Иң чахсы тоғынҷылар паза iстенiс марииның чиңiсчiлерi
10.12.2025
Хабарлар
Хакасия пазы Валентин Коновалов аал хонии тоғынҷыларынаң хада
Аал хонии. Улуғ хырлас айының 8-ҷi кӱнiнде республиканың правительство туразында аал хонииның иң чахсы тоғынҷыларын таныхтааннар
Хакасия пазы Валентин Коновалов республиканың иң чахсы аал хонии тоғынҷыларын алғыстаан.
Тоғынҷылар аразында аал хонии министерствозының специалисттерi, фермерлер, механизаторлар, iнек сағҷаңнар, чабаннар, малҷылар, водительлер полғаннар.
– Сiрернiң тоғызыңар – ол ас-тамах читкіҷе поларының ӧӧнi. Пӱӱл пiстiң тоңастығлар, чир тамаа чахсы сыххан, мал азии читкiҷе пилетел парған, аал хонии отрасльында кӧбiзi кӧстеглерҷе тиксi салтарлар пӧзiк, пылтырғызынаң тиңнестiрзе. Андағ салтарлар – ол сiрернiң кӱстенізiңер, сiрернiң профессионализмiңер, тоғызыңарға нандырығлығ хайчатханыңар. Сидiксiнiстер полза даа, холларыңны пос салынминчазар. Тӧреен чир-сууңарға мааннап хайчазар. Хайдағ даа аар тус полза, аал хониин тилiдерге узаратчазар. Сiрернiң сылтаанда пiстiң аал хониибыс алнынзар хаалапча. Фермерлер аймах проекттерге хорадынчалар, наа технологияларны чуртасха кирчелер, наа тоғыс орыннарын тӧстепчелер, республиканың экономиказын тилiтчелер.
Пӱӱн пiс, арғыстар, аал хонии промышленнозына хозым иткен паза 2025 чыл салтарларынҷа пӧзiк чидiглерге читкен иң чахсы тоғынҷыларны чеестепчебiс. Пӱӱл аал хонии промышленность комплексiнiң чиит тоғынҷыларын алынҷа таныхтапчабыс. Аал хонииның мыннаң мындархы тилiзi сiрернең палғалыстығ.
Арғыстар, прайзыңарға нандырығлығ тоғызыңар, тоғызыңарға прай пирiн салғаныңар ӱчӱн алғызым читiрчем. Тоңастығлар чахсы сыхсын, чахсы кӱннер турзын, тоғызыңар маңнаныстығ ползын, сӧбiреңерге часка алғапчам! – алғыстаан Валентин Коновалов.
Пӱӱл Хакасияның правительство туразында аал хонииның 45 тоғынҷызына 47 сыйых читiрiлген.
Хакасияның аал хонии паза ас-тамах министерствозының экономика паза сананыс пӧлиинiң пастығы Оксана Байтуякова, министерствоның мал ӧскiрер сурығларҷа пӧлиинiң ӧӧн чӧпчiзi Олеся Ломакина, министерствоның ӧзiмнер ӧскiрер пӧлиинiң пастығы Александр Фёдоров паза «Ширадағы элеватор» ООО-ның ниме-ноо сығарҷаң лабораториязының пастығы Наталья Холодова Россияның аал хонии министерствозының Аарластығ пiчиине турысханнар.
Алтай аймаандағы «Аршановское» ООО-ның толдырығлығ директоры Анатолий Шмидтке «Хакас Республиканың саблығ аал хонии тоғынҷызы» ат пирiлген.
Хакасияның аал хонии паза ас-тамах министрiнiң орынҷызы Сергей Жулёвха «Хакасияның iстенiс сабланызы» медаль читiрiлген.
Хакас Республиканың Аарластығ пiчии 15 кiзее читiрiлген. Ол санда мал имҷiлерi, механизаторлар, механиктер, мал фельдшерлерi, агрономнар, лаборанттар полғаннар.
2025 чылның iстенiс марии салтарларынҷа, 9 тоғынҷы ахчалығ сыйыхха паза Хакасияның аал хонии паза ас-тамах министерствозының дипломына турысхан. Оларның санында «Целинное» ООО-ның iнек сағҷаңы Екатерина Линдт, хайзы 2025 чылның 9 айына пiр iнектең ортымахти 5437 килограмм сӱт саап алған. Ол 300 пас iнектi саапчаттыр.
Алтай аймаандағы фермер Марина Позднякованың кресен-фермер хониинда тоғынчатхан чабан Владимир Спирин 900 пас хой кӧрче. Пӱӱл чабан 100 хойдаң 98,1% хураған ӧскiрiп алған. «Аршановское» ООО-ның механизаторы Александр Сметанин тоңастығлар чығҷаң комбайннаң 47320 центнер тоңастығлар саап салған. Олох предприятиенiң механизаторы Виктор Покровкин 3802 гектар чирде тоңастығлар таарып салған. «Аршановское» ООО-ның механизаторы Дмитрий Белоногов «К-744» тракторнаң 9032 гектар чирнi тартыбысхан.
Орджоникидзе аймаандағы «Рассвет Абакан» ООО-ның водительi хырадаң ӱртӱнзер 9000 тонна тоңастығлар тартыбысхан.
Прай пу аал хонии тоғынҷылары iстенiс марииның чиңiсчiлерi полчалар. Оларға 100 муң салковайға сертификаттар пирiлген.
Пӱӱл «Хакас Республиканың аал хонии комплексiнiң чииттерi» номинация хоостыра 8 кiзее Хакасияның аал хонии паза ас-тамах министерствозының алғыстас пiчiктерi паза 10 муң салковайға сертификаттар читiрiлген. Таштып аймаандағы фермер Анатолий Мамышев паза Пии аймаандағы О.В.Баузернiң кресен-фермер хониинда iстенчеткен водитель Вячеслав Чертыков оларның санында полғаннар.
29 частығ Вячеслав Чертыков Ағбан городта тӧреен. Н.Ф.Катановтың адынаң Хакас хазна университедiнiң аал хонии колледжiнде «Ихтиолог» специальнозына ӱгренiп алған.
– Мин Будёновка аалда чуртапчам. Ольга Баузернiң кресен-фермер хониинда 8 чылға чағын тоғын салғам. Андар минi арғыстарым тоғынарға хығырғаннар.
Тоғыс кӧңнiме кiрче, тоғыс оңдайлары чахсы паза чал ахчазы тузында тӧлелче, – теен Вячеслав Чертыков.
Пиидегi ветеринар станциязының мал фельдшерi Екатерина Янгулова Хакас Республиканың Аарластығ пiчиин алған. Ол Бондарев аалда чуртапча паза тоғынча.
– Халғанҷы чыл мал фельдшерi полып тоғынчам. Мал фельдшерiне 1989 чылда ӱгренiп алғам. Асхыс аймаандағы Пирiкчул аалда мал фельдшерi полып ӱс чыл тоғын салғам. Анаң ирге парыбысхам. Орджоникидзе аймаандағы Наа аалда мал фельдшерi полғам. Пала таап алғанымда, паза тоғынмаам.
Ам Бондарев аалда чуртапчам. Палаларым ӧс парғанда, тоғын сыххам. Амғы туста Бондарев аалда мал саны илееде. Кiзiлер аттар, хойлар, iнектер тутчалар паза кресен-фермер хоныхтары пар. Чылдаң чылға мал саны ӧсче. Мал фельдшерiнiң тоғызы аар. Мин малларны имнепчем, прививкалар турғысчам паза мал сохчаң цехтарда мал идiн сыныхтапчам. Бондарев аалда сосха сохчаң пiр цех паза мал, хой паза сосха сохчаң пiр цех тоғынча.
Пiстiң уғаа ынағ тоғысчы ӧме. Ветучастокта тӧртӧлең тоғынчабыс. Тоғынҷылар чидiспинче, iкi мал фельдшерi киректелче. Пасха ветучастоктарзар студенттер практика иртерге кил парчалар, че пiссер пiр дее килбинчелер.
Позымның тоғызыма хынчам. Пабам Сергей Максимович минi пу тоғыста тоғынзын тiп сағынған. Аннаңар мин ӱгредiг аларға кӱстенгем, – сағызынаң ӱлескен Екатерина Янгулова.
Сом Илона Каковани
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
