Хакасияда – Россия чемпионадының ойыннары
05.12.2025
Хабарлар
Ойынның аарлығ аалҷылары Хакасия пазы Валентин Коновалов, Хакасияның меспектiг хоккейҷе федерациязының президентi Юрий Шпигальских паза Ӧӧркi Чӧп кнезi Cергей Сокол
Меспектiг хоккей. 3 улуғ хырласта «Саяны» команда Кировтағы «Родинанаң» тоғасхан. Пiстiң хоккеисттер пуста прай кӱстерiн салып ойнааннар
Меспектiг хоккейге хынчатхан кӧрiгҷiлер 3 улуғ хырласты чидiкпин сағааннар. «Саяны» пастағы ибдегi матчты иртiрер нооза. Аның тузында хоккей ӧмезiнiң узын, хылиин пос хараанаң кӧрiп аларға чарир. Ағаа хоза, 29 кiчiг хырласта Хазанда хоккеисттерiбiс хомай нимес кӧрiнгеннер. «Ак Барс-Динамонаң» тоғазығ 5:6 саннаң тоозылған. Пiстiңнерге хайымға кӧмес ле читпиндiр. Кiзiлер матчха чахсы чыылысханнар. Сизiнгенде, чон меспектiг хоккей ойыннарына сағын партыр.
Кибiр хоостыра пастағы матч пайрамни азылған. Иң пурун артисттер «ағырчатхан» улустың кӧңнiн кӧдiргеннер. Олар, Олег Газмановтың «Россия, алнынзар!» сарынын толдырып, чонға ӧрiнiс сыйлааннар. Анаң аарлығ аалҷыларға сӧc пирiлген. Хакасия пазы Валентин Коновалов, чоох тудып, теен:
– Пӱӱн стадионда спорт пайрамы. Пiс Россия чемпионадының ойыннарын удурлапчабыс. Хоккеисттерге ибде ойнирға пiр саринаң оой арах, мында сағаа кӧрігҷілер хабас пирерлер. Олох туста нандырығлығ. Піc прайзыбыс чиңіске ізенчебіс. Командаларға кӱстіг ойын кӧзіт пирерге алғапчам.
Чылығ сӧстер читiрген Ӧӧркi Чӧп кнезi Сергей Сокол. Хайди таныхтаан Сергей Михайлович, «Саяны» – Хакасия чуртағҷыларының хынчатхан хоккей ӧмезi. Кiзiлер команда ӱчӱн прай чӱреенең «ағырчалар». Аның матчтарына сӧбіренең чӧрчелер. Хакасияның меспектiг хоккейҷе федерациязының президентi Юрий Шпигальскихті истерге чӱрексіністіг полған. Ол чоохтаан:
– Пӱӱн Хакас чирiнде меспектiг хоккейнiң ӱлӱкӱнi. Республика аны удурлабас тіп чоохтар чӧргеннер. Я, сидiкciнiстер полған. Команда оларны «ағырчатхан» улустың полызиинаң тобырған. Прай кӧрігҷілерге паза республика пазы Валентин Коноваловха хабазығ ӱчӱн улуғ алғыс. Пiлчем, Хакасия правительствозы паза Ӧӧркi Чӧп команданы хайығ чох артыспастар. «Саяны» полған, хаҷан даа полар!
Юрий Александровичтiң сӧстерін прай стадион ӧрчіліг хысхырыстарнаң удурлаан. Россияның паза Хакасияның гимннерi толдырылған соонда матч пасталыбысхан. Пастап «Саяны» пустығ чазыда уғаа ӧткiн тудынған. Оолларыбыс атака cоонаң атакаа парчалар, «ыырҷының» хаалхазын ибiрчелер. Че прай ниме тиктең. Хакасияның ӧмезi пос салынминча. Ибде утарға кирек. 15 минута пазынаң «Саянының» хаалхазынзар cоон сӱрiстiре ікі меспек учухча. Сан – 0:2. Трибунадағы улус, алаң ас парған даа полза, ізеніс чідірбинче. Хоккеисттерібіс, тізең, утырысха чабыра пастырчатханға тӧӧйлер. 29-ҷы минутада сан 0:3 пол парған. Хакасияның ӧмезi «Родинаа» чит полбас оңдайлығ. Итсе, «Саянының» капитаны Руслан Гавричков анзынаң чараспинча. Ол 12 метрдең «ыырҷының» хаалхазынзар меспектi кире сабысхан. Сан – 1:3. Кӧрiгҷiлернiң кӧңні сынап 35-ҷі минутада тӱс парған. Андада «Родинаның» кӱстенiзiнең сан 1:4 пол парған. Ойын іди парза, «Саяны» пос чазызында унада утыр салар.
Хоккеисттерiбiс «ағырчатхан» улустың сағыстарын ис салғаннар, таң. Ікінҷі тайм пасталарға маңнанмаан, олар «ыырҷаа» ікі меспек кире сабысханнар. Ікінҷі меспек – Роман Шоховтың чидии, ӱзінҷізін Руслан Гавричков позының адына пас салған. Кізілер трибунада ӧрініске сала ла ылғабинчатханнар. Сан – 3:4. Хайымға пір cан читпинче! Алай «Саяны» чиңic тудар ба? Чох, кирек килiспин парды. Ойын 4:6 саннаң тоозылған. Голларның пiрciн «Саяныға» чир-суғҷыбыс Василий Жаукенов кире сабысхан. Ол амғы сезонда Киров ӱчӱн турысчаттыр.
«Саяны» пос чазызында даа уйан ойнапчаттыр. Команданы паза тренернi пыролирға оой. Мында «Уральский трубниктің» ӱлӱзі сағысха кірче. Кӧп чыл Свердловск облазының ӧмезі турнир таблицазында халғанҷы орында парған. Че клуб ахчалығ инвесторны таап алғанда, пӧзiк устығ хоккеисттерні хығырып алғанда, кирек чахсы саринзар алысхан. Хайдағ-да ікі чыл аразына команда чиңіс ӱчӱн харбасча. Пiске хайди поларға? «Саянының» таңдағызына киртiнерге ле халча.
Сом Дмитрий Сунчугашевти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
