БПЛА операторына ӱгренерге хығырчалар
10.12.2025
Хабарлар
Профессияа таллағ. Хакасияда пилот чох аппараттарның операторы профессиязын алар таллағ иртірілче. Службаны иртер контракт пір чылға иділче, аның соонда чааҷы службазын узарадар алай чох сурығны позы пӧкче
Хайди искірген контрактча чааҷы службазына таллағ апарчатхан Ағбандағы пункттың пастығы Дмитрий Деменков, пилот чох аппараттарның операторына ікі ай ӱгретчелер. Андағ оператор поларға сағынчатхн кізінің ӱгредии пӧзік алай ортымах профессиональнай ӱгредігліг поларға кирек. Ол 18 – 45 частығ, англия тілiн кӧмес тее пілчеткен, физическай тимненізі ортымах таа синніг полчатхан, чарғаа тартылбаан, компьютернең тоғын полчатхан, холларының салаалары табырах тоғынчатхан кізі ползын. Кандидаттың В, С, Д категориялығ водитель удостоверениезі пар полза, улам чахсы полар.
Контрактниктер пастап теория иртчелер, анда навигацияны, аэродинамиканы, картографияны ӱгренчелер, анаң ӧнетін дроннарнаң практика иртчелер. Дроннар аймах кӧрімнiг полчалар: самолет осхас, гусеницалығ, FРV-дроннар, разведка апарҷаңнар.
Контракт идіп алған дроновод войсколарның пасха чааҷы частьтарынзар, позы ла чаратса, ызылар. Ол чаалазығ парчатхан линиядаң 25 километр азыра ырахта поларға кирек. Пір чыл службада полған соонда, ол анда халарын алай чааҷы службазынаң парыбызарын позы кӧрер.
Контракт идіп алза, ағаа 400 муң салковай федеральнай ахча тӧлелче паза регион хоза 650 муң салковайлығ тӧлег пирче. СВО зоназында аның чал ахчазы 215 муң салковай азыра полар, анзы должностьнаң паза званиенең палғалысча.
Хоза полызығлар: чаалазығлар ветераны статус, службаҷа ӧзер оңдай, пӧзік ӱгредігні тикке алар, тикке имнег полызии пирілче. Службазын тоосханҷа тоғынған орны хайраллал халча.
Таллағда пастағы теесте алылчалар программисттер, дронрейсерлер, киберспортсменнер, автомоделисттер, радиотехниктер, автомеханиктер.
Прай сурығларҷа айланарға чарир Контрактча чааҷы службазына таллағ апарчатхан Ағбандағы пунктсар пу адресче: Ағбан г., Пирятинскай ор., 17А, тел. 8(3902)35-89-04.
Автор :
Николай Султреков
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
