Спортта иң артыхтарның аттары адалды
24.12.2025
Хабарлар
Регион пазының орынҷызы Богдан Павленко Виталий Канзычаковты «Хакасияның чыл тренері» пӧзік атнаң таныхтапча
Сыйыхтас. Хакасияның физическай культура паза спорт министерствозы, чыл салтарларын идiп, «Ағбан» аалҷылар туразында иң артых спортсменнернi, тренерлернi паза спорт школаларын таныхтаан
Хакасияда аймах спорт кӧрiмнерi чахсы тилiпче. Пӱӱл республика спортта улуғ чидiглерге читкен: наа чемпионнар «тӧрееннер», рекордтар турғызылғаннар, спорттың «пӧзiк сыннары» тобырылғаннар. Спортнаң ӧткiн, кӱстiг, постарына пик киртiнчеткен кiзiлер айғасчалар.
Регион пазының орынҷызы Богдан Павленко, 2025 чылда пӧзiк чидiглерге читкен спортсменнернi чеестеп, чылығ сӧстер чоохтанған:
– Аарлығ спортсменнер, тренерлер паза ветераннар, пӱӱн пiс спорт марығларына пай чылның салтарларын иртiрчебiс, чидiглернi таныхтапчабыс паза спорт тилiзiнде наа пӧгiннер турғысчабыс. Хакасиядағы спорт – ол марығлар паза рекордтар ла нимес, че iдӧк чииттернi ӧскiрерге полысча, чонны пiрiктiрче паза ынағластырча, чуртағҷыларның хазиин тыытча. Анзын тоозылчатхан 2025 чыл чахсы кӧзiт пирдi. Пiстiң республикада Россия синiндегi марығлар тӧремiл иртчелер. Мында оларға матлама тимненчелер. Россияның пiрiктiрiлген командаларына Хакасиядаң чӱс азыра спортсмен кiрче. Пу олаңай ла саннар нимес, республикада спортсменнернi сынап таа чахсы тимнепчелер. Чылдаң чылға олар регионның ӱчӱн тиксi Россия синiндегi паза чоннар аразындағы марығларда араласчалар, регионзар медальлар паза аарлас ағылчалар.
Пiс, чуртағҷылар спортха чағын ползыннар тiп, наа объекттер пӱдiрчебiс, иргiлерiн нааҷылапчабыс, тасхархы спорт ачыхтарын тӧстепчебiс. Пу тоғыстар мыннаң мындар узарадылар.
Чағдапчатхан чылда прайзына пик хазых, тоозылбас-хорабас кӱс паза спортта наа чидiглер алғапчам! 2026 чыл улам кӧп чиңiстер ағылзын!
Богдан Сергеевич спортсменнерге паза тренерлерге Хакасия пазының алғыстас пiчиин читiрген.
«Хакасияның чыл спортсменнерi» пол парғаннар: Артём Попов (ниик атлетика), Наталья Пудова (кӱрес), Фёдор Жибинов (гиря кӧдiрҷең спорт), Татьяна Зырянова (хурлығ кӱрес), паралимпиецтер Даниил Кашин паза Мария Шадрина. Пауэрлифтингнең, чир спортнаң, радиоспортнаң паза кӱреснең айғасчатхан тоғыс спортсменге «Россияның спорт узы» пӧзiк ат пирiлген, оларның санындалар: Роман Астанаев паза Геннадий Штыгашев. Пу ооллар кӱресте сабланчалар. «Чылның иң артых тренерлерi» танығлығ сыйыхтың ээлерi Виталий Канзычаков, Павел Петров паза Михаил Хоботов полыбысханнар. Мыннаң сыйыхтастар тоозылбааннар. Ағбан пилтiрi аймаа паза Харатас город ГТО-ны чуртасха ӧткiн кирчеткен паза спортты иң артых тилiтчеткен муниципальнай пӱдiстер пол парғаннар. Хакасиядағы спорттың чуртазынаңар пiстiң чуртағҷылар чахсы пiлчелер. Хабарларны республиканың СМИ тоғынҷылары тузында читiрчелер. «Хакас чирi» газетаның хабарҷызы Майя Кильчичакова тоғызын матлама толдырчатхан ӱчӱн Хакасияның физическай культура паза спорт министерствозының сыйиина турысхан.
Танығлығ тоғазығда прай чылығ сӧстер паза сыйыхтар читiрiл парғанда, пiс республиканың иң артых тренерi Виталий Леонидович Канзычаковнаң чоохтазып алғабыс.
– Пастағы тренерiм – Станислав Фадеевич Майнагашев. Ол минi iдӧк хакас кӱреске чахсы ӱгреткен. Спортнаң айғазып, Россияның илееде регионын кӧрiп алғам. Москва, Владикавказ, Сочи, Новосибирск, Хызылчар, Кемеров, Улан-Удэ, Чита, Иркутск паза пасха даа городтарда полғам. Станислав Фадеевичтiң холында ӱр чыллар микелерге ӱгренiп, Кызластағы школаны тоозыбысханда, Ағбандағы Олимп резервi училищезiнзер ӱгренерге кiргем. Анда спортнаң улам тирең айғасхам. Минi олаңай кӱреске тренерлер Леонид Геннадьевич Чучунов, Николай Никитич Мамышев паза Владимир Гаврилович Чучунов кӧнiктiргеннер. 2016 чылда чибiргi частығда спорт узы пол парғам, – чоохтапча тренер Виталий Канзычаков.
Ол 2022 чылда улуғ хырлас айында Спорт тимненiзi кiнiнзер тоғысха кiрiп алған. Анда олаңай кӱреснең, грек-рим кӱрезiнең паза ипчiлер кӱрезiнең айғасчалар. Пастап пiчiктернең тоғынған. 2023 чылдаң, тренер полыбызып, спорт устарын кӧнiктiрче.
– Пiссер iкiнҷi чылы Наталья Пудова чӧрче. Чоохтирға кирек, пiр тренерге спорт узын тимнеп аларға сидiк. Полған на спортсменнең нинҷе-нинҷе тренер тоғынча. Я, мин Наталья Пудоваа позымның опыдымны, пiлiзiмнi пирчем, че iдӧк аннаң хада тренерлер Леонид Геннадьевич Чучунов паза Денис Олегович Карамчаков айғасчалар. Аның пастағы тренерi Евгения Сергеевна Карамчакова чахсы «фундамент» сал салған, тренер Марат Семёнович Кичеев тирең пiлiстерiн пирген. Пӱӱл Наталья Пудоваа марығларда оң полды. Ол Европа первенствозында паза Россия чемпионадында чиңiстер алған. Мағаа «Хакасияның чыл тренерi» пӧзiк ат пирiлгенi – ол iдӧк Натальянаң тоғынған паза тоғынчатхан тренерлернiң чидии, – тiпче Виталий Канзычаков.
Сом Дмитрий Сунчугашевти
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
