Иң артых ниме-ноо сығарчатханнар таныхталды
24.12.2025
Хабарлар
Марығның чиңісчілері Хакасия пазы Валентин Коноваловнаң хада
Марығ. «Россияның иң артых 100 ниме-ноозы» марығда сыйыхха турысхан идінҷектер паза предприятиелер сыйыхтарын алдылар
«Россияның иң артых 100 ниме-ноозы» марығның салтарларына чарыдылған пайрамнығ чыылығ Хакасия правительствозында республика пазы Валентин Коноваловтың устаaнынаң ирткен. Тиксі Россиядағы иң артых ниме-нооны таллирынҷа марығ пӱӱл 30-ҷы хати ирткен. Хакасияның предприятиелері пос ниме-ноозын чыл сай турыстыра кӧзітчелер. Пу чыл пістің ниме-ноо сығарчатханнарға андағох «мӱнніг» полды. Аннаңар оларның хазна паза республика синінде сыйыхтығ орыннар алғаны киречілепче.
Сыйыхтарны читірер алнында Хакасия пазы Валентин Коновалов чиңісчілерзер алғыс сӧcтерінең айланған:
– Аарлығ арғыстар, марығның федеральнай чардығын маңнаныстығ иртібіскенінең алғыстапчам. Марығ орында ниме-ноо сығарчатханнарға хабазарына кӧстелген, пӧзік кирексініcтерҷе ниме-ноо сығарарына кӧстирге паза хазнабыста сығарылчатхан ниме-нооға чырғалдағы орнын пиктирге полысча, олох туста чуртағҷыларның иң хатығ кирексіністерін толдырар ӱчӱн. Чылдаң чылға араласчылар саны хозылчатханына ӧрінчем. Хакасия федеральнай синдегі чиңісчілер санында Россия регионнары аразында читінҷі орында турча, Сибирьде паза Ыраххы Востокта – ӱзінҷі орында. Ол уғаа маңат салтар, уламох чон санынаң республика хазнада пастағы даа чарымына кірбинчеткенде. Анзы пістің предприятиелер сынында чахсы ниме-ноо сығарчатханынаңар киречілепче! Арғыстар, мин сірерні узыңарнаң, устап пілчеткеніңернең, наа технологияларны кибірлернең пірге тузаланарға пілчеткеніңернең алғыстапчам.
Хакасия пазы ідӧк ниме-ноо сығарчатханнарның тиксі Россияны паза пістің республиканы тилідеріне хозым итчеткенін таныхтаан паза киректеріне тиліс, наа чидіглер алғаан.
Хакасияда ниме-ноо сығарчатхан паза полызығлар читірчеткен 53 предприятие пос ниме-ноозын «Россияның иң артых 100 ниме-ноозы» марығның алты номинациязында турыстыра кӧртіcкен ӱчӱн дипломнарға паза «Качество чидіглері ӱчӱн» аарластығ таныға турысхан. Лауреаттар аразында аймах кӧcтеглернең айғасчатхан идінҷектерні паза предприятиелерні адирға кирек, ол санда ас-тамах паза промышленность ниме-ноозын, чон паза хоос тоғыстарны сығарчатханнарны, чуртағҷыларға имнег паза пасха полызығларны читірчеткеннерні. Хайди даа адирға кирек «Вдоволь» полуфабрикаттар фабриказын (таңах идінең самса, пельменнер), «Лазер Мед» кінні (имнег полызығлары), «Ағбан» аэропортты (борттағы азырал), «Саянмолоко» (сӱт, сырлар, эҷігей), «Альпина» (газтығ суғлар) ООО-ларны, «Ағбандағы пӱдіріг-монтаж устанызын» (полызығлар), СУЭК-тың пірге сервис компаниязын (промышленность ниме-ноозы), «Тибіреділбинчеткен ис-пай сыныхтаан» (сыныхтағ полызығлары) паза «Стальконструкцияны» (пӱдіріг ниме-ноозы) паза идінҷектерні: Елена Алимованы (конфеттер), Алексей Шишлянниковты (кискен ағас), Татьяна Пудованы (чон кип-азаа), Лидия Кашкарованы (петроглифтер хоосталған ідіс-хамыс), Нина Бурмагинаны (тынағ орны), Ирина Куперні (печенье, торт). Россияның иң артых ниме-ноозының алтын чӱс санына «Хакасияның бентониді» сығарчатхан хоосхаларның тасхын чӧрҷең орнын толдырҷаң пораа кирілген.
Сыйыхтас соонаң идінҷек Нина Бурмагина позының паза істеніc ӧмезінің тоғызын пӧзік паалаан ӱчӱн Хакасия пазына, республика правительствозына алғызын читірген.
– «Россияның иң артых 100 ниме-ноозы» марығ піске, пір орында турбин, тилирге полысча. Чарғыҷыларның чӧптерін ситкіп исчебіс паза санға алчабыс, аның ӱчӱн піс аннаң андар ниме идерге киректелчеткенін пілчебіс. Арғыстарны чағдапчатхан Наа чылнаң алғыстапчам, прайзына талаан, наа чидіглер, ӧзіс алғапчам. Хакасия мыннаң мындар уламох ӧңнензін, – теен Нина Григорьевна.
Идінҷектернің сӧcтерінең, чылдаң чылға марығда аралазарға сидіктең сидік полып одырча, че анзынаң марығ уламох хынығ полча. Таныхтирға кирек, Хакасияда сығарылған ниме-ноо чахсы синде тимнелген сылтаанда пістің республика тиксі хазнаа сабланча.
Сом Илона Каковани
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
