Спорт школазының тилізі – таңдағызына хозым
26.12.2025
Хабарлар
Аарлығ аалҷылар чиит спортсменнернең хада
Тоғыс чорығы. Хакасия пазының орынҷызы Юлия Исмагилова Асхыс аймаанда пол килген
Чорыхтың ӧӧн пӧгіні – Асхыс поселоктағы спорт школазының тоғызынаң танызары. Андағ чахығ Хакасия пазы Валентин Коновалов пирген. Юлия Вячеславовнанаң хада спорт объектiнде пол килгеннер Ӧӧркі Чӧп депутады Евгений Челтыгмашев, Асхыс аймаа пазының тоғызын ӱр нимес тусха толдырчатхан Евгений Костяков паза Асхыс поселоктың пазы Сергей Энграф.
Аалдағылар cпорт школазын «Бокстың туразы» тіп адапчаттырлар. Ол боксча саблығ тренер Иннокентий Шалгиновтың хумартхызына чарыдылған нооза. Иннокентий Семёнович – Хакасияның поғдархазы. Чир-суғҷыбыс Башкирияда, Узбекистанда тоғынарға маңнанған. Асхыс поселокта секцияны, тізең, 1990 чылларда асхан. Аның устаанынаң ооллар СССР-ның паза Россияның спорт узы нормативтерін толдырғаннар. Хакасияда ла ол Россияның тоғыс спорт узын тимнеп салған. Иннокентий Шалгиновтың кӱстенізінең Асхыс поселок Хакасияда бокстың кініне санал сыххан.
Спорткомплекстің дее тархыны пай. Саблығ тренернің ӱгренҷілері, изел париған тураны таап, аны нааҷылабысханнар. Кӱннің сай мында аймах спорт кӧрімнерінең 150 кізі айғасча. Пос оңдайлығ спортсменнернің аразында Асхыс поселоктың на нимес, хыриндағы аалларның, Таштып аймааның чуртағҷылары пар. Ол улуғларға паза кічіглерге кӧрілген. Амғы туста спорт школазында боксча, спорт кӱрезінҷе секциялар тоғынчалар. Боксерларны марығларға тренерлер Михаил Акинфин паза Эльвин Рамазанов тимнепчелер, кӱресчілерні – Дмитрий Митрофанов. Таныхтирға кирек, Митрофановтың абахай ӱгренҷілерінің пірсі Европа первенствозында кӱзін cынаан. Ідӧк тренажер залы пар, ипчілерге фитнесче тренировкалар иртірілче.
Юлия Вячеславовна спорт школазының прай пӧліктерінде пол килген, чиит спортсменнернең паза тренерлернең чоох алысхан. Тоғазығ тузында наа оборудованиедеңер чоох парған. Аарлығ аалҷы, олғаннарны Наа чылнаң алғыстап, Хакасия правительствозы адынаң школаның ӧмезіне сертификат читірген. Тренерлер сертификатха бокс мелейлерiн, шлемнер паза тренажерлар садызарға пӧгінчелер.
Асхыс аймааның устағ-пастаа Хакасия правительствозына паза Ӧӧркі Чӧбіне хабазығ ӱчӱн улуғ алғызын читірген. Амды чуртағҷылар наа спорт залын кирекcіпчелер. Ӱлгӱдегілер пу сурығны пӧгер оңдай тілирлер.
Сом Ю.Исмагилованың Телеграм-каналынаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
