Алызығлар кирек
10.12.2025
Хабарлар
Владислав Боргояков (оң саринаң) 80 кг кӧдірімде чиңіс тутхан
Спорт. 18 часха читкелек саарбахтар М.И.Боргояковтың турнирінде устарын кӧзіткеннер
Хакасияда грек-рим кӱрезiнҷе ікі ӧӧн марығ: Сибирь первенствозы паза РСФСР-ның саблығ тренерi Михаил Боргояковтың хумартхызына чарыдылған арға-мӧрій. Первенство кибiр хоостыра кӱрген айының халғанҷы кӱннерiнде иртче. Пу марығ – Россия мариина таллағ, аннаңар чон чахсы чыылысча, тоғазығ тоозылғанҷа харбазығ парча.
Боргояковтың турнирiнiң тархыны пай, ол 1995 чылдаң иртірілче, че ӱлӱзi сидiк. Пiрее чыл кiзi тол парча. Кӧзiдiмге, пылтыр Ағбандағы кибiсте 119 кӱресчі чиңіс ӱчӱн харбасхан. Спортсменнер Cибирьнiң 7 регионы ӱчӱн турысханнар. Ідӧк марыға Таджикистаннаң 5 кӱстіг спортсмен хозылған. Олар турнирні чоннар аразындағы синге кӧдір парыбысханнар тирге чарир. Пӱӱл пас меетке 70 на кізі cыхты. Олар Хызылчар паза Алтай крайлары, Иркутск, Новосибирск, Омск, Кемеров областьтары, Хакасия алнын алғаннар. Араласчылар саны кӧп полбааннаңар, марығ пір кӱн аразына ирт парған. Тӧстегҷілер программазар ідӧк грек-рим кӱрезiнҷе фестивальны кир салтырлар. Ол 2013, 2014, 2015 чылларда тӧреен палаларға кӧрілген.
Саарбахтар Боргояковтың турнирінде 11 кӧдірімде кӱстерін сынааннар. Ағбанның чуртағҷызы Владислав Боргояков 2009 чылда тӧреен, ол 80 кг кӧдірімде харбасча. Спортсмен грек-рим кӱрезі секциязына тӧртінҷі чылы чӧр парир. Аның тренері – Виталий Чичинин. Влад Ағбанның 22№ школазында 10-ҷы класста ӱгренче. Школа тоосхан соонда вузта пілістерін алғыдарға пӧгінче. Хакас саарбах алтын медальны холға кирген. Олох чидіге Рамиль Мехравар 65 кг кӧдірімде читкен. Рамильге азах меетте хатығ чухтыр. Олимп резерві училищезiнің (техникумының) I курстағы студенті финалда арғызы Андрей Челтыгбашевнең тоғасхан. Челтыгбашев – кӱстіг кӱресчі. Пӱӱл 15 частығ спортсмен Сибирьнің первенствозында кӱмӱс призер полыбысхан. Андрей, Аймир Карамчаков чіли, Россияның піріктірілген командазының резервіне кірче. Ол тренер Олег Сенотрусовтың холында узын таптапча. Рамиль Мехраварзар айланза, ол грек-рим кӱрезінең тоғызынҷы чылы айғас парир. Саарбах тренер Валентин Кольчиковтың устаанынаң харбасчаттыр. Рамиль, сағыстарынаң ӱлезіп, теен:
– Пылтыр Боргояковтың турнирінде мин сыйыхтығ орынға сых полбаам, аннаңар чидииме ӧрінчем. Олох туста кізі хомай чыылысханы ачырғастығ.
Пуох сағысты – араласчылар саны асхынах, тиксі Россия марии орнына Хакасияның первенствозы иртче – тренерлер паза спорт ветераннары искіргеннер. Анзын салтарлар даа киречілепче. 2024 чылда Хакасияның командазы 13 медаль утхан: 5 алтын, 4 кӱмӱс паза 4 хола. Пӱӱл, тізең, оолларыбыстың 30 медаль: 10 алтын, 9 кӱмӱc паза 11 хола. Че ӧрініс чоғыл.
Ниме таңнатча? Сынында Хакасияда грек-рим кӱрезi хомай нимес тилiпче. Республикада пу спорт кӧрімiнҷе cекцияларны 31 кізі апарча, оларның санында Россияның саблығ тренерi Геннадий Боргояков, Хакасияның физическай культуразының паза спортының саблығ тоғынҷылары Александр Худяков паза Родион Мылтыгашев. Ідӧк Вадим Топоевті, Геннадий Бурнаковты, Артём Кулумаевті, Юрий Боргояковты, Аркадий Субраковты паза пасхазын адирға чарир.
Оларның ӱгренҷілерiнің чидiглерi илееде. Кӧзідімге, пу наада Ильяс Палтушев паза Тимур Чебодаев чааҷылар аразындағы Россия чемпионадында сыйыхтығ орыннарға сыхханнар. Палтушев алтын медаль холға кирген, Чебодаев – хола медаль. Ікізі дее А.М.Худяковтың паза В.Е.Кольчиковтың устаанынаң харбасчалар. Новосибирскте ӱгренчеткен Денис Черновтың пастағы тренері – Пётр Чезыбаев. Хайди таныхтаан Пётр Григорьевич, ӱгренҷізі ідӧк Хакасияның ӱчӱн турысча. Пӱӱл Сибирь первенствозында Чернов ӱзінҷізі полыбыстыр, Россия мариинда араласхан.
Андағда ноға ол син хыйға, пӧзік устығ специалисттер М.И.Боргояковтың хумартхызына чарыдылған марығны турыстыра иртір полбинчалар? 2023 чылда спортсменнер турнирге ідӧк уғаа хомай чыылысханнар. Ол пір чылның ағырсымнығ сурии нимес. Чоннаң чоохтасханда, 6 улуғ хырласта Сибирьнің аймах регионнарында грек-рим кӱрезінҷе пір саңай нинҷе-нинҷе марығ полтыр. Хызылчар крайында 18 часха читкелектернің аразында первенство парған, новосибирсктегілер танығлығ турнир иртіртірлер.
Пу сурығны пӧгерге кирек. Михаил Игнатьевич Боргояков улуғ хырлас айында тӧреен, аннаңар турнирні ол кӱннерде иртірчелер. Чӧптер истерге киліскен: кӱресчілерні марыға часхызын Россия первенствозы алнында чыырға. Ноға чарабас? Саблығ тренернің чуртазы грек-рим кӱрезіне чарыдылған. Ол спортты хаҷан даа пастағы орынға турғысчаң. Пілдістіг, Хакасияның спорт кӱрезінҷе федерацияа, тренерлерге, ветераннарға, грек-рим кӱрезіне хынчатхан улусха ибіре чахсы сағынып аларға кирек. Михаил Боргояков Хакасиядағы улуғ спорттың пастағҷызына саналча, піс, тізең, марыға кізілерні дее чыып полбиныбыстыбыс.
Сом Валерия Тамбовцевани
Автор :
Майя Кильчичакова
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
