Чуртастың прай сфералары ӱзӱрілген
23.12.2025
Хабарлар
Кӧні эфир. Россия президенті Владимир Путин кӧні эфирде иртчеткен чыл салтарларын ӱзӱрген, журналисттернің паза хазна чуртағҷыларының сурығларына нандырған
Россия президенті Владимир Путин, иртчеткен 2025 чылның салтарларын ӱзӱріп, чоннар аразындағы амғы халых-политика сурығларына паалағ пирген. Ол кӧп алғым сурыға нандырған, олар чуртастың прай даа сфераларына теелгеннер, ол санда экономикаа, ӧнетін чаа операциязына, социальнай политикаа. Пӱӱл кӧні линияа ӱс миллион азыра сурығ кірген, хазна пазы кізілернең 4,5 часча чоохтазығ апарған.
Сурығлар аразында Хакасиядаң кірген сурығ кӧдірілген, ол Абазада хыры чабых пус катогын пӱдіреріне теелген. Хайди таныхтаан республика пазы Валентин Коновалов, пу сурығ инвестор проектте аралазарын тохтат салғаннаң палғалысча. Пӱдіріг 2025-2026 чылларға планға кирілген полған, ол «Бизнес-спринт (Мин спортты таллапчам)» федеральнай проектке кірчеткен. Ӱртӱн айында чир тоғыстары пасталған, че чарыс айы тоозылчатханда, пӱдiрігнi тузында толдыр саларға гарантия пирген инвестор, ахчазынаң сидіксіністерiне сылтанып, чӧптезігні тохтатчатханнаңар искірген. Амды инвесторнаң позының обязательстволарын толдырардаңар тоғыс апарылча.
Хакасия чуртағҷыларынаң кiрген сурығлар ӧӧнінде социальнай политикаа, СВО-ға, хазнаа паза халых чонға, чуртха, экономикаа теелгеннер. Прай ол сурығлар постарының кӧстеглерiнҷе ӱлгӱ органнарының аймах cиннеріне, ведомстволарға паза структураларға тоғынарға пирілерлер.
Хайди Валентин Коновалов ізендірген, правительствозар кірген полған на сурығ тоғысха алылар, пір сурығ даа хайығ чох халбас, прай айланыстарға нандырығ пирiлер, оларның кӧбізінҷе министерство-ведомстволар тоғыс апарчалар.
Ангара-Ким кластерін тӧстир сурығ iдӧк кӧні линияда кӧдірілген. Проект Россияның наа индустриализациязын позыдар. Президенттің чооғынаң, пу сағыстың тилир оңдайлары чахсы, аны чуртасха киреріне частнай инвестициялар тартарға кирек. Хазна, тізең, инвесторларға кирек полызығ пирерге тимде.
Ӧңніг паза удаа учурабинчатхан тимірлерні тирең тоғынар кластерні тӧстир проектті Ангара-Ким макрорегионда пістің республиканың, Хызылчар крайының, Иркутск облазының паза Туваның чирлерiнде чуртасха кирері кӧрілче. Ол промышленностьты, науканы паза ӱгредігні пірiктiрер. Аның пӧгіні – пӧзік технологиялығ производстволарны тилідері. Пастағы объекттерні 2027 чылда тоғындырары кӧрілче.
Хакасияда Саяногорсктың спутник городын пӱдiрер сурығ кӧрілче.
– Піске пу проектті чуртасха кирері уғаа кирек. Ол 2020 чылда алылған Хакасияны тилідер стратегияа уғаа килістіре кірер. Ол экономиканы прай саринаң тилiдер, промышленность производствозының пӱдізін кӧӧлҷе алыстырар, пӧзік технологиялығ отрасльларны тилідер паза чир алтындағы ис-пайны анирынаң палғалысты хызырар, – таныхтаан Хакасия пазы Валентин Коновалов.
Кластер тӧстелзе, ол регионның чуртағҷыларына тоғынҷаң наа орыннар пирер, социальнай сурығлар пӧгілер, республика бюджедіне хоза парыс кирер тіп ізенче регион устағҷызы.
Республиканың Ӧӧркі Чӧп кнезі Сергей Сокол президентнең кӧні линия тузында кӧдірілген сурығлардаңар позының кӧрізінең iдӧк ӱлескен. Аның чооғынаң, президент пилот чох авиацияны тилідер сурығны чахсы чарытхан. Піс сыннаң пу сферада алнынзар табырах сых парыбысхабыс. Аны мин позымның кӧзідімінде, аэроразведка подразделениезіндегі службаҷа, пілчем.
«Чыл салтарлары» тузында iдӧк Хакасия истілген. Сурығ – Абазада хыры чабых пус катогын пӱдірері. Уғаа чахсы проект. Пӱдірігні хазна паза бизнес хада-пірге апарары кӧрілген полған, че компанияның сидіксіністер сых килген, аннаңар ам наа инвесторны тілепчебіс.
Хазна пазы прай сурығларҷа позының кӧрізін таныхтаан паза оларны пӧгер оңдайларны кӧзіткен. Піс оларны хайди даа пӧк саларбыс. Пістің хазнабыс позының тархынындағы сидік тустарда оларны сыбыра тобырҷаң.
Чааҷыларнаң тоғазығларда, Чиңic тутхан соонда ниме идерге кирек поларынаңар чоох апарылча. Хазнаның суверенитедін, пос тілiне паза культуразына правоны арачылапчатхан СВО араласчыларының опыды, сидік туста хайынар оңдайлары, посха нандырығны алчатханы амыр чуртастағы сфераларда тузалығ полар: устағда, вузтардағы ӱгредігде, чииттерні кӧстирінде, бизнесте, волонтерствода. Чиңicті паза матырларыбысты сағыпчабыс.
Кӧні линияда Россия президенті уғаа кирек сурығны кӧдірген: палалалығ сӧбірелерге прай саринаң хабазарын. Аның чахығларының пірсі – ясля ӧмелерін тӧстирі.
Палалығ сӧбiрелерге хабазардаңар, демографиядаңар, сӧбірелер тӧстеп, пала табарға кӱстенердеңер кӧп сурығ кӧдiрiлче. Владимир Путин чоохтапча: «Хаҷан даа, пірее ниме идер алнында, піс сағынарға кирекпіс, хайди ол палалығ сӧбiрелернің чуртазына паза парыстарына теелер. Правительстваа паза хазнаа палалығ сӧбірелерге хабазар системаны, тимнеп, чуртасха кирерге кирек. Пала тӧрізе, сӧбіренің парызы тӧбiн тӱспезін. Хазна тойлығ ипчілерге паза палаа 18 час толғанҷа хабазар кӧп ниме итче. Матыр iҷелернің статузын кӧдiрчебіс. Чииттернің сӧбіре тӧcтир кӧңніне хабазарға кӧп ниме иткебiс, ам даа итчебіс. Iҷе паза паба полчатханы хайдағ часка полчатханын кізілер пілзіннер. Ахчалығ полызығ кирек, че олаңай кізі часказын пілері уғаа кирек».
Кӧнi линияда Россия президенті 80 азыра сурыға нандырған. Владимир Путин Украинадағы чаалазығны тохтадар, Россия чааҷыларының оларның сӧбірелерінің экономикаа, демографияа, социальнай паза даа пасха кӧп сурығларға нандырған.
Хакасия пазы Валентин Коновалов президенттiң кӧні линияда кӧдiрген сурығлары прайзына уғаа кирек полчатханын таныхтаан. Ол ӱлгӱнің паза чонның аразында чоохтазығ апарарына чахсы оңдай полча. Хазна пазы прайзына азых прай сурығларны тирең кӧріп, чуртастың прай сфераларына теелчеткен сурығларға нандырған.
Сом kremlin.ru сайттаң
Автор :
Николай Султреков
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
