Олғаннарға – Наа чыл нымаа
26.12.2025
Хабарлар
Асхыста ирткен ӱлӱкӱннің араласчылары
Ӱлӱкӱн. Улуғ хырлас айының 22-ҷi кӱнiнде «Читiген» Хакас национальнай драма театры олғаннарға Наа чыл ӱлӱкӱнiн сыйлаан. Артисттер ол кӱнде iкi алынҷа чорыхха сыхханнар – Харатас городсар паза Асхыс аалзар
Харатастағы ӧкiс паза iҷе-пабазы хайии чох халған иркелер хысхының ӧӧн аалҷыларын Соох апсахнаң Хар хызыҷахты чидiкпин сахтааннар. «Новогодний переполох» ӱтертiстiг интермедияда олғаннар хынығ марығларда араласханнар, сиспектер тапханнар, кибелiстер чоохтааннар, теелбектенгеннер.
Олох кӱнде артисттер Асхыс аймаандағы палаларның кӧңнiн кӧдiргеннер. Аны «Читiген» театрның ӧмезi «Благодарение» полызығлығ фонднаң хада иртiрген.
– 2018 чылда «Благодарение» полызығлығ фонд тӧстелгеннең сығара чуға чуртапчатхан, кӧп палалығ сӧбiрелернiң паза ӧнетiн чаа операциязында араласчатхан пабаларның палаларына Наа чыл сыбызы ӱлӱкӱннi иртiрче. Мероприятие ӱс чыл изере Ағбан городта полҷаң. Че Асхыс аймаандағы хай пiрее ыраххы ааллардаң хысхызын сығып аларға сидiктеңер, пiс позыбыс Асхыссар парчабыс. Наа чыл сыбызына пiр чӱс пала чыылча. Пӱӱл чуға чуртапчатхан сӧбiрелернiң палаларына ӧӧн хайығны салғабыс.
Пiс iкiнҷi чылы «Читiген» театрнаң хада тоғынчабыс. Артисттер олғаннарға ӱлӱкӱн сыйлапчалар, ойыннары пӧзiк синде иртче. Улуғ алғызыбыс театрның режиссёры паза артизi Каскар Геннадьевич Чаптыковха читiрчебiс. Ол пiске хаҷан даа удур парча. «Благодарение» фонд тӧстелгеннең сығара сыбы ӱлӱкӱнiн иртiрерге «Алтын Арығ» кафенiң ээзi Яна Витальевна Толмачёва полысча. Ол чыл сай пicке Асхыста «Той-Пай» банкет иртiрҷең залны пирче паза олғаннарға тадылығ стол салча, пиццанаң сыйлапча. «Сытый Бай» кафенiң директоры Алёна Вадимовна Бурнакованың кондитерлерi пирожнайлар пызыр пирчелер, постарыох Наа чыл сыбызы иртчеткен банкет залынзар ағыл пирчелер. Пiс, «Благодарение» фондтың ӧмезi, конфеттер чыыпчабыс, прай iкi чӱсче тадылығ сыйых тимнепчебiс. Полған на пала ол сыйыхты Соох апсахтың холынаң алча.
Iдӧк ӱлӱкӱнге Кызлас аалдағы реабилитация кiнiнiң олғаннары чӧрчелер. Олар пiстiң фондтың подопечнай палалары полчалар. Наа чыл сыбызы соонаң пiс Кызлассар сыйыхтар апарчабыс. Аның алнында олғаннар Соох апсахха пiчiктер пасчалар. «Благодарение» фондтың чат пар. Андар идiнҷектер, чағбан чӱректiг чуртағҷылар кiрчелер. Пiс чатсар палаларның хынған сағыстарын ысчабыс, идiнҷектер кемге хайдағ сыйых идерiн таллапчалар. Улуғ хырлас айының 26-ҷы кӱнiнде Соох апсахнаң паза Хар хызыҷахнаң хада Кызлассар парарбыс, сыйыхтар апарарбыс. Ирткен чылларда палалар провод чох наушниктер паза смартфоннар сурғаннар. Пӱӱл олар худи паза балаклава кирексiпчелер, – чарыт пирген «Благодарение» фондтың СМИ-наң паза чоннаң палғалыс тутчатхан специалист Зоя-Сарго Сагалакова.
«Благодарение» фондтың ынағ ӧмезi Хакасияның чуртағҷыларын чағдапчатхан Наа чылнаң алғыстапча, прайзына амыр-иптiг чуртас паза пик хазых алғапча.
– Пiс, «Читiген» театрның артисттерi, олғаннарға улуғ хыныснаң Наа чыл ӱлӱкӱнiн сыйлапчабыс. Искусствоның паза театрның улуғ кӱзi пар – олар чонны пiрiктiрчелер, часхарчалар паза iзенiс пирчелер. Олғаннарның харағастарында ӧрiнiс чарыза, пiске дее чахсы пiлдiрче, – кӧңнiнең ӱлескен театрның хоос устағҷызы, Хакасияның чон артизi Валерий Топоев.
«Читiген» театрның ӧмезi Наа чыл ӱлӱкӱннiң марафонын аннаң андар узаратча. Артисттер, республикаҷа чӧрiп, городтарның паза ыраххы аалларның кiчiг чуртағҷыларына нымах сыйлапчалар.
Сом «Благодарение» полызығлығ фондти
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
