең алғыстаан. Прайзына пик хазых, часка паза чахсы чуртас алғаан.
«Хрусталь парыс-2025» марығның ӧӧн сыйиина, Гран-приге, пӱӱл «Хакасия» ГТРК-ның хабарҷызы Константин Кравцов турысхан. Ағаа сыйыхты, хрусталь парыс статуэтказын, ирткен сессия тузында читір пиргеннер. Пу сыйыхтаста Ӧӧркі Чӧп кнезі Сергей Сокол ағаа чиңісчі дипломын читірген.
Ӧӧркі Чӧп кнезінің пастағы орынҷызы, марығны тимнеп иртірчеткен комиссияның кнезі Пётр Воронин пӱӱл марығ 22-ҷі хати иртірілчеткенін таныхтаан.
– Комиссияа чылдаң чылға кӧптең кӧп тоғынарға киліcче, – теен Пётр Иванович. – Пу чылда марыға 58 тоғыс кірген. Оларны прайзын кӧрібізерге, хығырыбызарға киректелче нооза. Кірген тоғыстарның прайзы даа кӱн суриинда турған сурығларнаң палғалыстығ, хығырығҷылар оларны хығырчалар. Депутаттарға анзы уғаа кирек.
Мының соонаң номинацияларҷа сыйыхтас пасталған. Пасчатхан хабарҷылар ӧмезінде «Ӧӧнінеңер пілдістіг» номинацияда «Хакас чирі» газетаның ӧӧн редактор орынҷызы Наталья Сюптерекова ізестіг чиңіс тутхан.
Номинациялар чиңісчілеріне сыйыхтарны Ӧӧркі Чӧп комитеттерінің устағҷылары читіргеннер. Ідӧк партиялар фракциялары, пос сыйыхтарын тимнеп, алынҷа хабарҷыларны таныхтааннар.
Сом Илона Каковани
Автор :
Альберт Толмашов
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
