Тилекей хырығлар чох ползын
05.12.2025
Хабарлар
Фестиваль. Хакасияның профессиональнай технологиялар, экономика паза сервис колледжiнде «Хырығлар чох оңдайларның тилекейi» студенттернiң паза ӱгренҷiлернiң республика фестивальы ирткен
Пу мероприятие чыл сай Кинектернiң чоннар аразындағы кӱнiне паза тиксi Россияның кинектер декадазына чарыдылып иртiрiлче. Аның тӧстегҷiлерi Хакасияның ӱгредiг паза наука министерствозы паза профессиональнай технологиялар, экономика паза сервис колледжi полчалар.
Алындағы чылларда фестивальда постарын ӱгредiгде, халых чуртаста чахсы кӧзiткен олғаннарны паза чииттернi сыйыхтаҷаңнар. Пӱӱл, тiзең, аның программазына «Маңнаныс орны» чайаачы тоғыстарның республика марии кирiл парған. Ол ӱгренҷiлернiң, студенттернiң, ол санда хазии уйаннарның, чайаачы оңдайларын тилiдер пӧгiннең иртiрiлче. Iдӧк ол араласчыларға культура паза чайаачы пастыра чонға постарының кӧрiстерiнеңер чоохтирға полысча. Марығ кiчiг хырлас айының 12 – 30 кӱннерiнде «Хоос сӧс», «Кӧг тириинең ойниры», «Сарниры», «Хол-салааларнаң кӧзiдiп сарниры», «Дефиле», «Декоративно-прикладное искусство», «Хореография искусствозы», «Хоос хоостиры» номинацияларҷа ирткен. Анда полған на кiзее алынҷа алай ӧменең аралазарға чарир полған. Тиксi марығда 90-ҷа студент паза 20 азыра ӱгренҷi араласхан. Оларны колледжтiң паза харах оды уйан олғаннарның школа-интернадының ӱгретчiлерi паалааннар. Чиңiсчiлерні паза сыйыхтығ орыннарға турысханнарны фестивальның гала-концертiнде сыйыхтааннар.
– Пiс марығда пу син араласчы полар тiп сағынмаабыс таа. Прай даа номинацияларда кӧп кiзi араласхан. «Хол-салааларнаң кӧзiдiп сарниры», мода театрларының «Дефиле» номинациялары уғаа сiлiг пол парғаннар паза улуғ хайығ тартханнар. Таныхтирға кирек, пу фестиваль олғаннарға паза чииттерге чайаачыларын тилiдерге полысча, чон алнына сығарға хорыхпасха ӱгретче. Анда олаңай школаларның ӱгренҷiлерi паза хазии уйан олғаннар, студенттер араласчалар. Че олар удур-тӧдiр пiр дее пасхалалбинчалар, прайзы чайаачылар, ачых-чарыхтар, ынағлар, – чоохтапча профессиональнай технологиялар, экономика паза сервис колледжiнiң инклюзивнай ӱгредiгнiң ресурс кiнiнiң устағҷызы Ольга Муравьева.
Мероприятиее Хакасияның ӱгредiг паза наука министрiнiң орынҷызы Александр Ехлаков, республиканың ӱгредiг учреждениелерiнiң устағҷылары паза тоғынҷылары, кинектернiң халых пiрiгiстерiнiң, тиксi Россияның кинек палаларның iҷе-пабалары организациязының кiзiлерi, «Особый ракурс» АНО, «Западный» ТОС паза пасха даа аалҷылар кил парғаннар.
Фестивальда республикабыстың прай даа муниципалитеттерiнең ӱгренҷiлер, студенттер араласханнар – тиксi 200 азыра кізі. Ол ирткен кӱнде оларға аймах мастер-класстар тимнелген. Хакасияның профессиональнай технологиялар, экономика паза сервис колледжi «Чиит сас хырыхчаң ус», «Чиит кип тiкчең ус», «Чиит хоосчы», «Чиит ландшафт дизайнерi», «Чиит чиис пызырҷаң ус» мастер-класстар тимнеен. «Кванториум «Хакасия» технопарк браузер ойыннарын чайирына чарыдылған ойын иртiрген, Саяногорсктағы политехническай техникум арт-терапия иртiрген, республиканың компьютер спортының федерациязы киберспортты паза сын спортты пiрiктiрчеткен марығлардаңар чоохтаан. Таныхтирға кирек, фестиваль араласчыларына пасха даа чапсых тренингтер, наука опыттары, ойыннар, кӧзiдiглер тимнелгеннер. Сағынчам, полғаны ла позына хынығ паза кирек ниме тапхан полар.
Мастер-класстар тимнеен ӱгредiг организациялары санында Ағбандағы пӱдiрiг техникумы полған. Мастерлерi «Гипстең идiлген декор чардыхтары» мастер-класс тимнеп килгеннер.
– Техникумыбыс чииттернi пӱдiрiг специальностьтарынҷа, ол санда плиточникке, отделочникке, тимір хабыстырҷаң усха, каменщикке, тимнепче. Аннаңар пӱӱн пiс гипстең ниме-ноо идерiне чарыдылған мастер-классты тимнеебiс. Олғаннар формалар полызиинаң ойнаҷахтар, iдiстер итчелер. Мындағ мастер-класстар хазии уйан олғаннарның кӧңнiлерiне хаҷан даа кiрче. Оларны иртiрчетсебiс, полған на сай кӧп араласчы полча. Ағбандағы пӱдiрiг техникумында хазии уйан олғаннар ӱгренчеткен группа пар. Олар «Пӱдiрiглернi тиксi хайығда тудары» специальностьча ӱгренчелер. Ирткен чылда пастағызын на Абилимпиксте араласхабыс. Эскиз хоостап, Герман Бурнаков чемпионаттың республика синiнде 2-ҷi орынға турысхан, – чоохтапча техникумның социальнай педагогы Елена Кокова.
Фестивальда iдӧк олаңай школалардаң олғаннар араласханнар. Ӱгренҷiлер Хакасияның ортын профессиональнай ӱгредiг учреждениелерiнең, оларда хайдағ профессияларға тимнепчеткеннерiнең танысханнар. Асхыс аймааның Катанов аалындағы школада 8 класста ӱгренчеткен олғаннарны кӧп палалығ iҷе, ӱгретчi Дина Капсаргина ағыл килген. Аның оолғы Аскар Капсаргин пу класста ӱгренче.
– Фестивальда аралазарға хығырғаннарында, мин олғаннарны апар килерге чаратхам. Мында оларға профессияларнаң танызар оңдай пирiлген, аның алнында олар мындағ мероприятиелерге чӧрбеен полғаннар, – чоохтапча Дина Сергеевна.
Аскар хайдағ профессияа ӱгренерiн таллап алған. Ол, аҷазы чiли, программист поларға сағынча. Аскарның харындазы колледжтi тоосхан, анаң ХГУ-да пӧзiк ӱгредiг алған. Пӱӱл вузты тоозыбысхан, амды тоғынча. Ол туңмазына компьютердеңер, программированиедеңер кӧп ниме чоохтапча. Iдӧк Аскар чайғызын Ағбанда иртiрiлчеткен курстарға чӧрген. Прай пу ниме ағаа cағынған сағызын толдырарға полызар.
«Хырығлар чох оңдайларның тилекейi» фестиваль улуғ концертнең тоозылған. Анда чайаачы марығның салтарлары идiлген, араласчыларға грамоталар, танығлығ сыйыхтар читiрiлген.
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
